O‘tganlarni yaxshi sifatlar ila eslashlik, ularning qo‘nim topgan joylarini obod qilishlik dinimiz ko‘rsatmalaridan biri hisoblanadi.
Shu kunlarda viloyatimiz bo‘ylab ulkan bunyodkorlik va obodonchilik ishlari jadal suratda olib borilmoqda. Shahrimiz ko‘rkiga yanada ko‘rk qo‘shilmoqda. Ko‘chalarimiz yanada nurafshon, yo‘llarimiz esa tekis-ravon etilmoqda. Ushbu bunyodkorlik ishlari ko‘lamida esa viloyatimizdagi qabristonlar ham yanada obod etilmoqda. O‘tganlar qo‘nim topgan maskanlarda obodonlashtirish, ko‘kalamzorlashtirish ishlari jadal suratda amalga oshirilmoqda. Buning misolida viloyatimizning Izboskan tumanidagi qabristonlarni ko‘rishimiz mumkin. Shu kunlarda tumandagi markaziy qabristonida obodonlashtirish ishlari jadal suratda olib borilmoqda. Qabr chetlari g‘ishlar bilan o‘ralib, begona o‘t-o‘lanlardan tozalanmoqda. Qabrlar oralariga maxsus yo‘laklar qilinmoqda. Ziyoratchilar uchun alohida sharoitlar, qabriston ishchilari uchun xizmat xonalari barpo etilmoqda.
Viloyat bosh imom-xatibi Nuriddin domla Xoliqnazarov joriy yilning 14-noyabr kuni ushbu maskanga tashrif buyurib, u yerda olib borilayotgan ishlar bilan yaqindan tanishdilar. Qabristonlarning obodonlashtirishda nimalarga ahamiyat berish kerakligi haqida o‘zining ko‘rsatmalarini berib o‘tdilar.
Manashunday obodonlashtirish ishlari viloyatimizdagi qabristonlarida yana davom ettirilmoqda.

O‘MI Andijon viloyati vakilligi xodimi N.Qodirov