Quvlashib o‘tayotgan kunlarimiz bizni borgan sari Istiqlolimizning 27 yillik tantanasiga yaqinlashtirmoqda. Bugun respublikamizning barcha qishloq va shaharlarida ushbu ulug‘ ayyomga munosib tayyorgarlik ko‘rilmoqda. Turli xayriya tadbirlari o‘tkazilib, kam ta’minlangan va yordamga muhtoj oilalarga sovg‘a-salom va moddiy yordamlar ulashilmoqda. Yangi qurilgan turar joylar, turli ijtimoiy binolar va boshqa qurilish obyektlari bayram oldidan foydalanuvchilarga topshirishga tayyorlanmoqda. Barcha idora va tashkilotlarda, maktablarda va mahallalarda bayram munosabati bilan ta’mirlash va obodonlashtirish ishlari nihoyasiga yetkazilmoqda.

Dono xalqimiz azaldan bayramlar oldidan hashar o‘tkazishni o‘ziga odat qilib kelgan. Bu ulkan ish ortida hamkorlik, hamjihatlik, o‘zaro yordam va eng asosiysi ezgulik yotadi.

Yurtimiz bo‘ylab amalga oshirilgan ulkan hasharda Urganch shahar Imom Faxriddin ar-Roziy o‘rta maxsus islom bilim yurti jamoasi ham munosib ishtirok etib, yurtimiz obodonchiligiga o‘z hissalarini qo‘shdilar. Hasharda 20 nafar talaba, 20 nafar ishchi-xodimlar ishtirok etib, bilim yurti ichki va tashqi xududlarini tozalash bilan birga, bilim yurtiga yaqin xududlar: Urganch tuman “Shahidlar bobo”, “Hazrati Shahobiddin bobo” masjid va qabristonlari, Urganch shahar “Oxun bobo”, “Ko‘zli ota” masjidlaridagi tozalash va obodonlashtirish ishlariga ko‘maklashdilar.

Hasharda bilim yurti oldidan oqib o‘tuvchi zaxkashning ikki tarafi tozalanib, bilim yurti hovlisidagi 50 dan ziyod mevali va manzarali daraxtlarga shakl berilib, oqlandi, oshxona, tahoratxona, yotoqxona, o‘quv xonalari tozalanib, yangi o‘quv yiliga tayyorlandi.

O.Odilov

O‘MI matbuot xizmati