O‘zbekiston musulmonlari idorasi raisi, muftiy Usmonxon Alimov bugun Qoraqalpog‘iston Respublikasiga tashrif buyurdilar.
Muftiy hazratlari dastlab Muhammad ibn Ahmad al-Beruniy nomidagi o‘rta maxsus islom bilim yurtida ma’naviy-ma’rifiy ishlari bilan tanishdilar, “Mustaqillik kuni” darsini o‘tdilar va talabalar bilan “Ilm olish fazilati” mavzusida suhbatlashdilar.
Uchrashuvda madrasa o‘qituvchisi Jumabek Iskandarov muftiy hazratlariga talabalar bilan dildan suhbatlashgani uchun minnatdorchilik bildirdi.
Tashrif davomida muftiy hazrat Imom Eshon Muhammad jome masjidi yonidan barpo qilingan konferensiya zalida qoziyot tizimidagi masjidlar imom-xatiblari va imom noiblari bilan samimiy muloqot qildi. Muloqot chog‘ida yurtimizdagi islohotlar, barcha sohadagi rivojlanishlar, jumladan, diniy sohadagi imkoniyatlar va o‘zgarishlar aytib o‘tildi. Shular qatori qoraqalpoq diyorida ham katta yangilanishlar yuz berayotgani, muhtaram Prezidentimiz tashabbusi bilan Imom Eshon Muhammad jome masjidining tubdan ta’mirlangani, atrofi obodonlashtirilgani, haqiqiy ma’naviyat o‘chog‘iga aylangani, imom-xatiblar ishlarida ham o‘zgarishlar bo‘layotgani ta’kidlab o‘tildi.
Amudaryo tumani bosh imom-xatibi Abdurahmon Matsapayev “Muftiy hazratlarining vaqt ajratib yurtimizga kelishi – qoraqalpoq diyoriga bo‘lgan e’tibori, imom-xatiblar bilan samimiy suhbati diniy soha xodimlarining kuchlariga kuch qo‘shdi”, deb dil izhorini bildirdi.

Qoraqalpog‘iston musulmonlari qoziyoti