Umra ziyoratiga jo‘nab ketgan yurtdoshlarimiz mamnun
O‘tgan kunlarda bir guruh o‘zbekistonlik ziyoratchilar Umra ziyoratini ado etish uchun Saudiya Arabistoniga jo‘nab ketgan edilar. O‘zbekistondan Umra amallarini ado etish niyatida muborak zaminga yetib borgan fuqarolarimiz Makkai Mukarramadagi 4 yulduzli Al Kiswah Hotel Towers va Madinai Munavvaradagi 5 yulduzli Pullman Zamzam Madina Hotel mehmonxonalariga joylashtirildi.
Madina shahridagi ishchi guruhi a’zosi Muzaffar Kamolovning bildirishicha, bu yil ziyoratchilarimizga Madinai munavvarada 5 yulduzli, zamonaviy va osmono‘par mehmonxona o‘zbekistonlik ziyoratchilar xizmatida bo‘lmoqda. Ushbu mehmonxona Masjidi Nabaviyning shundoqqina yonginasida joylashgan, ziyoratchilarimiz besh mahal namozlarini ushbu tabarruk masjidda ado etish saodatiga yetishmoqdalar. Ayni kunda, ziyoratchilar ibodatlarini chiroyli va mukammal ado etishlari uchun mehmonxonada barcha shart-sharoitlar muhayyo qilingan. Ushbu qo‘nimgoh juda ham hashamatli bo‘lib, Madina shahrining uzoq-uzoq chekkalaridan ham ko‘rinib turadi.
Mehmonxonaning keng zali kishi diqqatini o‘ziga tortadi. U yerda yangi, qulay o‘rindiqlar joylashtirilgan bo‘lib, ko‘chadan charchab kelgan odam uchun salqinlanib olishga mo‘ljallangan.
Ziyoratchi o‘z xonasiga ko‘tarilmoqchi bo‘lsa, bir nechta liftlar ishlamoqda. Har bir xonada ozoda ko‘rpa-yu choyshablar to‘shab qo‘yilgan. Xonadagi televizor orqali Ka’bai muazzama yoki Masjidun Nabaviyni to‘g‘ridan to‘g‘ri tomosha qilib o‘tirishlari mumkin. Shuningdek, har bir xonada kiyim javoni, yozuv stoli, sovutgich va muzlatgich ham hozirlangan.
Ishchi guruhi tomonidan mehmonxonada tibbiyot bo‘limi va O‘zbekiston Ishchi guruhi shtabi tashkil etilgan bo‘lib, tibbiyot bo‘limi ham kerakli o‘rindiq va yotoq mebellari bilan ta’minlangan. Shuningdek, ziyoratchilarimizga o‘zimizning oshpazlar tomonidan tayyorlangan laziz va milliy tamolarni tortiq qilinmoqda.
Bir so‘z bilan aytgan-da, bu yil oldingi yillardan farqli o‘laroq ziyoratchilarimizga barcha shart-sharoitlar va qulayliklar eng yuqori darajada muhayyo qilingan, faqat ziyoratchilarimiz u yerga borib joylashgach, shart-sharoitlar shukronasini qilib, ibodat halovatini totib, muhtaram Prezidentimiz, xalqimiz va farzandu arjumandlarimiz haqiga duoi xayrlar qilishlari qoldi, bu esa, naqadar ulkan baxt!
O‘zbekiston musulmonlari idorasi Matbuot xizmati
Mehr-saxovat va inson qadri — ezgulikka yo‘g‘rilgan xayrli tashabbus
Insonga mehr ko‘rsatish, muhtojning holidan xabar olish, bemorga tasalli berish va ehtiyojmandlarga ko‘mak qo‘lini cho‘zish xalqimiz ma’naviyatining azaliy fazilatlaridandir. Islom ta’limotida ham saxovat, mehr-oqibat va inson qadrini ulug‘lash eng ulug‘ amallardan biri sifatida e’tirof etilgan. Chunki bir insonning ko‘nglini ko‘tarish, uning qalbiga umid va ishonch bag‘ishlash jamiyatda mehr-muhabbat, hamjihatlik va totuvlikni mustahkamlaydi.
Shu ezgu qadriyatlarni hayotga tatbiq etish, aholining ehtiyojmand qatlamlarini qo‘llab-quvvatlash va yurtdoshlarimiz qalbida mehr-shafqat tuyg‘ularini yanada kuchaytirish maqsadida 2026 yil 13 avgust kuni Samarqand viloyati Urgut tumanida keng ko‘lamli ma’naviy-ma’rifiy hamda xayr-saxovat tadbirlari o‘tkazildi.
Mazkur xayrli tadbirlarda Samarqand viloyati bosh imom-xatibi vazifasini vaqtincha bajaruvchi Nursultonxon domla Abdumannonov, viloyat bosh imom-xatibi o‘rinbosari Xayrullo domla Sattarov, VAQF xayriya jamoat fondi Samarqand viloyati filiali rahbari Yoqubjon domla Mansurov, uning o‘rinbosari A.Sultonov, shahar va tuman bosh imom-xatiblari, «Haj–2026» ziyoratchilari, mahalla faollari va nuroniylar ishtirok etdilar.
O‘zbekiston Respublikasi davlat mustaqilligining 35 yilligi munosabati bilan o‘tkazilgan ushbu xayrli aksiya doirasida ijtimoiy himoyaga muhtoj, kam ta’minlangan va boquvchisidan ayrilgan 300 ta oila holidan xabar olindi. Ularning xonadonlariga tashrif buyurilib, turmush sharoitlari o‘rganildi, oilalarga zarur oziq-ovqat mahsulotlari yetkazib berildi.
Tashriflar davomida bemor va keksalarning holidan xabar olinib, ular bilan samimiy suhbatlar o‘tkazildi. Ularning haqqiga shifo, xonadonlariga fayzu baraka, yurtimizga tinchlik-xotirjamlik tilab duolar qilindi. Zero, muhtojning ko‘nglini ko‘tarish va uni yolg‘iz emasligini his ettirish ham insonparvarlikning yuksak ko‘rinishidir.
Shu bilan birga, hayotida turli ijtimoiy qiyinchiliklarga duch kelgan hamda yot g‘oyalar ta’siriga tushib qolish xavfi mavjud bo‘lgan ayrim fuqarolar bilan yakka tartibda muloqotlar tashkil etildi. Suhbatlarda sof e’tiqod, oila muqaddasligi, farzand tarbiyasi, halol mehnat, Vatanga sadoqat, milliy va diniy qadriyatlarga hurmat, shuningdek, turli buzg‘unchi g‘oyalarga nisbatan ma’naviy immunitetni mustahkamlash masalalari hayotiy misollar asosida tushuntirildi.
Tadbirlar doirasida Urgut tumanidagi jome masjidlarda peshin namozidan so‘ng ma’naviy-ma’rifiy uchrashuvlar ham o‘tkazildi. Ularda mehr-oqibat, qo‘ni-qo‘shnichilik munosabatlarini mustahkamlash, yoshlarni milliy va diniy qadriyatlarga sodiqlik ruhida tarbiyalash, oila tinchligini asrash, jamiyatda o‘zaro hurmat va ahillik muhitini qaror toptirish kabi dolzarb mavzular atroflicha yoritildi.
Uchrashuvlar yakunida mamlakatimiz tinchligi, xalqimiz farovonligi, Vatanimiz ravnaqi va yosh avlodning ilmli, odobli hamda vatanparvar insonlar bo‘lib voyaga yetishi haqida xayrli duolar qilindi.
Bugun yurtimizda inson qadrini ulug‘lash, aholining ehtiyojmand qatlamlarini har tomonlama qo‘llab-quvvatlash, jamiyatda mehr-saxovat va o‘zaro g‘amxo‘rlik muhitini qaror toptirishga alohida e’tibor qaratilmoqda. Urgut tumanida o‘tkazilgan mazkur xayrli tadbirlar ham ana shu ezgu maqsadlarga xizmat qilib, aholi o‘rtasida hamjihatlik, bag‘rikenglik va insonparvarlik tuyg‘ularini yanada mustahkamladi.
Mehr bor joyda ishonch, saxovat bor joyda baraka, inson qadri ulug‘langan jamiyatda esa tinchlik va farovonlik qaror topadi. Ana shunday ezgu amallar xalqimiz o‘rtasidagi birdamlik rishtalarini mustahkamlab, yurtimizning yanada obod va fayzli bo‘lishiga xizmat qiladi.
Samarqand viloyati vakilligi matbuot xizmati
