Bugun, 17 oktyabr kuni “O‘zbekiston Qur’on musobaqasi-2018” Respublika bosqichi 18-25 yoshlilar o‘rtasidagi hifz yo‘nalishi 1-o‘rin sohibi, Andijon shahridagi “Sayyid Muhyiddin maxdum” islom bilim yurti talabasi Muhammadiso qori Mahmudov shu yilning 18-21 oktyabr kunlari Qur’oni karimni tajvid qoidasi bilan yoddan o‘qib berish bo‘yicha Rossiya Federatsiyasida o‘tkaziladigan XIX Xalqaro Qur’oni karim musobaqasida ishtirok etish uchun Moskva shahriga jo‘nab ketadi.

Ma’lumotlarga ko‘ra, mazkur musobaqaning tashkilotchisi Rossiya musulmonlari diniy idorasi va Rossiya muftiylari kengashidir. Musobaqaning final bosqichida butun dunyodan 30 nafardan ortiq qorilar ishtirok etadi.

Shu yilning 21 oktyabr kuni Moskvadagi Crocus City Hall konsert zalida Qur’on bayrami o‘tkaziladi. Bayram tadbirida XIX xalqaro Qur’oni karim musobaqasining final bosqichi bo‘lishi aytilmoqda. Bu haqda Islam-today nashri xabar berdi. Shuningdek Qur’on bayrami mehmonlari turli ijodiy jamoalar chiqishlarini, mahorat darslarini, ko‘rgazmalarni, trening va bolalar shaharchalarini tomosha qilishlari mumkin bo‘lishi qayd etilgan.

Xalqaro aloqalar bo‘limi