Tinch okeani sohilidagi 99 gumbazli masjid
Indoneziyaning Makassar port shahrida “Asmaul Husna” masjidi joylashgan bo'lib, u 99 ta gumbazi va yuksak me'morchilik namunasi bilan sayyohlarni o'ziga jalb qilib kelmoqda.
IQNA ma'lumotlariga ko'ra, mazkur masjid diniy maskan bo'lishdan tashqari Indoneziyaning sayyohlik obidalaridan biri hisoblanadi.
Masjid 2017–2022 yillarda 2 gektar maydonda qurilgan bo'lib, u ikki qavat va erto'ladan iborat. Birinchi qavatda asosiy xonaqoh, tahoratxona va zaruriy xonalar mavjud. Ikkinchi qavati esa ayollar uchun mo'ljallangan. U 10 000 namozxonni sig'dira oladi.
Masjid qurilishida uning xonaqohi va barcha xonalari tabiiy yorug' bo'lishi uchun oynalardan keng foydalanilgan. Huddi shunday havo aylanishi ham tabiiylikka e'tibor qaratilgan. Bu esa uning energiya tejamkorligiga xizmat qilmoqda.
Masjidning rasmiy nomi Asmoul Husna, ya'ni Allohning 99 ta eng buyuk ismlariga atab qo'yilgan. Shu sababli, ushbu masjid “99 gumbazli masjid” nomi bilan tanilgan.
O'MI xodimi I.Ahmedov tayyorladi.
Anjuman qatnashchilari Islom sivilizatsiyasi markaziga sayohat qilishdi
Xabar berganimizdek, 19-20 avgust kunlari Islom sivilizatsiyasi markazida O‘zbekiston musulmonlari idorasi tasarrufidagi oliy va o‘rta maxsus diniy ta’lim muassasalari professor-o‘qituvchilarining «Zamonaviy diniy ta’lim: pedagogika, ilm-ma’rifat va innovatsiya» nomli I ilmiy-amaliy anjumani bo‘lib o‘tmoqda.
Bugun, 19 avgust kuni ishtirokchilar kutib olinib, ularning Islom sivilizatsiyasi markaziga sayohati tashkil etildi. Tashrif davomida mehmonlar markazning boy ekspozitsiyalari, Qur’oni karim zali, nodir qo‘lyozmalar hamda buyuk ajdodlarimizning ilmiy merosiga bag‘ishlangan bo‘limlar bilan yaqindan tanishdi. Ayniqsa, zamonaviy multimedia loyihalari va tarixiy eksponatlar ularda chuqur taassurot qoldirdi.
Ustozlar Markazda amalga oshirilayotgan keng ko‘lamli ishlar islom ma’rifatini targ‘ib qilish hamda yosh avlodni milliy-diniy qadriyatlarga hurmat ruhida tarbiyalashda muhim ahamiyat kasb etishini e’tirof etishdi.
Shuningdek, ishtirokchilar O‘zbekiston musulmonlari idorasida ham bo‘lishdi. Hazrati Imom majmuasidagi tarixiy qadamjo va obidalarni ziyorat qilishdi.
Oqshomda Islom sivilizatsiyasi markazi binosida ma’rifiy dastur – mapping namoyish qilindi.
Mazkur tadbirlar islom sivilizatsiyasi merosini targ‘ib etish, diniy ta’lim tizimini yanada takomillashtirib, yangi bosqichga olib chiqishda salmoqli hissa bo‘lib qo‘shiladi.
O‘zbekiston musulmonlari idorasi Matbuot xizmati
