Joriy yil 12 dekabrda BMT Bosh Assambleyasining yalpi sessiyasida “Ma’rifat va diniy bag‘rikenglik” nomli maxsus rezolyutsiyasi qabul qilingani O‘zbekistonning diniy bag‘rikenglik borasidagi tashabbusining yorqin ifodasi bo‘ldi. Prezidentimiz Shavkat Mirziyoyevning 2017 yilda BMT Bosh Assambleyasining 72-sessiyasida ilgari surgan tashabbusi asosida qabul qilingan ushbu hujjat jahon xalqlari o‘rtasida mavjud dinlarga mansub ma’rifiy bag‘rikenglik madaniyatini kuchaytirishga xizmat qiladi.
Bu tarixiy voqea O‘zbekistonda din sohasida amalga oshirilayotgan islohotlar jahonda tan olinayotganidan, yurtimizning aynan ushbu masalalarda boy tarix va tajribaga ega ekanidan dalolat beradi.
Poytaxtimizda barpo etilayotgan Islom sivilizatsiyasi markazi davlatimiz rahbarining ayni sohasidagi ezgu tashabbuslaridan biridir.
Shavkat Mirziyoyev joriy yil 15 iyun kuni ushbu markaz qurilishiga tashrif buyurib, inshoot poydevoriga ramziy tamal toshi qo‘ygan edi.
Ayni paytda markaz qurilishi jadal olib borilmoqda. Bosh pudratchisi “12-trest” aksiyadorlik jamiyati bo‘lgan inshoot poydevori quyilib, devor ko‘tarilmoqda. Qurilish ishlari 3 smenada tashkil etilgan, ishchi-muhandislarga zarur sharoitlar yaratilgan.
Markaz loyihasi sharqona uslubda bo‘lib, birinchi qavatdan marosimlar zali, qadimiy qo‘lyozma va osori-atiqalarni ta’mirlash, mavsumiy ko‘rgazma bo‘limlari, do‘konlar, muzey omborlari, 200 o‘rinli avtoturargoh o‘rin oladi.
Ikkinchi qavatda kutubxona, anjumanlar zali, ajdodlarimizning islom dini, ilm-fan rivojiga qo‘shgan hissasi, san’at, ta’lim, shaharsozlik va me’morlik an’analariga bag‘ishlangan ko‘rgazma zallari, o‘rtada Usmon Qur’oni joylashadi. Uchinchi qavat axborot-resurs markazi, ilmiy kafedralar, xalqaro anjumanlar zali va boshqa xonalarni o‘z ichiga oladi.
Prezidentimiz qurilish jarayoni bilan tanishdi. Ko‘rgazmalar zalida O‘zbekiston tarixi davrlar bo‘yicha, har bir asr, har bir allomaga oid manbalar va ashyolar asosida namoyish etilishi zarurligini ta’kidladi.
– Hamma o‘z tarixini ulug‘laydi. Lekin bizning mamlakatimizdagidek boy tarix, bobolarimizdek buyuk allomalar hech qayerda yo‘q. Bu merosni chuqur o‘rganishimiz, xalqimizga, dunyoga yetkaza bilishimiz kerak. Bu markazga kelgan odam tariximiz haqida to‘la tasavvurga ega bo‘lishi, katta ma’naviyat olib ketishi zarur, – dedi Shavkat Mirziyoyev.
Davlatimiz rahbari markazni pardozlash va jihozlashni takomillashtirish bo‘yicha ko‘rsatmalar berdi.
Iymon 
Namoz 
Ro'za 
Zakot 
Haj 
Qur'on 
Islom saboqlari 
Aloqa 
