Aqida – e'tiqod masalasi dinimizning o'zagi hisoblanadi. Barcha amallarimizu ibodatlarimizning Alloh huzurida qabul bo'lishi aynan e'tiqodimizning to'g'riligiga bog'liqdir. Agar aqida noto'g'ri yoki buzuq bo'lsa, Alloh saqlasin, amallarning qabul bo'lishini umid qilmasa ham bo'laveradi.

     Diniy e'tiqod mustahkam aqida ustiga qurilmas ekan, uning natijasi zalolatdan boshqa narsa bo'lmaydi.

    Farzandlarimizning imon-e'tiqodi borasida Oxiratda – Alloh taoloning huzurida mas'ulmiz! Alloh taolo har bir mo'minga xitob qilib, shunday buyurgan:

ya'ni: “Ey, imon keltirganlar! O'zlaringizni va oila a'zolaringizni yoqilg'isi odamlar va toshlar bo'lmish do'zaxdan saqlangizki, unda dag'al va qattiqqo'l, Alloh buyurgan narsaga itoatsizlik qilmaydigan, faqat buyurilgan ishni qiladigan farishtalar (xizmat qilurlar)” (Tahrim surasi 6-oyat).

     Kishi o'zini va oila a'zolarini do'zaxdan saqlashi – eng avvalo sog'lom va mustahkam e'tiqod bilan bo'ladi. Alloh taologa shirk keltirgan yoki imonida shubhada bo'lgan kimsa Oxirat diyorida najot topolmaydi.

   Shunday ekan, o'zimiz dinda bilishimiz va e'tiqod qilishimiz zarur bo'lgan ilmlarni o'rganib, farzandlarimiz va ahli oilamizga o'rgatishimiz lozim! Farzandlarimiz qalbida Islom aqidasini mustahkam singdirishimiz darkor! Mana shunda ularga turli xurujlar ta'sir qilolmaydi. Kelajak avlodimiz uchun xatarga aylanayotgan – missionerlik, dahriylik, besunnatlik (hadisni inkor qiluvchilar) kabi toifa tarafdorlarining qarashlari va shubhalari ularni yo'ldan ozdirolmaydi!

    Hozirda aqidamizni o'rganish uchun barcha sharoitlar mavjud. Hususan Imom Moturidiy rahmatullohi alayh tartibga solgan – Ahli sunna val jamoa e'tiqodi bo'yicha ko'plab kitoblar yozildi, tarjimalar qilib, nashr etildi. Allohga hamdlar bo'lsinki, ushbu ishlar ulamolarimiz tomonidan izchil davom ettirilmoqda.

    Qolaversa, O'zbekiston musulmonlari idorasi tomonidan aqida ilmi bo'yicha yurtimizdagi ishonchli ulamolarning silsilaviy darslari ijtimoiy tarmoqlar orqali joylab borilmoqda. Bizga ushbu darslarni tinglash yoki yozilgan asarlarni oila davrasida o'rganishimiz qoldi xolos.

Sog'lom e'tiqodni oyoqosti qiladigan va muqaddas dinimizni o'z manfaati yo'lida qurol qilib olgan kimsalar borligi bugun barchamizni tashvishga solmoqda.Ma'lumki, aqidaparast va buzg'unchi kuchlar xalq ruxiyatini ichdan emirib, halokatga boshlaydi. Jamiyatning hamjixatligini buzadi, xalqni jar yoqasiga olib boradi. Diniy tushunchalardan ustalik bilan foydalanib,odamlarga uning asl mohiyatini buzib ko'rsatadi. Shuningdek xalqning ishonuvchanligidan foydalanib, ommani norozilik kayfiyatida tarbiyalaydi. Yoshlarni esa aldov yo'li bilan o'zining jirkanch quroliga aylantirib, juvonmarg qiladi.

Internet ayniqsa, yoshlarni sog'lom e'tiqodiga tajovuz qiluvchi manbalar makonidir. U erda o'zlarini “do'st sanovchi” yoki “hidoyatga boshlovchi” qilib ko'rsatuvchilar ko'p. Aslida ularning din ilmidan xabarlari yo'q. O'z rahnamolaridan eshitganlarini takrorlashdan nariga o'tmaydilar. Ular o'z johilliklari bilan boshqalarni ham jarga etaklaydilar.

Abdulloh ibn Muborak (rahimahulloh): “Din-bu ilmdir, uni kimdan olayotganlaringizga qarang ”, - degan.

E'tiqod ilmini yaxshi bilmasligi bois insonning aqidasi noqis bo'lib qoladi.Islom dini ta'limotiga ko'ra, agar aqida buzuq, e'tiqod botil bo'lsa, kishining amali behuda ketadi va o'zi zalolat botqog'iga botadi.

Qaysi jamiyatda kishilar e'tiqodi sof bo'lsa, o'sha joyda tinchlik mustahkam bo'ladi.Aksincha, buzuq e'tiqodli kishilardan-da xavfli odam bo'lmaydi, undaylar har qanday pastkashlikka tayyor turadi.

Alloh taolo barchalarimizni O'zi rozi bo'lgan haq yo'lida bo'lishimizga muvaffaq etib, aqidada adashishdan, turli firqalarga bo'linishdan panohida asrasin!

Internet manbalari asosida
Yangiyo'l tuman “Imom   Sulton” jome masjidi imom xatibi
Odiljon Narzullayevtayyorladi