Makka shahrida ham Mustaqillik bayrami nishonlandi
Bugun, 31 avgust kuni o‘zbekistonlik hojilar joylashgan Makka shahridagi muhtasham «Abroj al-Hidoya» mehmonxonasida O‘zbekiston Respublikasi Mustaqilligining 27 yilligiga bag‘ishlangan bayram tadbiri bo‘lib o‘tdi.
Tantanali marosim O‘zbekiston Respublikasining davlat madhiyasi bilan boshlandi.
Shundan so‘ng O‘zbekiston Respublikasi Vazirlar Mahkamasi huzuridagi Din ishlari bo‘yicha qo‘mita raisi o‘rinbosari Nuriymon Abulhasan muhtaram Prezidentimizning bayram tabrigini o‘qib eshittirdi. Tabrikda keltirilgan davlatimiz Rahbarining «Siz, azizlarni, sizlar orqali butun xalqimizni eng ulug‘, eng aziz bayramimiz – Mustaqillik kuni bilan chin qalbimdan samimiy muborakbod etaman. Biz uchun yangi davr, erkin va ozod hayotni boshlab bergan bu qutlug‘ sanada xalqimiz qanday mashaqqatli va ayni vaqtda sharafli yo‘lni bosib o‘tganini yana bir bor chuqur his etamiz», degan so‘zlari tabarruk zaminda ulug‘ ibodatlarni ado etib bo‘lgan fuqarolarimizni behad quvontirib yubordi.
Tabarruk yoshdagi hoji otaxonu onaxonlarimiz muhtaram Prezidentimiz tashabbuslari bilan barcha sohalar qatorida muborak haj safarini namunali o‘tkazish borasida bir qator xayrli islohotlar amalga oshirilayotganini so‘zlab, haj qiluvchilar uchun tashkil etilgan shart-sharoitlar yilda-yilga yaxshilanib borayotganini mamnuniyat bilan tilga oldilar. Ular muhtaram Yurtboshimiz, ona-Vatanimiz va fidokor xalqimiz haqqiga ko‘pdan-ko‘p xayrli duolar qildilar.
Saudiya Arabistonidagi hamkor “al-Hidoya” shirkati rahbari Usoma Toshqandiy janoblari ziyoratchilarimizni istiqlol bayrami bilan muborakbod etib, O‘zbekiston diyorini bundan-da ravnaq topishini tiladi.
Bayram tadbirida ehson dasturxoni yozilib, ziyoratchilarga shirinliklar va tansiq taomlar tortildi.
O‘zbekiston musulmonlari idorasi Matbuot xizmati
O‘zbekiston Islom sivilizatsiyasi markazi noyob Qur’oni karim nusxasini yaratish bo‘yicha jahon xattotlar tanlovini e’lon qildi
26 avgust kuni O‘zbekistondagi Islom sivilizatsiyasi markazida “Islom sivilizatsiyasi: yangi nigoh, yangi kashfiyotlar” xalqaro mediaforumning “Asrlarni birlashtiruvchi meros. Islom sivilizatsiyasining ma’naviy mazmun-mohiyati” mavzusidagi uchinchi yalpi sessiyasi bo‘lib o‘tdi, deb xabar qilmoqda “Dunyo” AA.
Sessiya doirasida Qur’oni karim merosi, qadimiy qo‘lyozmalar, islom xattotligi, hujjatli kino hamda tarixiy manbalarni o‘rganishda sun’iy intellektdan foydalanishga bag‘ishlangan xalqaro loyihalar taqdim etildi.
Xususan, “114 Qur’on: islom olami xattotligining 114 durdonasi”, “Katta Langar Qur’oni: haqiqat va afsonalar”, “Allohning 99 ismi: Uning go‘zal ismlari orqali Yaratganni anglash”, “Sun’iy intellekt – qadimiy qo‘lyozmalarni o‘qishning raqamli kaliti” loyihalari hamda “Yagona tarixiy meros sahifalari” loyihasi doirasida yaratilgan “Masjid” hujjatli filmi namoyish etildi.
Xalqaro muhokamalarda Islom hamkorlik tashkiloti, shuningdek, Jazoir, O‘mon, Pokiston, Saudiya Arabistoni, Iroq, Mali va O‘zbekistonning yetakchi ommaviy axborot vositalari vakillari ishtirok etib, islomofobiya va mavjud stereotiplarni bartaraf etishda medianing o‘rni haqida fikr almashdi.
Sessiya yakunida turli mamlakatlar va xattotlik maktablarining an’analarini birlashtiruvchi noyob Qur’oni karim nusxasini yaratish bo‘yicha Xattotlar umumjahon tanlovi e’lon qilindi.
Eslatib o‘tamiz, mazkur xalqaro mediaforumning asosiy tadbirlari O‘zbekiston Islom sivilizatsiyasi markazida o‘tkazilib, unda qariyb 50 mamlakatdan media va ekspert hamjamiyatining 300 nafarga yaqin vakili — media kompaniyalar, axborot agentliklari va telekanallar rahbarlari, jurnalistlar, prodyuserlar, olimlar hamda kreativ industriya mutaxassislari ishtirok etmoqda.
O‘zbekiston musulmonlari idorasi Matbuot xizmati
