Amerikaga ilk bor musulmonlar borishgan

Xashxosh ibn Sa’iyd arab dengizchisi edi. Andaluslik erkaklardan bir guruhini to‘pladi, ularni oziq-ovqat va yo‘l uchun kerak bo‘ladigan narsalar bilan ta’minladi. Keyin barchalari Atlantik ummonini kemada suzib o‘tib, “noma’lum yer”ga borishdi. Bu Amerika qit’asi edi. U yerdan bir qancha qimmatbaho toshlar va oltin olib qaytishdi. Bu voqea milodiy 889 yilda, ya’ni Kolumbdan 570 yil oldin sodir bo‘lgan edi.

Demak, Amerika qit’asiga ilk bor musulmonlar tashrif buyurishgan.

Buyuk sarkarda

Xolid ibn Valid roziyallohu anhu ulug‘ sahobalardan bo‘lib, Quraysh qabilasining Banu Maxzum urug‘idan edilar. Hijratdan taxminan 30-34 yil oldin, milodiy 592 yilda Makkai Mukarramada tavallud topdilar. Rasululloh sollallohu alayhi vasallam u kishiga “Sayfulloh” (Allohning qilichi) deb laqab berdilar. U zot Islomdagi eng buyuk qo‘mondon, sarkarda hisoblanadilar. U kishi 100 dan ortiq harbiy yurishlarda qo‘mondonlik qilib, shu urushlardan birortasida yengilmagan ekanlar. Ammo u kishining vafotlari hijriy 21 yilda, milodiy 642 yilda urush maydonida emas, uylarida, to‘shaklarida bo‘ldi. 

“Sihohi sitta”

“Oltita sahih” (“Sihohi sitta”) hadis kitoblarini yozganlarning tug‘ilib-o‘sgan joylari:

Imom Buxoriy rahimahulloh “Sahihul Buxoriy” kitobini yozganlar. Tug‘ilgan joylari O‘zbekiston.

Imom Muslim rahimahulloh “Sahihu Muslim” kitobini yozganlar. Tug‘ilgan joylari Eron.

Imom Abu Dovud rahimahulloh “Sunani Abu Dovud” kitobini yozganlar. Tug‘ilgan joylari Eron.

Imom Termiziy rahimahulloh “Sunani Termiziy” kitobini yozganlar. Tug‘ilgan joylari O‘zbekiston.

Imom Nasoiy rahimahulloh “Sunani Nasoiy” kitobini yozganlar. Tug‘ilgan joylari Turkmaniston.

Imom Ibn Moja rahimahulloh “Sunani Ibn Moja” kitobini yozganlar. Tug‘ilgan joylari Eron.

Nozimjon Iminjonov tayyorladi