O‘zbekiston Respublikasi Konstitutsiyasining 26 yilligi  munosabati bilan Toshkent shahar hokimligi tashabbusi bilan Toshkent shahrida faoliyat yurituvchi otinoyilar o‘rtasida “Eng faol otinoyi” ko‘rik tanlovini o‘tkazish joriy qilindi. Toshkent shahar hokimi o‘rinbosari tomonidan tasdiqlangan bayonnoma ilovasiga asosan, “Eng faol otinoyi” ko‘rik-tanlovini o‘tkazish bo‘yicha shahar hay’ati tarkibi tuzilib, mazkur ko‘rik tanlovning tuman bosqichi  3-, 4-, 10 dekabr kunlari o‘tkazilib, unda g‘oliblikni ko‘lga kiritgan 13 nafar otinoyilar ko‘rik tanlovning Toshkent shahar bosqichida ishtirok etish uchun yo‘llanma olgan edilar.

Bugun mazkur ko‘rik-tanlovning shahar bosqichi “Shayx Zayniddin” jome masjidida 13 nafar otinoyi ishtirokida bo‘lib o‘tdi.

Savollar islomdagi shar’iy hukmlar va O‘zbekiston Respublikasi Konstitutsiyasi asosida tuzilgan bo‘lib, otinoyilarning diniy ilm salohiyatini va huquqiy savodxonligini Toshkent shahar hokimi o‘rinbosari Shuhrat Turdiqulov, O‘MI Toshkent shahar bosh imom xatibi o‘rinbosari Ergashali Rustamov, Toshkent shahar bosh imom xatibining xotin-qizlar masalalari bo‘yicha yordamchisi Dilbar Ataboyeva va malakali huquqshunos mutaxassislar baholab bordilar.

Ko‘rik-tanlov qatnashchilari ishtiroki tumanlarda faoliyat yurituvchi barcha otinoyilar ko‘z o‘ngida odilona baholandi.

Yakuniy xulosalarga ko‘ra, 1-o‘rin sohibasi Yunusobod tumani hudud otinoyisi – Dilorom Karimova, 2-o‘rin sohibasi Mirzo Ulug‘bek tumani hudud otinoyisi – Nasiba To‘raxo‘jayeva va Shayxontohur tumani hudud otinoyisi – Feruza Toshxo‘jayeva,  3-o‘rin sohibasi Yakkasaroy tumani hudud otinoyisi – Sijoat Sharipova deb topildi.

Yuqorida qayd etilgan 4 nafar g‘olib otinoyilar va ishtirok etgan faol otinoyilar diplom va esdalik sovg‘alari bilan taqdirlandilar.

Dilbar Atabayeva,

Toshkent shahar bosh imom xatibining

xotin-qizlar masalalari bo‘yicha yordamchisi