Saudiya Arabistonining “Al Hidaya Global Company LTD” kompaniyasi boshqaruv kengashi vakili shayx Solih Bahvayniy boshchiligidagi delegatsiya Sirdaryo viloyatida bo‘ldi. Bu haqda viloyat hokimligi axborot xizmati xabar berdi.

Tashrifdan ko‘zlangan maqsad bugungi kunda viloyatda xorijiy investorlar uchun yaratilgan shart-sharoitlar bilan yaqindan tanishish, shuningdek, baliqchilik, yirik chorvachilik komplekslari, ishlab chiqarish sexi hamda xorijiy sayyohlar uchun ixtisoslashgan yovvoyi hayvonlarni yetishtiruvchi majmua va boshqa tegishli infrastruktura qurilmalarini ishlab chiqarish bo‘yicha yangi investitsiya loyihalarini amalga oshirishni muhokama qilishdan iborat ekanligi aytilmoqda.

“Al Hidaya Global Company LTD” kompaniyasi boshqaruv kengashi vakili loyihaning umumiy qiymati 150 millon dollar ekanligi hamda uni amalga oshirish uchun viloyat hududidan 2 ming 500 gektar yer maydoni zarurligini ta’kidlab o‘tgan.

Muzokaradan so‘ng delegatsiya a’zolari viloyatning diqqatga sazovor joylarini hamda amalga oshirilishi ko‘zda tutilayotgan loyiha uchun ajratilishi rejalashtirilayotgan hududni ko‘zdan kechirishdi, deyiladi viloyat hokimligi xabarida.

O‘MI Matbuot xizmati