Bugungi kunda mamlakatimiz rahbarining kechirimlilik siyosati natijasi o‘laroq turli diniy ekstremistik oqimlarga adashib kirib qolgan va hozirda o‘z aybini tushunib yetgan holda Prezidentimiz avfi bilan oilasi bag‘riga qaytarilgan fuqarolarni ijtimoiy moslashuvi masalasi muhim omilga aylandi. Ularni jamiyatda o‘z o‘rnini topishiga ko‘maklashishda barcha mutasaddilar o‘z ko‘magini ko‘rsatmoqda. Biroq bir necha yildan buyon Haj ziyoratini ado etish uchun navbatda turgan fuqarolarning ko‘makka muxtoj kishilar taqdiriga qarab turmay yordam berishlari tahsinga sazovor. Shunday ko‘mak 7 yil ozodlikdan mahrum etilgan Sherzodbekka ko‘rsatildi.
Jahon iqtisodiyoti va diplomatiya universitetidagi o‘qishidan ajralgan, bir kasbning boshini ham tuta olmagan talaba, adashib diniy oqimlarga qo‘shilib qolgan. O‘zbekistonning nufuzli universitetida tahsil olgan va keyinchalik ozodlikdan mahrum etilgan Sherzodbek Toshkent shahar hokimligining jamoat va diniy tashkilotlar bilan aloqalar bo‘limi tavsiyasi va yordami bilan o‘qishi tiklandi.
O‘zA nashrining ma’lum qilishicha, uning 22 million so‘m miqdoridagi shartnoma pulini Haj safariga bir necha yillardan buyon navbat kutayotgan keksa yoshli fuqarolarimizdan biri to‘lab berdi. Natijada Sherzod o‘z sevgan yo‘nalishida o‘qishini tiklashga erishdi. Unda ertangi kuniga umid paydo bo‘ldi. U hozirda tahsilni davom ettirib, kelajak uchun rejalar tuzmoqda.
Bundan tashqari, Davron aka ham salkam 19 yil panjara ortida o‘tirib, ozodlikka chiqdi. Qamalgan vaqtida endigina atak-chechak qilib yura boshlagan farzandlari bugun oila quray demoqda. O‘g‘ilni uylash, qizni uzatish kerak. Ammo, Davron akaning ham na hunari va puli bor. Ustiga ustak ozodlikdan mahrum bo‘lgan davrida sog‘lig‘i bo‘yicha ham muammolar orttirgan edi. Ammo yurtimizda yaxshi odamlar ko‘p ekan Haj ziyorati orzusida bo‘lgan yoshi ulug‘ fuqarolarimizdan biri yordam unga qo‘lini cho‘zdi. Davron kasalxonada yotib davolandi, haydovchilik kurslarida o‘qidi. Endilikda ko‘zida jarrohlik operatsiyalarini o‘tkazilishi kutilmoqda.
Jazo muddatlarini o‘tab qaytgan birgina fuqaroni ham hunarli, ishli bo‘lishi, sog‘lig‘ini tiklanishi jamiyatimiz uchun katta foyda. Ayniqsa, adashib bizga begona bo‘lgan g‘oyalar tasiriga tushib qolgan fuqarolarni yana jamiyatga qaytishga yordam berish ularni chetlatib qo‘ymaslik juda muhim. Prezidentimiz aynan shunday manfur g‘oyalar ta’sirida jamiyatimizdan uzoqlashgan kimsalarni oramizga qaytarib, ularga to‘g‘ri yo‘lni ko‘rsatib, hayotda o‘z o‘rnini topishga yordam ko‘rsatgan fuqarolarimiz birinchilardan bo‘lib, Haj ziyoratiga borishga loyiq ekanligini ta’kidlagan edilar.
Bugun bu usul samara bermoqda. Haj ziyorati orzusida navbat kutayotgan fuqarolarimiz ko‘pgina noilojlikda qolgan hamyurtlarimizga yordam qilmoqda. Jamiyatda na ishi, na hunari va na puli bo‘lgan norozi fuqarolarning ko‘payishi yana jiddiyroq muammolarni keltirib chiqarishi aniq. Toshkent shahar hokimligining jamoat va diniy tashkilotlar bilan aloqalar majmuasi tomonidan olib borilayotgan ishlar esa rosmana ijobiy natija bermoqda. Yordam qilganlar ham, undan foyda ko‘rganlar ham minnatdor.
Imkon bo‘lsa uzoq muddat qamoq jazosini o‘tab qaytgan fuqarolarning har biriga shunday yordam ko‘rsatilishi va ularning o‘z hayot yo‘lini tiklashga ko‘mak bo‘lish kerak.
O‘zbekiston musulmonlari idorasi Matbuot xizmati
Kecha, 28 aprel kuni O‘zbekiston musulmonlari idorasi raisi, muftiy Shayx Nuriddin Xoliqnazar hazratlari ishtiroklarida “Haj – 2025” mavsumini yuqori darajada o‘tkazish bo‘yicha videoselektor yig‘ilishi bo‘lib o‘tdi. Unda haj delegatsiyasi vakillari, ishchi guruhi a’zolari, mingboshilar va shifokorlar jamoasi ishtirok etdi.
Majlis avvalida Muftiy hazratlari haj qiluvchi inson Haq taoloning mehmoni ekani, shu bois haj amalini bajarayotgan kishiga ko‘mak bergan, uning og‘irini yengil qilgan inson ulug‘ ajru savoblarga noil bo‘lishi haqida so‘zladilar. Shuningdek, har bir ishchi guruhi a’zosi ana shunday ulug‘ darajalarni maqsad qilib, Rahmonning mehmonlariga O‘zi rozi bo‘ladigan darajada sidqidildan xizmat qilishi lozimligini alohida qayd etdilar.
Shayx Nuriddin Xoliqnazar hazratlari yig‘ilish davomida muborak safarga qadar ziyoratchilar bilan muntazam suhbatlar tashkil etish va ularda hajning tartib-qoidalari, farz, vojib va sunnatlari, o‘ziga xos mashaqqatlarini tushuntirish va zikru duolar qilish va yurtdoshlarimizning barcha savollariga batafsil javob berish zarurligini ta’kidladilar. Shuningdek, muborak zaminlarda har bir daqiqani g‘animat bilish, toatu ibodat ila o‘tkazish masalalariga alohida e’tibor qilishga urg‘u qaratdilar.
O‘zbekiston musulmonlari idorasi raisi o‘rinbosari Obidjon Qodirov, Din ishlari bo‘yicha qo‘mita Ziyorat turizmini rivojlantirish bo‘limi boshlig‘i Bobomurod Rustamov va Shifokorlar guruhi rahbari Alisher Saatov kabilar so‘zga chiqib, tashkiliy ishlar, tibbiy jihatlar, xat-hujjatlar, jamoaviy tartib-intizomga rioya etish, qonun-qoidalarga amal qilish, hojilar xavfsizlini ta’minlash va ogohlikga oid muhim tavsiyalarni berdilar.
Shuningdek, joriy mavsumda “Haj – 2025” ishchi guruhi va shifokorlar zimmasiga juda katta mas’uliyat yuklangani, shu bois har kim o‘z vazifasini vijdonan to‘la bajarishi zarurligi ta’kidlandi.
Tadbir yakunida Haq taolodan bu yilgi haj mavsumi muvaffaqiyatli o‘tishini so‘rab xayrli duolar qilindi.
O‘zbekiston musulmonlari idorasi Matbuot xizmati