«Muruvvat karvoni» xayriya tadbiri Zangiota ziyoratgohida o‘tkazildi
Bugun, 21 dekabr kuni «Vaqf» xayriya jamoat fondi tomonidan “Muruvvat karvoni” xayriya tadbirining navbatdagi moddiy yordamlari Toshkent viloyatiga yetkazildi. Xayriya marosimi Zangiota tumanidagi "Zangiota" ziyoratgohida bo‘lib o‘tdi. Tadbirda O‘zbekiston musulmonlari idorasi raisi, muftiy Usmonxon Alimov hazratlari ishtirok etib, muhtaram Yurtboshimiz tomonlaridan "Vaqf" xayriya jamoat fondi tashkil etilgani, o‘tgan davr mobaynida Fond tomonidan masjid-madrasalarni moddiy-texnik bazasini yaxshilash, imom-xatiblarni qo‘llab-quvvatlash va yordamga muhtoj oilalarni ijtimoiy himoya qilish borasida juda katta ishlar amalga oshirilganini bildirdilar. "Muruvvat karvoni" xayriya tadbiri butun respublikamizning barcha hududlarida bo‘lib o‘tganini muftiy hazratlari so‘zlab berdilar.
Toshkent viloyatida o‘tkazilgan xayriya tadbirida 100 dan ortiq yordamga muhtoj kishilar ishtirok etdi. Kam ta’minlangan oilalarga zaruriy buyumlar, oziq-ovqat mahsulotlari, kiyim-kechaklar tarqatildi. Bundan tashqari masjidlarga diniy-ma’rifiy mavzudagi kitoblar, audiokitoblar ham topshirildi.
Shuningdek, nogironligi bo‘lgan 20 nafar fuqaroga nogironlik aravachalari topshirildi.
Ma’lumot uchun, “Vaqf” xayriya jamoat fondi tomonidan Toshkent viloyatida istiqomat qiluvchi imkoniyati cheklangan va ijtimoiy himoyaga muhtoj fuqarolar hamda masjidlarni qo‘llab-quvvatlash maqsadida jami 106 million so‘mlik tovar-moddiy boyliklar beg‘araz tarqatildi.
Matbuot – jamiyat ko‘zgusi
Ommaviy axborot vositasi – jamiyat ko‘zgusi, millatning yuzi. Uning zimmasida keng jamoatchilikni fikrlashga chorlash, tarbiyalash, dunyoqarashni boyitishdek mas’uliyat turadi.
Keyingi yillarda mamlakatimizda huquqiy demokratik davlat va fuqarolik jamiyati barpo etishning muhim sharti bo‘lgan ommaviy axborot vositalarini rivojlantirish, ularning moddiy-texnik bazasi va kadrlar salohiyatini mustahkamlash, so‘z va matbuot erkinligini ta’minlash, soha vakillarini har jihatdan qo‘llab-quvvatlashga bo‘yicha keng ko‘lamli ishlar amalga oshirilmoqda.
Shu munosabat bilan bugun O‘zbekiston xalqaro islomshunoslik akademiyasida "Matbuot – jamiyat ko‘zgusi" mavzusida davra suhbati bo‘lib o‘tdi.
Mazkur tadbir 27 iyun – Matbuot va ommaviy axborot vositalari xodimlari kuni munosabati bilan tashkil etildi. Unda O‘zbekiston xalqaro islomshunoslik akademiyasi rektori Muzaffar Komilov, OAV vakillari, Akademiya o‘qituvchi va xodimlari ishtirok etdi.
So‘zga chiqqanlar so‘nggi yillarda yurtimizda so‘z erkinligiga bo‘lgan e’tibor yangi darajaga ko‘tarilganini qayd etishdi. OAV demokratik qadriyatlarni qaror toptirish, dunyoda va mamlakatimizda sodir bo‘layotgan ijtimoiy-siyosiy jarayonlar, voqea-hodisalar haqida tezkor va haqqoniy ma’lumotlar yetkazish, Yangi O‘zbekistonning demokratik qiyofasini shakllantirishda muhim rol o‘ynayotganini ta’kidlashdi.
Darhaqiqat, davlatimiz rahbari soha vakillarining mehnatini doimo e’tirof etar ekanlar, shunday fikrlarni bildirgan edilar:
"Biz bugun huquqiy demokratik davlat qurayotgan ekanmiz, jurnalistikaning butun dunyoda e’tirof etilgan, o‘zgarmas talab va mezonlariga amal qilishimiz zarur. Bu mezonlarning eng asosiysi – xolislik va haqqoniylikdir. Binobarin, matbuot maydoniga kirgan inson – u jurnalist bo‘ladimi, bloger bo‘ladimi, bundan qat’i nazar – ana shu qoidalarga amal qilishi shart".
Uchrashuv davomida "Yangi O‘zbekiston" va "Pravda Vostoka" gazetalari bosh muharriri Salim Doniyorov, "Jadid" gazetasi bosh muharriri Iqboljon Mirzaaliyev, Adliya vaziri maslahatchisi, bloger Shahnoza Soatova hamda "Ziyo" media markazi direktori Abduhamid Muxtorov so‘zga chiqib, o‘z fikr-mulohazalarini bildirdilar.
Shundan so‘ng yurtimizda diniy-ma’rifiy sohada amalga oshirilayotgan keng ko‘lamli islohotlar hamda yosh avlodning barkamol voyaga yetishi, xalqaro standartlar asosida ta’lim olishi, ilm-fan, kasb-hunar cho‘qqilarini egallashi hamda xalqimiz ma’naviy-ma’rifiy yuksalishi borasidagi yangilanishlarni keng jamoatchilikka samarali yetkazishda Akademiya bilan faol hamkorlik qilib kelgan bir guruh OAV xodimlarni bayram munosabati bilan taqdirlash marosimi o‘tkazildi.
Bir guruh jurnalistlarga tashakkurnoma va esdalik sovg‘alari topshirildi.
O‘zbekiston xalqaro islomshunoslik akademiyasi
Matbuot xizmati
