Quyida keltiriladigan fikrlar, hikmatlar ijtimoiy tarmoqlardagi turli sahifalardan olib tarjima qilingan. Bundan tashqari sahobai kiromlar, ulug‘ olimlar, Yaqin Sharq, Osiyo, Yevropa va Amerika mutafakkirlarining bir qator fikrlari ham berilgan. 

*****

Ey Robbim! Mening qaytib borishim O‘zingning huzuringgadir. Meni hidoyatda sobit qilgin, gunohlarimni mag‘firat etgin va xotimamni go‘zal qilgin!

*****

Donishmandlardan biri aytdi: “Onangdan duoni, otangdan nasihatni olgin-da, hayotdagi musibatlar ustidan g‘alaba qozon”.

*****

Umar ibn Xattob roziyallohu anhu qo‘li shol bo‘lgan kishidan unga nima bo‘lganini so‘radilar. U odam “Otam johiliyat paytida meni duoibad qilgan edi. Qo‘lim o‘shandan beri shunday” dedi. Shunda hazrati Umar roziyallohu anhu “Otalarning johiliyat paytidagi duosi shunchalik bo‘lsa, Islomdagi duosi qanday ekan!” dedilar.

*****

Ba’zi odamlarni yo‘qotamiz. Yo‘q, ular vafot etishmagan. Lekin bizning sevgimizga sabab bo‘lgan avvalgi sifatlari o‘lgan.

“Hikmat durdonalari”

*****

Ko‘p aqlga ega bo‘lishing yetarli emas, muhimi o‘sha aqlni o‘z o‘rnida ishlata olishingdir.

“Tarix muhrlagan so‘zlar”

*****

Ne’matlarning yaxshilaridan biri – aqldir.

Musibatlarning yomonlaridan biri – johillikdir.

“Tarix muhrlagan so‘zlar”

*****

Eng mustahkam do‘stlik uchrashishlarning kamligi ham unga ta’sir qilmaydiganidir.

“Tarix muhrlagan so‘zlar”

*****

Oxirida hech kim seni deb yoningda qolmasligini tushunib yetasan. Ko‘pchilik o‘zining hojati miqdoricha yoningda qoladi-da, keyin jo‘navoradi.

“Hikmat durdonalari”

*****

Birorta shaxsga o‘z hajmidan ko‘proq beho berma, tag‘in seni ham bosib o‘tib ketmasin.

Birorta shaxsga o‘z qadridan ozroq baho berma, tag‘in xafa bo‘lib ketib qolmasin.

“Hikmat durdonalari”

*****

Qiyin vaziyatlar odamlarning aslini ko‘rsatib qo‘yadi. Yaxshi deb o‘ylagan insonlaring gumoningni puchga chiqaradi. Ba’zi insonlar esa gumon qilganingdan ham yaxshiroq ekanini ko‘rsatadi.

“Hikmat durdonalari”

*****

Bir a’robiy yonidagi sherigiga g‘azab qildi. Sherigi undan “Nega mendan g‘azablanyapsan?” deb so‘radi. “Ishonchi odamlardan biri menga sen haqingda ba’zi narsalarni aytdi, shunga g‘azablanyapman” dedi. Shunda sherigi bunday dedi: “Agar o‘sha kishi ishonchli bo‘lganda, chaqimchilik qilmagan bo‘lardi”.

“Hikmat durdonalari”

*****

Internet materiallaridan to‘plab, tarjima qiluvchi

 Nozimjon Iminjonov