Ona – ajoyib xilqat. Mo‘tabar zot.

Dinimizda onalar e’zozlangan, jannat ularning oyoqlari ostida deb e’lon qilingan.

Ota-onasini rozi qilgan insondan Alloh taolo rozi bo‘lishi aytilgan.

“Kimga yaxshilik qilay?” deb so‘ragan sahobaga Nabiy sollallohu alayhi vasallam uch marta “Onangga!” deb, to‘rtinchisida “Otangga va yaqin qarindoshlaringga!” deya javob berganlar.

Dunyoda bolasini yomon ko‘radigan, unga yomonlik yetishini istaydigan birorta ona yo‘q.

Hech bir ona bolasini qarg‘amaydi. Xafa bo‘lib, achchiqlansa ham, tilining uchida tanbeh berib, urishadi.   

Bolasi jonidan to‘ydirib yuborgan taqdirda ham onaizor qarg‘amaydi. Mabodo bolasining ozorlariga sabr kosasi to‘lib ketganda, bolasini emas, o‘zini so‘kadi. “Seni tug‘may men o‘lay” deydi.

Ha, ona ana shunday mehribon, mushfiqdir.

Qish fasli ham kirib keldi. Sovuq havoda yupun kiyinib yurgan inson shamollab qolishi hech gap emas.  

Onangiz sizga “Bolam, issiq kiyinib ol. Shamollab qolma” desa va ayolingizga qarab, “Qizim o‘g‘limning jemperini, paltosini olib chiqing, kiyib olsin” deganida, “Kiyimim qalin bo‘lib ketadi, qo‘pollashib ketaman, harakatlarim noqulay bo‘ladi. Yosh bola emasman-ku! Shu yaxshi. Sovqotmayman” deb volidangizning istagini yerda qoldirmang!

Mehrga to‘la yuraklarini ezmang!

Qo‘pollashib ketsangiz ham aytgan narsalarini kiyib oling!

Onangiz xursand bo‘lishi uchun kiyib oling!

Harakatlaringizda o‘ng‘aysizlik sezsangiz ham onajoningizning gaplari yerda qolmasin!

Onangiz rozi bo‘lishi uchun qo‘pollashib, qalinlashib ketishga ham rozi bo‘ling!

Ertaga chindan ham havo sovib, o‘sha jemper va paltolarni kiyishga ehtiyojingiz tushganda, istasangiz ham, kutsangiz ham, sog‘insangiz ham “Bolam jemperingni kiyib ol, shamollab qolma” degan ovozni eshitmaysiz.

Hozir boshingizda shunday ovoz sohibasi bor ekan, Alloh taologa ko‘p shukr qilib, issiq kiyinib yuring!

Shu kichik ishni aytganlarida ham “Xo‘p bo‘ladi” deb, ko‘ngillarini ko‘tarib, ko‘plab savob ishlab olishning payidan bo‘ling!

Onasining ovozini eshitishni sog‘inganlar, ammo eshita olmayotganlar qancha!

Alloh taolo ota-onasi hayot bo‘lgan azizlarimizning ota-onalariga uzoq umr, sihat-salomatlik bersin!

Ota-onasi vafot etgan azizlarimizning ota-onalarini rahmatiga olib, oxiratlarini obod aylab, joylarini jannatda qilsin!

Nozimjon Iminjonov