Bugun biz asrlar davomida orziqib kutilgan ozod, erkin va farovon hayotda o‘z oldimizga qo‘ygan ezgu maqsadlar sari qadam qo‘yib, tinch-osoyishta hayot kechiryapmiz. Erishayotgan  yutuqlarimiz bisyor. Bu yutuqlarimizni nafaqat xalqimiz, balki butun dunyo hamjamiyati tan olyapti. Xalqimiz to‘q, ibodatlarimiz emin-erkin ado etilmoqda, bularning zamirida, albatta, tinchlik-osoyishtalik va istiqlol ne’mati yotibdi. Bularning barchasining qadriga yetish har birimizning gardanimizdagi burchimiz hisoblanadi. Mamlakatimizda  ikki mingdan ortiq masjidlar xalqimizga xizmat ko‘rsatib kelmoqda. Ularning hammasi zamon talablariga javob beradi. Har yili yetti mingdan ziyod yurtdoshlarimiz haj ibodatini va o‘n mingdan ziyod yurtdoshlarimiz umra ibodatlarini ado qilish baxtiga muyassar bo‘lmoqdalar. Imom Buxoriy nomli Toshkent islom instituti va Mir Arab oliy madrasasi hamda to‘qqizta o‘rta maxsus islom bilim yurtlari o‘z faoliyatini olib bormoqda va yurtimizga chuqur diniy va dunyoviy ilmlarni egallagan mutaxassislarni yetishtirib chiqarmoqda.

Hozirgi kunda O‘zbekiston musulmonlari idorasi tasarrufidagi ta’lim muassasalarida  Qur’oni karim, tafsir, hadis, fiqh, aqoid, sarf, nahv, mutolaa kabi diniy ilmlar bilan bir qatorda o‘zbek tili va adabiyoti, tarix, jo‘g‘rofiya, ingliz tili, fizika, matematika, astronomiya, informa­tika kabi davlat ta’lim standartlariga mos bo‘lgan fanlar o‘qitiladi. Ta’lim muassasalarida oliy ma’lumotli mudarris va o‘qituvchilar dars berib kelmoqdalar.

Shuningdek, so‘nggi yillarda mamlakatimizda tashkil etilgan Islom sivilizatsiyasi markazi, Islom akademiyasi, Mir Arab oliy madrasasi, Imom Buxoriy va Imom Termiziy xalqaro ilmiy-tadqiqot markazlari boy ilmiy-tarixiy merosimizni o‘rganish va targ‘ib qilishga xizmat qilmoqda. 

Albatta, quvonch bilan aytishimiz mumkinki, diniy ta’lim muassasalarida ta’lim olayotgan yoshlarga yaratilayotgan bunday shart-sharoitlar kelajakda jamiyatimiz uchun zarur mutaxassis-xodimlar tayyorlashda poydevor bo‘lib xizmat qiladi.

Alloh taolo barchamizni ne’matlari qadriga yetuvchi va o‘z Vatani, oilasi va farzandlariga sadoqatlilardan qilsin!

O.Hoshimov,

 “Ko‘kaldosh” o‘rta maxsus islom bilim yurti mudarrisi