Saudiya Arabistoni Haj ibodatini ado etish uchun hujjatlar tayyorlagan holda viza olmoqchi bo‘lgan Livandagi falastinliklarga mamlakatga kirishni ta’qiqladi. Bu haqda islam-today nashri xabar berdi.

Yaqin Sharqda faoliyat olib boruvchi OAVlarning ma’lum qilishicha, Saudiya tomoni Falastin pasportiga ega bo‘lmagan va Livan hududiga istiqomat qilayotgan falastinliklarga viza berishni to‘xtatgan. Bugungi kunda Livan hududida 300 mingdan ortiq falastinlik yashaydi.

Falastin inson huquqlari tashkilotlari viza bermaslik sababini so‘rab murojaat qilganlarida, Saudiya Arabistoni tomoni ushbu holatga izoh va tushuntirish bermagan.

Avvalroq, xuddi shunday muammo Iordaniya hududida yashaydigan falastinliklar bilan ham sodir bo‘lgan edi.

O‘MI Matbuot xizmati