Yerdan samogacha savob bo‘ladi,

Munkar-Nakirlarga javob bo‘ladi,

Boshdan oyoqqacha nurga to‘ladi,

Imkon bormi, yoddan chiqarmang buni,

Ro‘za tuting, muborak – Ashuro kuni.

Iblisning qomati yetti bukilgay,

Tog‘dek gunohlar ham duv-duv to‘kilgay,

Malaklar tarafdan salom o‘qilgay,

Imkon bormi, yoddan chiqarmang buni,

Ro‘za tuting, muborak – Ashuro kuni.

Ezilgan qalblarga darmon bo‘ladi,

Mahsharda do‘zaxga qalqon bo‘ladi,

Firdavs jannatiga sarbon bo‘ladi,

Imkon bormi, yoddan chiqarmang buni,

Ro‘za tuting, muborak – Ashuro kuni.

Ro‘za ruhiyatni sayqal etadi,

Har bitta yaxshilik Haqqa yetadi,

Ko‘z ochib-yumguncha o‘tib-ketadi,

Imkon bormi, yoddan chiqarmang buni,

Ro‘za tuting, muborak – Ashuro kuni.

Sahardan shomgacha rahmat bo‘ladi,

Hurlarning qo‘lida sharbat bo‘ladi,

Eng oliy mukofot – jannat bo‘ladi,

Imkon bormi, yoddan chiqarmang buni,

Ro‘za tuting, muborak – Ashuro kuni.

Ro‘za – ruh shifosi, tig‘siz davodir,

Savobdan mosuvo shaksiz, gadodir,

«Ochlik – illat» demoq, ayni xatodir,

Imkon bormi, yoddan chiqarmang buni,

Ro‘za tuting, muborak – Ashuro kuni.

Erkin QUDRATOV,

Mir Arab o‘rta maxsus islom bilim yurti mudarrisi