Pokiston ulamolarining Mir Arab oliy madrasasiga tashrifi
Joriy yilning 17 oktyabr kuni Pokiston Islom Respublikasi muftiysi Muhammad Rizvan rahbarligidagi “Naqshbandiya” tariqati vakillaridan iborat delegatsiya Bahouddin Naqshband ziyoratgohiga tashrif buyurdi.
Delegatsiya tarkibida jami 47 nafar Pokiston Islom Respublikasi ulamolari, jumladan, Shayx Muhammad Abdulhalim an-No‘maniy,
Shayx qozi Arshad al-Husayniy, Lohurdagi “Muhammadiya” universiteti mudiri Shayx Muhammad Hasan, Faysaloboddagi “Imdodiya” universiteti mudiri Shayx Muhammad Toyyib, “Miftahul-ulum” universiteti mudiri Shayx Muftiy Tohir Mas’ud, Muhammad Aslam Naqshbandiy va boshqalar bo‘lib, ularga Pokiston Islom Respublikasi muftiysi Muhammad Rizvan rahbarlik qildi.
Mehmonlarga safar davomida Mir Arab oliy madrasasi ustoz
hamda talabalari hamrohlik qildi.
Ziyoratdan so‘ng Bahouddin Naqshband yodgorlik majmuasi markazining konferensiya zalida Pokiston Islom Respublikasi delegatsiyasi va Mir Arab oliy madrasasi ustoz hamda talabalari ishtirokida uchrashuv o‘tkazildi.
Uchrashuvda O‘zbekiston va Pokiston davlatlari o‘rtasida do‘stona munosabatlar yaxshilangani, xususan, Prezidentimiz Sh.Mirziyoyev tashabbusi bilan ikki tomonlama aloqalar yangi bosqichga ko‘tarilib, mazkur delegatsiya uchun ham qulayliklar ta’minlangani, O‘zbekiston ulamolarining islom dini ta’limoti rivojiga qo‘shgan buyuk hissalari, o‘tgan ulug‘ avliyolar, ustozlar haqida ijobiy fikrlar bildirildi.
Uchrashuv davomida o‘tganlar ruhini shod etish maqsadida Qur’on tilovat qilinib, yurtimiz haqiga duoyi xayrlar qilindi.
Tadbir yakunida delegatsiya vakillari Mir Arab oliy madrasasi ustozlariga faxriy yorliq va esdalik sovg‘alarini topshirdilar.
O‘MI Matbuot xizmati
Saudiya Arabistonida o‘tkazilayotgan xalqaro Qur’on tanlovida 133 davlat vakillari ishtirok etmoqda
Qirol Abdulaziz nomidagi Qur’oni karimni yod olish, o‘qish va sharhlash bo‘yicha qirq oltinchi xalqaro tanlovning saralash bosqichi 7 avgust kuni Makka shahridagi musobaqalar o‘tkaziladigan joyda 133 davlatdan 334 nafar ishtirokchi (erkak va ayollar) ishtirokida boshlandi.
IQNA "Minbar" gazetasiga tayanib xabar berishicha, Qirol Abdulaziz nomidagi Qur’oni karimni yod olish, o‘qish va sharhlash bo‘yicha qirq oltinchi xalqaro tanlovning saralash bosqichi bir kun avval Makkadagi musobaqalar o‘tkaziladigan joyda boshlangan va final bosqichini Masjidul Haromda o‘tkazish uchun zamin tayyorlagan.
Saudiya Arabistoni Islom ishlari, da’vat va hidoyat vazirligi tomonidan tashkil etilgan ushbu tadbirning saralash bosqichida hakamlar hay’atlari eng yuqori aniqlik va shaffoflik standartlariga rioya qilgan holda, Qur’on tilovati uslublari va qoidalariga ixtisoslashgan taniqli xalqaro hakamlar guruhi nazorati ostida erkak va ayol ishtirokchilarning chiqishlarini tinglab, final bosqichiga kimlar o‘tishini aniqladi.
Tanlovning joriy bosqichi 133 mamlakatdan 334 nafar ishtirokchi (erkak va ayollar) ishtirokida o‘tkazilmoqda, ular besh toifa: "Shatibiya" usuli bo‘yicha yetti xil qiroat asosida Qur’oni Karimni to‘liq yodlash (qiroat va nazariy bilimlarni, shuningdek, tajvid qoidalarini a’lo darajada bajarish va rioya qilishni o‘z ichiga oladi); a’lo darajada ijro etish, tajvidga rioya qilish va so‘zlarni sharhlash bilan Qur’oni Karimni to‘liq yodlash; a’lo darajada ijro etish va tajvidga rioya qilish bilan Qur’oni Karimni to‘liq yodlash; a’lo darajada ijro etish va tajvidga rioya qilish bilan ketma-ket o‘n beshta juzni yodlash; a’lo darajada ijro etish va tajvidga rioya qilish bilan ketma-ket beshta juzni yodlash bo‘yicha bellashmoqda.
Vazirlik ushbu global qur’oniy tadbirning muvaffaqiyatini ta’minlash uchun elektron hakamlik tizimini joriy etish, ishtirokchilarni baholashda adolat va aniqlikni ta’minlash uchun tashkiliy va keng qamrovli platformani yaratish, shuningdek, ularga turli xil xizmatlarni taqdim etish kabi barcha imkoniyatlarini ishga solishda davom etadi.
Qirol Abdulaziz nomidagi xalqaro musobaqa dunyodagi eng yirik Qur’on musobaqalaridan biri hisoblanib, uning umumiy pul mukofotlari miqdori 10 million saudiya rialidan oshadi.
Mazkur musobaqada O‘zbekiston sharafini "Mir Arab" o‘rta maxsus islom ta’lim muassasasi, "Sayyid Muhiddin maxdum" o‘rta maxsus islom ta’lim muassasasi, Imom Buxoriy nomidagi Toshkent islom instituti hamda "Xadichai Kubro" qizlar o‘rta maxsus islom bilim yurti talabalari himoya qilishi haqida avval xabar berilgan edi.
O‘zbekiston musulmonlari idorasi Matbuot xizmati
