gulf-times.com nashrining bergan ma’lumotlariga ko‘ra Markaziy Osiyo mamlakatlari, jumladan, Qozog‘iston va O‘zbekistonda Islom moliya tizimi katta qadamlar bilan rivojlanmoqda. Xalqaro banku tizimlarini o‘ziga jalb qilayotgan mintaqada xususiy banklar, kapital bozorini rivojlantirish va moliyaviy texnologiyalarni joriy etishga imkon yaratilgan.

O‘zbekistonning Yaqin Sharq va Janubi-sharqiy Osiyo islomiy investorlariga o‘z eshiklarini ochishi jarayoni Islom taraqqiyot bankining ko‘magida amalga oshirilmoqda.

Islom taraqqiyot banki tomonidan O‘zbekiston hukumatiga 1,3 milliard AQSH dollari miqdoridagi shariy moliya tizimini joriy etish, infrastrukturani modernizatsiya qilish, xususiy sektorni qo‘llab-quvvatlash maqsadida kredit ajratgani sohani rivojlantirishda muhim ahamiyatga ega bo‘ldi.

Halol jamg‘armalash va mikromoliyalashni o‘z ichiga oluvchi islomiy moliya vositalarini joriy etishda hamkorlik yo‘lga qo‘yilgan. Shariat asosidagi kreditlash tizimi O‘zbekistondagi 6 ta bankda yo‘lga qo‘yilish arafasida. Ular Asaka bank, O‘zSQB, Turonbank, Hamkorbank, Kapitalbank va Asia Alliance Bank lar ekani aytib o‘tilgan. Trustbank va InFinBank tomonidan ham ushbu yo‘nalishda hamkorlikni amalga oshirish harakatlari yo‘lga qo‘yilgan.

Qirg‘izistonda ham bir qator islomiy moliya va bank xizmatlari yo‘lga qo‘yilgan. Bahraynning Al Baraka Bank Group tashkiloti Bishkekda joylashgan BTA Bank bilan hamkorlikni yo‘lga qo‘ygan.

Islomiy moliya xizmatlari Rossiyada ancha oldin yo‘lga qo‘yilgan bo‘lsada islomiy banklarning faoliyatida rivojlanish kuzatilmagan. Bunga sabab sifatida esa banklarning likvidligi masalasi qayd etilgan.

O‘MI Matbuot xizmati