Otalar va onalar haqida
OTALAR HAQIDA
- Ota xonadonga tashrif buyurganda o‘rindan turib, joy bo‘shatish lozim.
- Ota bilan ketayotganda uning iznisiz undan oldin yurmaslik kerak.
- Ota farzand uchun biron narsa meros qoldirmasa ham, undan nomus qilinmaydi.
- Ota bor uyda bosh qotirishga va birovga maslahat solishga zarurat bo‘lmaydi.
- Ota yonida yoki u kirib kelganda yonboshlab yotilmaydi.
- Ota uyda bo‘lmagan mahalda iste’mol qilingan narsalardan uning uchun alohida olib qo‘yilishi fazilatdir.
- Mansabli shaxs bo‘lsang ham otang chaqirganda otingdan tushib, oldida hozir bo‘lishga shoshil! Mansabing ishingga aloqador, otangga emas!
- Otangning yonidagi solih kishilarga nisbatan samimiy bo‘lgin, agar otang vafot topib ketsa o‘shalar bilan muomala-munosabatlaringni uzma!
ONALAR HAQIDA
- Hadyani avval onaga, so‘ng otaga berilishi mahbubdir.
- Hayot bo‘lsalar ham, vafot topib ketgan bo‘lsalar ham ularning haqlariga doimo duoda bo‘lmoq zarur.
- Onalarning yuzlariga tushgan ajinlar, qo‘llarining qadoqlari – sen va aka-ukalaring, opa-singillaring sababli ekanligini bilgin!
- Senga bergan oq sutini mehru xursandlik bilan bergan, ammo sening unga bergan taoming ba’zida minnatli va ozorlidir. Shuning uchun bergan har-bir luqmang mehrli bo‘lishi uchun kamtarin bo‘l, kamtarin bo‘l!
- Unga sen har kuni ko‘rinish ber, chunki onangning seni ko‘rishi xum-xum tillo tuhfa qilganingdan ortiqroqdir.
- Tirikligida bor imkoniyating ila unga tavoze’li va shirin so‘zli bo‘l, shunda uni yo‘qotganingda armonda qolmaysan.
- Hayit kunlari onangni bag‘ringa bos! U seni har kuni quchib, hidlaringdan to‘yib-to‘yib zavq olganini esingdan chiqarmagin!
Internet manbalari asosida Baxmal tumani «Domla Eshonqul»
jome masjidi imom-xatibi Xushbekov Isoqul tayyorladi
Hindistonlik general: «Usmon Mus'hafi men uchun eng ta’sirli eksponat bo‘ldi»
Hindiston Respublikasi Mudofaa vazirligi kotibiyati boshlig‘i, general Dinesh Kumar O‘zbekistondagi Islom sivilizatsiyasi markaziga tashrif buyurdi. Markaz bilan tanishuv davomida mehmon, ayniqsa, Usmon Mus'hafini ko‘rib chuqur taassurot olganini ta’kidlab, uni bu yerdagi eng noyob va unutilmas yodgorliklardan biri, deya e’tirof etdi.
Tashrif chog‘ida general Dinesh Kumar muzeyning boy ekspozitsiyalari bilan batafsil tanishdi. U islomgacha bo‘lgan davr sivilizatsiyasi, Islom sivilizatsiyasining taraqqiyot bosqichlari, Birinchi va Ikkinchi Renessans davrlariga bag‘ishlangan galereyalar, buyuk allomalarning hayoti va ilmiy merosi, nodir qo‘lyozmalar hamda zamonaviy raqamli texnologiyalar asosida yaratilgan interaktiv ekspozitsiyalarni katta qiziqish bilan ko‘zdan kechirdi.
Mehmon ekspozitsiyalar tarixiy merosni zamonaviy muzeyshunoslik yechimlari orqali jonli va ta’sirchan tarzda namoyon etayotganini yuqori baholadi. Uning ta’kidlashicha, har bir galereya o‘zaro uzviy bog‘langan bo‘lib, tashrif buyuruvchilarga O‘zbekiston va butun mintaqa sivilizatsiyasi tarixini yaxlit holda anglash imkonini beradi.
General Dinesh Kumar bunday dedi:
➖ Bu haqiqatan ham hayratlanarli maskan. Delegatsiyam bilan birgalikda bu yerga kelib, katta taassurotlar oldik. Markazning me’moriy qiyofasi, ekspozitsiyalarning yuksak saviyada tashkil etilgani hamda islomgacha bo‘lgan davrdan tortib bugungi kungacha bo‘lgan tarixning izchil va ta’sirchan tarzda yoritilgani meni chuqur hayratga soldi. Ayniqsa, zamonaviy texnologiyalar yordamida tarixni jonlantirish usuli tahsinga sazovor. Bu yerda har bir ekspozitsiya o‘tmishni nafaqat ko‘rish, balki uni chuqur his qilish imkonini ham beradi.
Bizga namoyish etilgan Usmon Mus'hafi so‘z bilan ta’riflab bo‘lmaydigan darajada noyob meros ekan. Bu men uchun eng ta’sirli eksponat bo‘ldi va uni umrim davomida eslab yuraman.
O‘zbekistonga keladigan har bir sayyoh ushbu maskanni albatta ko‘rishi kerak. Biz Hindistonga qaytgach, do‘stlarimiz va hamkasblarimizga ham bu yerga tashrif buyurishni tavsiya qilamiz.
Tashrif yakunida general Dinesh Kumar O‘zbekistondagi Islom sivilizatsiyasi markazi mamlakatning ko‘p asrlik tarixiy va ma’naviy merosini zamonaviy texnologiyalar bilan uyg‘un holda namoyon etayotgan, xalqaro ahamiyatga ega ilmiy-ma’rifiy maskan ekanini alohida ta’kidladi.
iccu.uz
