Matbuot xizmati: O‘zbekiston muftiysi ummatning birinchi galdagi vazifasi nima ekanini aytdi
O‘zbekiston musulmonlari idorasi raisi, muftiy Usmonxon Alimov hazratlari Parijda bo‘lib o‘tgan XIV Xalqaro musulmon forumidagi chiqishida musulmon ummatining birinchi navbatdagi vazifasi nima ekanini aytdi. Bu haqda Rossiya musulmonlari kengashi matbuot xizmati xabar bermoqda.
Muftiy hazratning fikriga ko‘ra, hozirda mo‘min-musulmonlar o‘rtasidagi hamkorlikning mustahkamlanishi, o‘zaro muloqotni ta’minlash kabi globallashuvning ijobiy samaralari bilan birga, yovuz kuchlar tomonidan yoshlarni manfur maqsadlarda ishlatish uchun axborot kurashi davom etmoqda.
O‘zbekiston muftiysi o‘z chiqishida yoshlar tarbiyasi musulmon ummatining birinchi galdagi vazifasi ekanini ta’kidlagan holda, yoshlar tarbiyasiga jiddiy e’tibor qilishga katta urg‘u berdi.
Forum doirasida Bahouddin Naqshband tavalludining 700 yilligi nishonlanishi munosabati bilan Usmonxon Alimov hazratlari naqshbandiya tariqati asoschisi o‘z shogirdlariga meros sifatida qoldirgan va o‘zi ham amal qilgan muhim tamoyillarni yodga soldi. Naqshbandiya tariqatining “dil bayor, dast bakor” ta’limoti “qalbing Allohda, qo‘ling ishda bo‘lsin” degan ma’noni anglatishini atroflicha izohladi. Bu musulmon odamning jamiyatning faol a’zosi bo‘lishi bilan birga, qalbi Allohning yodidan bir zum ham xoli bo‘lmasligini ushbu ta’limotda ifoda etilganini muftiy hazratlari alohida qayd etdilar, – deyiladi Rossiya musulmonlari kengashi matbuot xizmati xabarida.
O‘zbekiston musulmonlari idorasi Matbuot xizmati
Buni shukr deb bo‘ladimi?
Behisob pul va boyliklarni chekish-ichish, kayfu safo uchun sarf qilish – Allohga shukr qilishmi?!
Yoshlik davrini zino va harom ishlar bilan o‘tkazish – Allohga shukr qilishmi?!
Telefon orqali o‘zgalarga zarar yetkazish, har xil bo‘lmag‘ur ishlarda foydalanish – Allohga shukr bo‘ladimi?!
Yeguliklarni chiqindi qutisiga tashlash, uvolni bilmaslik – Allohga shukr qilishmi?!
Zakotni o‘z vaqtida ado etmaslik, sadaqadan tiyilish – Allohga shukr qilish deganimi?!
Internetda foydasiz narsalar uchun vaqt ajratish, vaqtni bekorga zoye qilish – Allohning bergan ne’matlariga shukr qilishmi?!
Axir Alloh taolo bizlarga shukr qilishni va U Zotning fazlini e’tirof qilishga buyurgan-ku: «Bas, Meni yod etingiz, (Men ham) sizlarni yod eturman. Menga shukr qilingiz, noshukrchilik qilmangiz!»[1].
Qolaversa, Alloh taolo shukr qiluvchilarni azoblamasligi xabarini ham bergan: «Agar shukr qilsangiz va iymon keltirsangiz, Alloh sizlarni nega azoblasin?! Alloh shukrni qabul etguvchi va bilguvchi Zotdir»[2].
Shukr – Alloh taolo ato etgan ne’matlarning davomli bo‘lishining garovidir: «Yana Parvardigoringiz bildirgan (bu so‘zlar)ni eslangiz: “Qasamki, agar (bergan ne’matlarimga) shukr qilsangiz, albatta, (ularni yanada) ziyoda qilurman. Bordi-yu, noshukrchilik qilsangiz, albatta, azobim (ham) juda qattiqdir”»[3]. «...Agar shukr qilsangiz (va iymon keltirsangiz) U Zot sizlar uchun rozi bo‘lur...»[4].
Bu dunyoda borligimizga shukr qilish – ota-onalarimizga yaxshilik qilishimizdadir. Zero, Rasululloh sollallohu alayhi vasallam: “Allohning roziligi – ota-onaning rizosidadir” [5], deganlar.
Qarindoshchilik munosabatlarini yo‘lga qo‘yish, ular bilan bordi-keldi qilish, uzilgan rishtalarni tiklash ham Alloh bizga qarindosh, yaqinlar bergani ne’matining shukridir. Nabiy alayhissalom bu borada: “Rizqida kengchilik bo‘lishi, ajali ortga surilishi kimni xursand qilsa, qarindoshchilik aloqalarini bog‘lasin”, deganlar[6].
Sadaqa berish – Alloh bizni mol-dunyo bilan siylagani uchun shukr qilish demakdir. Sadaqa Alloh taoloning g‘azabini o‘chiradi. Nabiy alayhissalom: “Maxfiy qilingan sadaqa Yaratganning g‘azabini o‘chiradi. Qarindoshchilik aloqalarini bog‘lash umrni uzaytiradi. Yaxshilik qilish yomon o‘lim topishdan asraydi”, [7] deganlar.
Hasson Shamsiy Poshoning
“Jannat bo‘stonidagi oilaviy oqshomlar” nomli kitobidan
G‘iyosiddin Habibulloh, Ilhom Ohund, Abdulbosit Abdulvohid tarjimasi.
[1] Baqara surasi, 152-oyat.
[2] Niso surasi, 147-oyat.
[3] Ibrohim surasi, 7-oyat.
[4] Zumar surasi, 7-oyat.
[5] Ibn Hibbon rivoyati.
[6] Imom Buxoriy rivoyati.
[7] Imom Tabaroniy rivoyati.