Namoz – Islom dinining besh ustunidan biridir. Namoz mo‘minning me’rojidir. Namoz mo‘min-musulmon odam har kuni bajaradigan eng muhim amalidir. Namoz bandaning bu dunyoda ham, oxiratda ham najotga erishishiga sabab bo‘ladigan eng ulug‘ ibodatdir.

Hozirgi kunda ko‘plab tabiblar namozning tibbiy foydalari juda ko‘p ekanini bir ovozdan aytishmoqda.

Namoz insonni varikoz kasalliklaridan himoya qiladi.

Namozda amalga oshiriladigan harakatlar tufayli oyoq-qo‘llarda tomirlar bo‘rtib chiqib qolishi bilan kechadigan varikoz kasalligidan namozxon mo‘min odam omonda bo‘lar ekan.

Namoz tanadagi qon aylanishini ham yaxshilaydi. Jismning barcha a’zolariga qon bir maromda, tartib bilan yetib borishini ta’minlaydi.

Namoz har kuni tartib bilan ado etilgani uchun o‘ziga xos mashqlar majmuasi hamdir. Mo‘min inson har kuni tartib bilan namoz o‘qib yursa, tanasi ham risoladagidek ishlaydi.

Shuningdek, namoz insonni yana ko‘plab kasalliklardan himoya qiladi. Masalan, suyaklarning mo‘rtlashishi, umurtqa pog‘onasining egilishi va kamharakatlilik natijasida yuzaga keladigan boshqa bir qancha kasalliklarning odini oladi.

Namozlarni o‘z vaqtida muntazam o‘qib borish jismga yashovchanlik, faollik kelishiga, tananing ichki a’zolari faoliyatida tartib-intizom o‘z o‘rniga tushishiga sabab bo‘ladi.

Namozdagi ruku’ va sajda qorin, boldir va son muskullarining baquvvat bo‘lishiga olib keladi.

Namoz ichaklar faoliyatining faollashishiga katta hissa qo‘shib, ich qotishining oldini oladi.

Ruku’ va sajda miyaga qon kelib, u yana ortga qaytishiga, miya qon bilan me’yorida ta’minlanishiga, unga bo‘ladigan qon bosimining kamayishiga, barcha a’zolarda qon intizomli aylanishiga sabab bo‘ladi.

Endi mana bu rivoyatlarga diqqat qilaylik!

“Agar Nabiy sollallohu alayhi vasallam bir ishdan mahzun bo‘lsalar, namozga kirishar edilar”. Imom Ahmad rahimahulloh rivoyati.

Payg‘ambarimiz sollallohu alayhi vasallam doim “Amal qilinglar, albatta, amallaringizning eng yaxshisi namozdir!” der edilar. Imom Ahmad rahimahulloh rivoyati.

Subhanalloh!

Dunyo va oxiratda najotga erishishimizning garovi, oxiratda birinchi bizdan so‘raladigan amal, ko‘plab ruhiy, tibbiy, aqliy foydalarning manbai va eng asosiysi – Alloh taoloning roziligiga erishtiruvchi eng buyuk amal bo‘lgan NAMOZ IBODATIni o‘z vaqtida ado etaylik, unga aslo beparvo bo‘lmaylik! 

Abduddoim Kahelning maqolasi asosida

Nozimjon Iminjonov tayyorladi