Ikki yuz mingga yaqin indoneziyalik O‘zbekiston orqali Umraga borishi kutilmoqda
Makka shahridagi “Abrojul Hidoya” mehmonxonasida O‘zbekiston “Haj-2018” ishchi guruhi rahbari, Din ishlari bo‘yicha qo‘mita raisi o‘rinbosari Nuriymon Abulhasan boshchiligida, Saudiya Arabistonidagi hamkor “al-Hidoya” va Indoneziyadagi “Burhonul Hidoya” shirkati rahbarlari o‘rtasida muloqot tashkil etildi.
Uchrashuvda indoneziyalik ziyoratchilarni O‘zbekistonning qadimiy shaharlari hisoblangan Samarqand va Buxoro orqali Umra ziyoratiga borishini tashkil etish masalasi muhokama qilindi.
Uchrashuvda ta’kidlanishicha, har yili 150-200 ming indoneziyalik ziyoratchi qadimiy shaharlarimiz – Samarqand va Buxoroning diqqatga sazovor joylarini ziyorat qilib, so‘ngra Umra safariga shu yerning o‘zidan jo‘nab ketishadi.
Ushbu jarayonni samarali tashkil etish maqsadida, hamkor shirkat rahbari shayx Solih Salim Bahviniy yaqinda O‘zbekistonga keladi. Din ishlari bo‘yicha qo‘mita hamda O‘zbekiston musulmonlari idorasi hamkorligida amalga oshiriladigan ushbu tashrif davomida O‘zbekiston Respublikasi Turizmni rivojlantirish davlat qo‘mitasi va O‘zbekiston havo yo‘llari mutasaddilari bilan uchrashuvlar o‘tkazilishi rejalashtirilgan.
Malumot uchun, joriy yilning oktyabr oyidan boshlab indoneziyaliklarning yurtimiz orqali Umra safariga jo‘nab ketishi belgilangan.
O‘MI Matbuot xizmati
“Arab Tourist”: Samarqand, Buxoro va Xiva — islom sivilizatsiyasi va jahon madaniy merosining bebaho durdonalari
Saudiya Arabistonining turizm va sayohatlarga ixtisoslashgan “Arab Tourist” elektron nashrida “Markaziy Osiyoning qoq markazida joylashgan va Buyuk ipak yo‘li bilan bog‘langan mamlakat” sarlavhali tahliliy maqola e’lon qilindi, deb xabar bermoqda “Dunyo” AA.
Maqolada Buyuk ipak yo‘li tarixida o‘zbek shaharlarining tutgan o‘rni alohida e’tirof etiladi. Xususan, Samarqand, Buxoro va Xiva kabi tarixiy shaharlar asrlar davomida Sharq va G‘arb o‘rtasidagi savdo, fan va madaniyat markazlari sifatida xizmat qilgani ta’kidlanadi. Registon maydoni, Ichan-qal’a va Buxorodagi me’moriy obidalar islom sivilizatsiyasi hamda jahon madaniy merosining bebaho durdonalari sifatida tilga olinadi.
Bundan tashqari, nashr O‘zbekistonning rang-barang tabiati va geografik relefiga to‘xtalib o‘tgan. Qizilqum cho‘li, serhosil Farg‘ona vodiysi, Tyan-Shan va Pomir-Oloy tog‘ tizmalari aholi joylashuvi va qishloq xo‘jaligi rivojida muhim o‘rin tutishi qayd etiladi.
Nashr, shuningdek, Buyuk Mirzo Ulug‘bek kabi donishmandlarning astronomiya va matematika sohasidagi buyuk kashfiyotlarini alohida e’tirof etgan.
Xulosada ta’kidlanganidek, Toshkent, Samarqand, Buxoro, Namangan va Andijon kabi shaharlar bugungi kunda nafaqat ma’muriy va iqtisodiy, balki jadal rivojlanayotgan yirik madaniy-turistik markazlar sifatida dunyo sayyohlari e’tiborini o‘ziga jalb etmoqda.
O‘zbekiston musulmonlari idorasi Matbuot xizmati
