Quyida keltiriladigan fikrlar, hikmatlar ijtimoiy tarmoqlardagi turli sahifalardan olib tarjima qilingan. Bundan tashqari sahobai kiromlar, ulug‘ olimlar, Yaqin Sharq, Osiyo, Yevropa va Amerika mutafakkirlarining bir qator fikrlari ham berilgan. 

*****

Yodingizda tuting, azizligingiz Islomga amal qilishingizdadir. Sizlarga nusrat Alloh taologa qurbat hosil qilganingizda keladi. Birorta xatoni kichik sanamanglar! Dushmanga ishonmanglar!

Sulton Abdulhamid II rahimahullohning vasiyatidan

*****

Hech qachon ilm olayotgan kishidan qo‘rqmadim. Ammo ba’zi kitoblarni o‘qib olib, o‘zlarini olim deb hisoblaydigan anavi ahmoqlardan yiroq yuraman.

Sulton Abdulhamid II rahimahulloh

*****

Kuchli – boshqaning ustidan hukm qilgan kimsa.

Buyuk – o‘z nafsining ustidan hukm qilgan kishi.

“Tarix muhrlagan so‘zlar”

*****

Insonlarning qandayligini musofirlikda yoki musibat kelgan paytda bilasan.

Abdurrohman Muniyf

*****

“Meni falonchi yubordi” degan so‘z 10 yillik tajriba va 5 ta diplomga teng bo‘lib qoldi.

“Tarix muhrlagan so‘zlar”

*****

Ko‘p dushmanlarga yo‘liqdim. Lekin ularning ichidagi eng yomoni o‘zlarini mening do‘stim ekanini da’vo qiluvchilardir.

“Tarix muhrlagan so‘zlar”

*****

Og‘riq qoldiruvchi vositalar – ko‘p yurish va insonni xursand qiladigan ishlar bilan mashg‘ul bo‘lishdir.

Abu Ali ibn Sino

*****

Chin muhabbat – sobit turganidir.

Ketadigan muhabbat muhabbat emas.

O‘zgaradigan muhabbat muhabbat emas.

“Tarix muhrlagan so‘zlar”

Internet materiallaridan to‘plab, tarjima qiluvchi

Nozimjon Iminjonov