"Eng ma’rifatli imom – 2018" ko‘rik tanlovining respublika bosqichi boshlandi
Mamlakatimiz taraqqiyotning yangi davrida muhtaram Prezidentimiz tomonlaridan diniy sohada olib borayotgan islohotlar ayniqsa diqqatga sazovordir. Ushbu islohotlarning hayotga tatbiq etilishida diniy soha xodimlari ham munosib ishtirok etishlarini ta’minlash O‘zbekiston musulmonlari idorasi oldida turgan eng oliy vazifalardan biridir.
Bugun, 20 dekabr kuni O‘zbekiston musulmonlari idorasida har yili an’anaviy tarzda o‘tkazilib kelinayotgan "ENG MA’RIFATLI IMOM – 2018" ko‘rik tanlovining respublika bosqichi boshlandi.
Unda tanlovning Qoraqalpog‘iston Respublikasi, Toshkent shahri va viloyatlar bosqichida birinchi o‘rinni egallagan 14 nafar imom-xatib bellashmoqda.
"ENG MA’RIFATLI IMOM– 2018” ko‘rik-tanlovini o‘tkazishdan maqsad, bugungi kun imom-xatibi ham diniy ham dunyoviy bilimlarni puxta egallashi, Qur’oni karim oyatlari tafsirini mukammal bilishi, dunyoda yuz berayotgan voqelikdan xabardor bo‘lib, xalqni ezgulik va birdamlikka chaqirishi, yoshlarga haq bilan botilni yetkaza bilishi kabi faoliyatlarni yanada jadallashtirishdan iborat.
Shuningdek, hozirgi paytda dunyoda kechayotgan murakkab siyosiy jarayonlarda Islom dini niqobi ostida ro‘y berayotgan urush va to‘qnashuvlar, buzg‘unchi g‘oyalar tahdididan aholini ogoh etib, ularga to‘g‘ri islomiy ta’limotni yetkazish kabi vazifalarni qay darajada uddasidan chiqayotganlarini bilish ham maqsad qilib qo‘yilgan.
Tadbir Qur’on karim tilovati bilan boshlandi. Shundan so‘ng hakamlar hay’ati va ishtirokchilar tanishtirildi.
Musobaqa davom etmoqda. Tanlov haqidagi batafsil ma’lumotlarni muslim.uz portali va uning ijtimoiy tarmoqlardagi sahifalarida kuzating.
O‘zbekiston musulmonlari idorasi Matbuot xizmati
Virtual tahdid: kiberjinoyatchilardan ogoh bo‘ling!
Bugun, 3 avgust kuni O‘zbekiston musulmonlari idorasida “Kiberjinoyatchilik: zamonaviy jamiyatning yangi tahdidi” mavzusida onlayn yig‘ilish o‘tkazildi.
Unda Diniy idora Huquqshunoslik bo‘limi boshlig‘i Jahongir Hotamov so‘zlab, ishtirokchilar e’tiborini bugungi kunda dolzarb muammoga aylanib borayotgan kiberjinoyatlar ko‘lamiga qaratdi.
Rasmiy ma’lumotlarga ko‘ra, o‘tgan yili Toshkentda kiberjinoyatlar soni 16 mingdan ortgan. Fuqarolar qariyb 2 trillion so‘m moddiy zarar ko‘rgan bo‘lsa-da, ularni fosh etish 8 foizga ham yetmagan.
Ushbu jinoyatlarga keskin barham berish va oldini olish uchun 2026 yil 10 mart kuni “O‘zbekiston Respublikasining Kiberxavfsizlik strategiyasini belgilash va kiberjinoyatchilikning oldini olish tizimini takomillashtirish to‘g‘risida” Prezident Farmoni qabul qilindi. Farmon asosida O‘zbekiston Respublikasining 2026 – 2030 yillarga mo‘ljallangan kiberxavfsizlik strategiyasi qabul qilindi.
Yuqoridagi kabi salbiy xolatlarning oldini olishda aholining huquqiy savodxonligini oshirish muhim hisoblanadi. Shu maqsadda Diniy idora bosh yuristi Alisher Agzamov Kiberjinoyatchilikning paydo bo‘lish tarixi, asosiy turlari, kiberjinoyatga duch kelgan kishi nima qilishi kerakligi, kiberxavfsizlikning oddiy qoidalari haqida tushunchalar berib o‘tdi.
O‘zbekiston musulmonlari idorasi
Matbuot xizmati
