Otinoyilar uchun o‘quv-seminari tashkil etildi
Joriy yilning 11-14 dekabr kunlari Farg‘ona viloyatida Din ishlari bo‘yicha qo‘mita, O‘zbekiston Musulmonlari idorasi va viloyat hokimligi bilan hamkorlikda otinoyilar uchun o‘quv-seminar tashkil etildi. Seminarni O‘zbekiston Musulmonlari idorasi, Xalqaro Islom akademiyasi doktorantlari va Din ishlari bo‘yicha qo‘mita xodimlaridan iborat mutaxassislar tarkibi olib bordilar. Dastur asosida ma’ruzalar, davra suhbatlari o‘tkazildi. O‘quv-seminar dolzarb mavzularga boy savol-javoblar asosida bo‘lib o‘tdi.
Otinoyilarimizning kelgusi faoliyatlarida bu o‘qishlarning samarasi, albatta, ko‘rinadi. Ular ko‘rsatilayotgan e’tibordan yanayam ruhlanib, muhtaram yurtboshimizga, muftiy hazratlariga va barcha tashkilotchilarga o‘z minnatdorchiliklarini bildirdilar. Kelgusida Vatan taraqqiyoti, jamiyatimiz va diniy-marifiy sohada o‘z kuch va salohiyatlarini ayamasliklarini ta’kidladilar.
O‘zbekiston Musulmonlari idorasi Matbuot xizmati
Namozda qo‘l ko‘tarish
Namozga kirishda qo‘llar quloq barobarigacha ko‘tarilib, qo‘lning bosh barmog‘i quloqning yumshog‘iga yetkaziladi va "takbiri tahrima" aytib, namozga kiriladi. Qo‘llar ko‘tarilganda kaftning ichki tomoni qiblaga qaratilib, barmoqlar biroz ochilgan holatda bo‘ladi.
Namozga kirishda qo‘llar quloq barobarigacha ko‘tarilishi haqida bir qancha hadislar kelgan:
Voil ibn Hujr roziyalloxu anhu: "Men Nabiy sollallohu alayhi va sallamni namozga kirishda takbir aytib, qo‘llarini ko‘tarib, quloqlari barobariga ko‘targanlarini ko‘rdim", dedilar (Imom Muslim rivoyati).
Anas ibn Molik roziyalloxu anhu rivoyat qilgan hadisda: "Rasululloh sollallohu alayhi va sallam namozga kirishda takbir aytib, so‘ngra ikki qo‘llarini ko‘tarib, bosh barmoqlarini quloqlariga barobar qilar edilar" (Imom Hokim va Imom Doraqutniy rivoyatlari).
Ulamolarimiz: “Hadislarda kelgan "qo‘lni quloq barobariga ko‘tarish”dan maqsad uni quloqqa tekkizishdir, chunki quloqning yumshog‘iga qo‘l tegishi qo‘lning quloq barobariga ko‘tarilganining aniq belgisidir”, deganlar. Bu haqda “Raddul Muhtor”, “Lubob fiy sharhil kitob”, “Fatavoi Qozixon”, “Sharhul Viqoya”, “Majma’ul anhur” shu kabi bir qancha mo‘tabar fiqhiy kitoblarimizda bayon qilingan.
Uychi tuman "Xizirobod" jome masjidi
imom-xatibi Sherzod Rahimov
Manba: t.me/softalimotlar
