“Vaqf: mohiyati va ijtimoiy ahamiyati” mavzusida videoseminar o‘tkazildi
Bugun, 4 dekabr kuni “Vaqf: mohiyati va ijtimoiy ahamiyati” mavzusida diniy soha xodimlari ishtirokida videoseminar o‘tkazildi. Tadbir avvalida Qur’oni karim oyatlaridan o‘qilib, xayrli duolar qilindi.
Seminarda “Vaqf” tushunchasi, istilohiy ma’nolari, vaqf mulklari yuzaga kelishi tarixi va vaqf mulklarining shar’iy hukmlari hamda “Vaqf” xayriya jamoat fondi faoliyatini targ‘ib etish bo‘yicha ma’ruzalar tinglandi.
O‘zbekiston musulmonlari idorasi raisi, muftiy Usmonxon Alimov hazratlari Islom dinida insonlarni doimo mehr-muruvvatli bo‘lishga chaqirilgani, xayru saxovat yoyilgan yurt obod bo‘lishi, qaysi jamiyatda odamlarning qo‘li ochiq bo‘lsa, bunday jamiyat ravnaq topishi, muhtaram Prezidentimiz tashabbuslari bilan tashkil etilgan “Vaqf” fondi oldida ham mana shunday maqsadlar turganini ta’kidladilar. Muftiy hazratlari vaqf tushunchasini keng yoyish va Fond faoliyatini keng targ‘ib etish borasida diniy soha xodimlari oldida turgan vazifalarni birma-bir sanab berdilar.
Din ishlari bo‘yicha qo‘mita raisining birinchi o‘rinbosari Muzaffar Komilov so‘zga chiqib, “Vaqf” fondining mazmun-mohiyatini keng xalq ommasiga to‘liqroq tushuntirish, Fondning rivoj topishiga barcha o‘z hissasini qo‘shishi, infokioskalar faoliyatini kengaytirish va mo‘tabar manbalarda keltirilgan vaqf bobidagi masalalarni bayon qilishga katta e’tibor qaratish zarurligini alohida qayd etdi.
O‘zbekiston musulmonlari idorasi raisi o‘rinbosari Shayx Abdulaziz Mansur hazratlari chamasi 100 yil avval diyorimizda vaqf mulklari amalda bo‘lgani, ota-bobolarimiz bunday mulklarni tasarruf etishgani, bugungi kunda ushbu qadriyat yana qayta tiklangani, bu borada xalqimizga oddiy shaklda ma’lumotlar tarqatish zarurligini taklif etdi. Fatvo bo‘limi mudiri X.Ishmatbekov Islom dinida vaqfga oid hukmlarni bayon qildi. “Vaqf” fondi rahbari Iskandar Xalilov o‘tgan davr mobaynida qilingan xayriya ishlari va kelgusidagi rejalar haqida gapirdi. Toshkent shahri Yunusobod tumani bosh imom-xatibi Rahmatulloh Sayfuddinov vaqf atamasining mazmun-mohiyatini kengroq tushunish kerakligi va Fondning imkoniyatlarini to‘la ishga solish zarurligini bildirdi.
Seminarda Buxoro viloyati bosh imom-xatibi Jobir Elov, Namangan viloyati bosh imom-xatibi Abdulhay Tursunov, Mir Arab oliy madrasasi rektori Haydarxon Yuldashxodjayev, Toshkent shahridagi “Burhoniddin Marg‘iloniy” jome masjidi imom-xatibi Abdulxamid Tursunov o‘z fikr-mulohazalarini bildirdilar. Seminar yakunida “Vaqf” xayriya jamoat fondi faoliyati, bugungi kungacha amalga oshirilgan xayriya ishlari, tadbirlar va loyihalarning amaliy ifodasi aks ettirilgan videorolik namoyish etildi.
O‘qilgan ma’ruzalar haqida saytimizda ma’lumot berib boramiz.
O‘zbekiston musulmonlari idorasi Matbuot xizmati
Anjuman qatnashchilari Islom sivilizatsiyasi markaziga sayohat qilishdi
Xabar berganimizdek, 19-20 avgust kunlari Islom sivilizatsiyasi markazida O‘zbekiston musulmonlari idorasi tasarrufidagi oliy va o‘rta maxsus diniy ta’lim muassasalari professor-o‘qituvchilarining «Zamonaviy diniy ta’lim: pedagogika, ilm-ma’rifat va innovatsiya» nomli I ilmiy-amaliy anjumani bo‘lib o‘tmoqda.
Bugun, 19 avgust kuni ishtirokchilar kutib olinib, ularning Islom sivilizatsiyasi markaziga sayohati tashkil etildi. Tashrif davomida mehmonlar markazning boy ekspozitsiyalari, Qur’oni karim zali, nodir qo‘lyozmalar hamda buyuk ajdodlarimizning ilmiy merosiga bag‘ishlangan bo‘limlar bilan yaqindan tanishdi. Ayniqsa, zamonaviy multimedia loyihalari va tarixiy eksponatlar ularda chuqur taassurot qoldirdi.
Ustozlar Markazda amalga oshirilayotgan keng ko‘lamli ishlar islom ma’rifatini targ‘ib qilish hamda yosh avlodni milliy-diniy qadriyatlarga hurmat ruhida tarbiyalashda muhim ahamiyat kasb etishini e’tirof etishdi.
Shuningdek, ishtirokchilar O‘zbekiston musulmonlari idorasida ham bo‘lishdi. Hazrati Imom majmuasidagi tarixiy qadamjo va obidalarni ziyorat qilishdi.
Oqshomda Islom sivilizatsiyasi markazi binosida ma’rifiy dastur – mapping namoyish qilindi.
Mazkur tadbirlar islom sivilizatsiyasi merosini targ‘ib etish, diniy ta’lim tizimini yanada takomillashtirib, yangi bosqichga olib chiqishda salmoqli hissa bo‘lib qo‘shiladi.
O‘zbekiston musulmonlari idorasi Matbuot xizmati
- «
- »