Namanganda “Eng ma’rifatli imom” tanlovining viloyat bosqichi o‘tkazildi
Har yili O‘zbekiston musulmonlari idorasi tasarrufidagi masjidlar imom-xatib va imom-noiblari o‘rtasida an’anaviy tarzda “Yil imomi” ko‘rik tanlovi o‘tkazib kelinar edi. Joriy yildan esa mazkur tanlov O‘zbekiston musulmonlari idorasining 2018 yil 10 sentyabrdagi 01/A092-sonli buyrug‘i asosida “Eng ma’rifatli imom” nomi ostida yangi Nizom asosida o‘tkazildi.
Tanlovning maqsadi – bugungi taraqqiyot talablariga javob beradigan, kuchli ilmiy salohiyatga ega, yuqori kasbiy mahorat sohibi bo‘lgan, tashabbuskor, ilg‘or fikrli, innovatsion g‘oyalar muallifi, zamonaviy axborot texnologiyalaridan yetarlicha foydalana oladigan va keng xalq ommasiga o‘z fikrini yetkazish qobiliyatiga ega bo‘lgan eng iqtidorli, faol imom-xatiblarni aniqlash va qo‘llab-quvvatlashdan iboratdir.
Uch bosqichda o‘tkazilishi belgilangan tanlovning birinchi shahar-tuman bosqichi g‘oliblari 15 oktyabr kuni Namangan shahridagi “Yahyoxon to‘ra” jome masjidida o‘tkazilgan viloyat bosqichida o‘zaro bellashdilar.
Tanlov Qur’oni karim tilovati bilan boshlandi. O‘zbekiston musulmonlari idorasining Namangan viloyat vakili, viloyat bosh imom-xatibi Abdulhay Tursunov so‘zga chiqdi. U joriy yilgi tanlov O‘zbekiston Respublikasi Prezidentining 16 apreldagi “Diniy-ma’rifiy soha faoliyatini tubdan takomillashtirish chora-tadbirlari to‘g‘risida”gi 15 banddan iborat tarixiy farmoni hamda “Vijdon erkinligi va diniy tashkilotlar to‘g‘risida”gi Qonunda belgilangan vazifalar ekanini ta’kidladi.
O‘tkazilayotgan ko‘rik-tanlovdan ko‘zlangan maqsad yurtimizni yuqori saviyali, kuchli bilimga ega diniy kadrlar bilan ta’minlash, imomlarning malaka va ko‘nikmalarini yanada rivojlantirish ekanini aytdi.
Xususan, ularni qo‘llab-quvvatlash va rag‘batlarntirish maqsadida o‘tkazilayotgani, yurtimizda diniy-ma’rifiy sohaga, ilm ahliga ko‘rsatilayotgan e’tiborga alohida to‘xtaldi. Davlatimiz rahbari va Musulmonlar idorasi rahbariyatiga tanlov ishtirokchilari nomidan tashakkurlar aytdi.
Shuningdek, tanlovda imomlardan tashqari masjidlarda jonkuyarlik bilan xizmat qilib kelayotgan, o‘z ustida muntazam ish olib borayotgan bir guruh xodimlar ham taqdirlanadi deb, barcha ishtirokchilarga omad va muvaffaqiyatlar tiladi.
Tanlovda kuzatuvchi sifatida ishtirok etgan O‘zbekiston musulmonlari idorasi mas’ul xodimi Muhammadayyub domla Homidov ham so‘zga chiqdi.
U kishi O‘zbekiston musulmonlari idorasi Rahbariyatining salomini tanlov ishtirokchilariga yetkazib, haqiqatda Namangan viloyatida bu yilgi tanlovga o‘zgacha ishtiyoq bilan katta tayyorgarlik ko‘rilganini e’tirof etdi hamda tanlov ishtirokchilariga omad tiladi.
Tanlovda ishtirokchilarning chiqishlari hakamlar hay’ati tomonidan baholab borildi hamda tanlov so‘ngida natijalar e’lon qilindi:
“Eng ma’rifatli imom” tanlovining Namangan viloyat bosqichi g‘oliblari:
I-o‘rin: Umurzakov Kodirjon Djurayevich (Pop tumani “Muhammadjon qori” jome masjidi imom-xatibi)
II-o‘rin: Usmonov Ibodullo Ismoilxonovich (Kosonsoy tumani “Eshonbobo” jome masjidi imom-xatibi)
III-o‘rin: Xapizov Shamsiddin Axmedovich (Namangan tumani “Xalil hoji” jome masjidi imom-xatibi)
“Eng ko‘p obuna uyushtirgan imom”
- Hamroqulov Kamoliddin (Norin tumani “Haqqulobod” jome masjidi imom-xatibi
“Eng ko‘p maqola nashr etgan imom”
- Isaqov Abdulvohid (Namangan shahar “Miryoqubboy Mirhakimboy” jome masjidi imom-xatibi)
“Eng obod masjid”
- Namangan shahar “Mavlono Aliyyul qori” jome masjidi (masjid imom-xatibi Hamdamov Abdulbosit)
“Eng targ‘ibotchi imom”
- Tursunov Shukrullo (Namangan shahar “Abu Hanifa” jome masjidi imom-xatibi)
“Eng ta’sirli ijodiy ish”
- Ikramov Obidxon (Namangan viloyat bosh imom-xatibining o‘rinbosari “Jazariy matni” hamda “Qur’oni karim tilovatida vaqf va ibtido” rukni ostida chop etilgan asarlari uchun)
“Eng xushovoz muazzin”
- Yusupov Nosirxon (Kosonsoy tumani “A’loxon mahdum” jome masjidi muazzini)
“Eng ishbilarmon mutavalli”
- Siddiqov Xasanxon (Uychi tumani “Mashhad mozor” jome masjidi mutavallisi)
“Eng mirishkor bog‘bon”
- Rizayev Ma’murjon (Pop tumani “Kichik Xo‘jaobod” jome masjidi bog‘boni)
“Eng namunali tahoratxona”
- Namangan shahar “Mahdum eshon” jome masjidi tahoratxonasi (masjid imom-xatibi Shaxobitdinov Bositxon)
“Eng zamonaviy qorovulxona”
- Namangan shahar “Abu Yusuf” jome masjidi qorovulxonasi (masjid imom-xatibi Yusupov Bositxon)
“Eng boy kutubxona”
- Namangan shahar “Abu Yusuf” jome masjidi kutubxonasi (masjid imom-xatibi Yusupov Bositxon)
G‘oliblar Namangan viloyat vakilligining diplom va tashakkurnomasi hamda esdalik sovg‘alari bilan taqdirlandilar.
O‘zbekiston musulmonlari idorasining
Namangan viloyat vakilligi
Matbuot xizmati
Bir guruh diniy-ma’rifiy soha fidoyilariga "O‘zbekiston Respublikasi mustaqilligining 35 yilligi" esdalik nishonlari topshirildi
27 avgust kuni O‘zbekiston Respublikasi mustaqilligining 35 yilligi munosabati bilan diniy-ma’rifiy sohada samarali mehnat qilib kelayotgan fidoyi yurtdoshlarimizni taqdirlashga bag‘ishlangan tantanali tadbir bo‘lib o‘tdi.
Tadbirda O‘zbekiston Respublikasi Prezidentining diniy-ma’rifiy masalalar bo‘yicha maslahatchisi Muzaffar Komilov kirish so‘zi bilan ishtirok etdi.
Kirish nutqida mamlakatimizda mustaqillik yillarida, ayniqsa, so‘nggi yillarda diniy-ma’rifiy sohani rivojlantirish, jamiyatda tinchlik-totuvlik, millatlararo hamjihatlik va diniy bag‘rikenglikni mustahkamlash borasida amalga oshirilayotgan islohotlar, shuningdek, sohada faoliyat yuritayotgan ulamolar, imom-xatiblar, mudarrislar va fidoyi xodimlarning munosib hissasi haqida alohida ta’kidlandi.
Tantanali tadbir davomida diniy-ma’rifiy sohada ko‘p yillardan buyon samarali mehnat qilib, yurtimizda ma’naviy barqarorlikni ta’minlash, yosh avlodni milliy va umuminsoniy qadriyatlar ruhida tarbiyalash, aholi o‘rtasida ma’rifiy tushuntirish ishlarini olib borishga munosib hissa qo‘shib kelayotgan bir guruh fidoyi yurtdoshlarga "O‘zbekiston Respublikasi mustaqilligining 35 yilligi" esdalik nishonlari tantanali ravishda topshirildi.
Esdalik nishonlarini topshirish marosimida O‘zbekiston Respublikasi Prezidentining diniy-ma’rifiy masalalar bo‘yicha maslahatchisi Muzaffar Komilov, Din ishlari bo‘yicha qo‘mita raisi Sodiq Toshboyev, O‘zbekiston musulmonlari idorasi raisi, muftiy Shayx Nuriddin Xoliqnazar hazratlari, O‘zbekistondagi Islom sivilizatsiyasi markazi direktori Firdavs Abduhalikov, O‘zbekiston Respublikasi Vazirlar Mahkamasi mas’ul xodimi Orifxon Zokirovlar ishtirok etdilar.
Taqdirlash marosimida ta’kidlanganidek, mazkur esdalik nishoni mamlakatimiz taraqqiyotiga, uning tinchligi va barqarorligiga, jamiyatda millatlararo totuvlik va diniy bag‘rikenglik muhitini mustahkamlashga, yosh avlodni milliy va umuminsoniy qadriyatlar ruhida tarbiyalashga munosib hissa qo‘shayotgan fidoyi insonlarga bildirilgan yuksak ehtirom va e’tirof ramzidir.
Tadbir yakunida taqdirlanganlar o‘zlariga bildirilgan yuksak ishonch va e’tibor uchun minnatdorlik bildirib, mamlakatimiz tinchligi va ravnaqi yo‘lidagi ezgu faoliyatlarini yanada sidqidildan davom ettirishlarini ta’kidladilar.
Barcha mukofot sohiblarini samimiy muborakbod etamiz!
Mustaqilligimizning 35 yilligi muborak bo‘lsin!
O‘zbekiston musulmonlari idorasi Matbuot xizmati
