Quyida keltiriladigan fikrlar, hikmatlar ijtimoiy tarmoqlardagi turli sahifalardan olib tarjima qilingan. Bundan tashqari sahobai kiromlar, ulug‘ olimlar, Yaqin Sharq, Osiyo, Yevropa va Amerika mutafakkirlarining bir qator fikrlari ham berilgan.

*****

Otasi alsgeymer kasalligi bilan og‘ridi. O‘g‘lidan:

— Otang o‘zi seni uning o‘g‘li ekaningni biladimi, esidami? deb so‘rashdi. Shunda u:

— Bu muhim emas. Muhimi men haliyam uning o‘g‘li ekanimni bilaman, deb javob berdi.

Ma’lumot uchun aytamizki, alsgeymer kasalligi bilan og‘rigan odam xotirasidan ayrilib, hatto o‘zining kimligini ham eslolmaydi.

*****

Inson har qancha go‘zal bo‘lmasin, agar xulqi, xarakteri chatoq bo‘lsa, chiroyi ko‘zga ko‘rinmay qoladi.

*****

Yomon o‘rtoq chivinga o‘xshaydi. Uning yomonligini seni chaqib ketganidan keyin bilasan.

Mustafo Manfulutiy

*****

Qaysi bir shaxs ilm o‘rganishdan to‘xtasa, u xoh yigirma yosh bo‘lsin, xoh sakson yosh bo‘lsin, ojiz, qari kishidir.

“Tarix muhrlagan so‘zlar”

*****

Hech kim zulmatni bosib o‘tmay turib tongga yeta olmaydi.

“Tarix muhrlagan so‘zlar”

*****

• Qiyinchilik paytida sabr sinaladi.
• Tortishuv paytida aql sinaladi.
• Og‘ir vaziyatlarda odamlar sinaladi.

“Tarix muhrlagan so‘zlar”

*****

Universitetda ba’zi fanlarning imtihonida yiqildim. O‘shanda bir do‘stim hamma fanlardan muvaffaqiyatli o‘tgan edi. Hozir u Maykrosoft kompaniyasida muhandis (injener) bo‘lib ishlayapti. Men esa o‘sha kompaniyaning rahbariman.

Bill Geyts

*****

Seni o‘ldirgan kishi deb faqat o‘q otib o‘ldirganni emas, balki orzu-umidlaringni o‘ldirganni ham aytiladi.

“Tarix muhrlagan so‘zlar”

*****

Kek saqlash – muvaffaqiyatsizlikning eng oxirgi bosqichidir.

“Tarix muhrlagan so‘zlar”

*****

Hatto shamollar kelib uzr so‘ragan taqdirda ham, shox singanicha qolaveradi.

“Tarix muhrlagan so‘zlar”

*****

Sukut – nafratning eng afzal ta’biridir.

“Tarix muhrlagan so‘zlar”

*****

Ishing o‘ngidan kelganda do‘stlaring sening kimligingni bilishadi. Ishing orqaga ketganda sen o‘zing do‘stlaring kimligini bilasan.

Ibrohim Faqiy

*****

Donishmandlar, aqllilar jim turaversa, ahmoqlar ko‘payib ketadi.

“Tarix muhrlagan so‘zlar”

*****

Pul, mol senga haqiqiy do‘stlarni emas, balki ko‘plab “madaniyatli” (ya’ni dushmanligini sezdirmaydigan) dushmanlarni jalb etadi.

“Tarix muhrlagan so‘zlar”

*****

Uzlat, xoli qolish ikkiyuzlamachilarning shovqin-suronidan afzaldir.

“Tarix muhrlagan so‘zlar”

*****

Odamlar bir-birlariga o‘zlaridagi mavjud nuqson miqdoricha aziyat beradilar.

“Tarix muhrlagan so‘zlar”

*****

Uyingdagi muammo sening o‘zingga xos muammodir. Gapirishdagi odobing esa suhbatdoshlaringning sendagi haqqidir. O‘zingning shaxsiy muammolaring va ichki iztiroblaringni boshqalar bilan qilayotgan muomalangga aralashtirma!

“Tarix muhrlagan so‘zlar”

*****

Odamlar bilan bo‘ladigan ilk muomalalardagi o‘zini namunali tutishlarga aldanma. Matematika fani ham rang-barang olmalarni va yong‘oqlarni bir-biriga qo‘shish va ayirishdan boshlanadi.

“Tarix muhrlagan so‘zlar”

*****

Boshqalarga ziyo ulashgan, ammo o‘zini yondirib, eritgan sham kabi bo‘lma.

“Tarix muhrlagan so‘zlar”

Internet materiallaridan to‘plab, tarjima qiluvchi

Nozimjon Iminjonov