Nurgoho Sukamdani: “Asosiy maqsad foyda olish emas, Alloh rizoligini topish”
Kuni kecha, 18 dekabr kuni O‘zbekiston musulmonlari idorasi raisi, muftiy Usmonxon Alimov hazratlari mamlakatimizga tashrif buyurgan Indoneziyaning “Sahid” nomli vaqf fondi rahbari Nurgoho Sukamdanini qabul qildilar. Mehmonga Indoneziyadagi “Istiqlol” muzeyi mas’ul xodimi janob Sayfuddin va diniy ta’lim muassasalari majmuasi rahbari Anda Xonim hamrohlik qildi.
Muftiy hazratlari O‘zbekistonda din sohasida amalga oshirilayotgan ishlar, muhtaram Prezidentimiz tashabbuslari bilan O‘zbekistonda Islom sivilizatsiyasi markazi, Xalqaro islom akademiyasi, Imom Buxoriy va Imom Termiziy xalqaro ilmiy tadqiqot markazlari tashkil etilayotgani, ixtisoslashgan ilmiy maktablar o‘z faoliyatini boshlagani haqida so‘zlab berdi. Yaqinda tashkil etilgan Hadis ilmi maktabi haqida batafsil bayon qildilar. Shuningdek, muftiy hazrat o‘z so‘zlarida ziyorat turizmini rivojlantirish bo‘yicha qilinayotgan sa’y-harakatlar to‘g‘risida alohida to‘xtalib, indoneziyaliklarni ruhiy ozuqa oladigan va inson qalbi orom topib, ma’naviy yuksalishiga xizmat qiladigan tabarruk qadamjolarimizni ziyorat qilishga taklif etdi.
Muloqotda muftiy hazratlari so‘z olib, O‘zbekiston va Indoneziya o‘rtasidagi hamkorlik ko‘p yillardan davom etib kelayotganini bildirdilar. Indoneziya davlatining sobiq prezidenti janob Suxarto 1989-1996 yillar oralig‘ida bir necha bor yurtimizga tashrif buyurgani, xususan, Samarqand viloyatiga safarini Imom Buxoriy hoki poki qo‘nim topgan maskanga yuksak ehtirom ko‘rsatish bilan boshlaganini muftiy hazratlari alohida ehtimom bilan esga oldilar.
Nurgoho Sukamdani janoblari fondi tomonidan O‘zbekistonda qurilayotgan mehmonxonalar, ziyorat turizmini rivojlantirish, halol standartlash, diniy ta’lim muassasalari talabalarini o‘qitish borasida hamkorlik qilish va “Istiqlol” muzeyida O‘zbekiston pavilionini tashkil etish takliflarini bildirdi. Shuningdek, O‘zbekistondagi diniy ta’lim berish tizimiga alohida qiziqish bildirdi. Nurgoho Sukamdani janoblari mana shunday ishlarni amalga oshirishdan asosiy maqsad foyda olish emas, Alloh rizoligini topish ekanini bildirdi.
O‘zbekiston musulmonlari idorasi Matbuot xizmati
Xato – bandaniki
Bir yigit masjidga kelib biroz o‘tirgach, imomga e’tiroz bildirdi:
– Endi masjidga kelib o‘tirmasak ham bo‘larkan...
Imom undan nima uchun bunday deganining sababini so‘radi. Yigit yon-atrofdagi hamma odam telefonga qarab o‘tirgani, ba’zilari o‘zaro gaplashayotgani uchun shu gapni gapirganini aytdi.
Imom biroz o‘ylab turgach, bunday dedi:
– Yaxshi, e’tirozing o‘rinli. Men bu haqda odamlarga eslatib turibman. Lekin sen endi masjidga kelmoqchi bo‘lmasang bir ish qilib ket.
Yigit rozi bo‘ldi. Imom unga bir piyolani to‘ldirib suv berdi va shu suvni bir tmchi ham to‘kmasdan masjidning ichini bir aylanib chiqishini iltimos qildi. Yigit bor diqqat-e’tiborini jamlab, ohista qadamlar bilan, ikki ko‘zini piyoladan uzmagan holda vazifani muvaffaqiyatli ado etdi.
Imom unga dedi:
– Barakalloh! Endi menga ayt-chi, sen shu topshiriqni bajarayotganingda kimlar gapirib o‘tirdi, kimlar telefoniga qaradi?
Yigit javob berdi:
– Men qayerdan bilay, axir butun diqqatim suvni to‘kib qo‘ymaslikda edi.
Imom dedi:
– Ana ko‘rdingmi? Sen topshiriqni bajarayotganingda butun fikru hayolingni bir joyga jamlading. Allohning huzurida turganimizni his qilib, xayolimizni ibodatga, Uning zikriga qaratsak, boshqalarning xatosini ko‘rishga vaqtimiz ham qolmaydi. Albatta, kimdir xato qilsa bu sening hidoyatdan yuz burib ketishingga sabab bo‘lmasligi kerak. Chunki xato dinniki yo masjidniki emas, balki bandaniki...
Yigit o‘ylab ko‘rib, xato qilganini tushundi. Keyingi jamat namozlarida xushu bilan qatnashishda davom etdi.
Akbarshoh RASULOV