Yurtimizga qish fasli kelib, havo soviy boshlashi bilan xonadonlarni istitish masalasi o‘rtaga chiqadi.

Hammaning fikri-yodi qishdan eson-omon chiqib olish, shamollamaslik, sovuq qotmaslik bo‘lib qoladi.

Ayniqsa, keksa otaxonu onaxonlar, chaqaloqlar istiqomat qiladigan xonadonlarda bu narsa ancha muhim hisoblanadi.

Qarang, do‘stim, yon qo‘shningiz uyini isitish borasida qo‘li kaltalik qilyapti. Uyida gazi yo‘q. O‘tin yoqib isitiladigan pechkasiga esa o‘tin kerak. O‘tin olishga moddiy imkoniyati yetmaydi. Uning ustiga yosh bolasi ham bor. Sovuq uyda qiynalib o‘tirishibdi. Sizda esa bir mashina yoki bir arava o‘tin olib berishga mablag‘ingiz bor. Faqat sizda o‘sha o‘tinni olib berishga xohish, himmat bo‘lsa bas.

Agar shu masalada yordam bersangiz, qo‘shningiz issiq uyda o‘tiradi. Chaqalog‘i shamollamaydi. Bolalari xursand bo‘ladi. Haqqingizga xonadon ahli duo qilishadi. Bilasizmi, issiq uyda o‘ynab o‘tirgan bolakayning yuzidagi tabassumi, minnatdorligi, ko‘zlaridagi quvonchi sizning ko‘p ajru savob olishingizga sabab bo‘ladi.

Hadisi shariflardan birida “Farz amallardan keyin Alloh taologa eng mahbub amal musulmonning qalbiga xursandchilik kiritishdir” deyilgan.

Tasavvur qilyapsizmi, siz farz amallardan keyingi o‘rinda turuvchi eng buyuk ishni, Alloh taologa yoqadigan ishni amalga oshirgan bo‘lasiz.

Alloh taolo mo‘min bandasining qalbini shodlikka to‘ldirgan kishini quruq qo‘ymaydi.    

Yana bir hadisda “Modomiki banda birodariga yordam berish harakatida yurar ekan, Alloh taolo ham o‘sha bandasiga yordam beradi” deyilgan.

Ha, Alloh taolo sizga yordam beradi. Chunki siz qo‘shningizning og‘irini yengil qilishga, uyini issiqlik va nurga to‘ldirishga urinyapsiz.

Bir holatni tasavvur qilib ko‘ring: siz issiq uyingizda o‘tiribsiz, shu uyda uxlamoqchisiz, ammo yon qo‘shningiz sovuq uyda qaltirab o‘tiribdi, bechora charchagan bo‘lsa ham sovuqning ta’sirida uxlolmayapti. Shunday vaziyatda sizning ko‘zingizga uyqu keladimi?! Kelmaydi, to‘g‘rimi? Axir siz Payg‘ambarimiz sollallohu alayhi vasallamning “Yon qo‘shnisi ochligini bila turib, qorni to‘q holda tunagan kishi menga iymon keltirmabdi” degan hadislarini yaxshi bilganingiz uchun qo‘shningiz och bo‘la turib o‘zingiz to‘q holda, qo‘shningizning uyi sovuq bo‘la turib, siz issiq uyda bemalol uxlolmaysiz. Bunga vijdoningiz yo‘l qo‘ymaydi.

O‘tmishda o‘tgan solih insonlar qo‘shnilaridan xabar olib, ularning hojatlarini ravo qilishga shoshardilar.

Qadrdonim! Biz bir dindosh birodarimiz, qo‘shnimizning ko‘nglini ko‘tara olamiz. Bu ish qo‘limizdan keladi. Qish kunlarida qo‘limizdan kelganicha shu ishlarni bajarib, ulkan savoblarni qo‘lga kiritish payidan bo‘laylik!

Alloh taolo barchamizni qo‘shnisiga yaxshilik qiladiganlardan aylasin!

Nozimjon Iminjonov