Otalar va onalar haqida
OTALAR HAQIDA
- Ota xonadonga tashrif buyurganda o‘rindan turib, joy bo‘shatish lozim.
- Ota bilan ketayotganda uning iznisiz undan oldin yurmaslik kerak.
- Ota farzand uchun biron narsa meros qoldirmasa ham, undan nomus qilinmaydi.
- Ota bor uyda bosh qotirishga va birovga maslahat solishga zarurat bo‘lmaydi.
- Ota yonida yoki u kirib kelganda yonboshlab yotilmaydi.
- Ota uyda bo‘lmagan mahalda iste’mol qilingan narsalardan uning uchun alohida olib qo‘yilishi fazilatdir.
- Mansabli shaxs bo‘lsang ham otang chaqirganda otingdan tushib, oldida hozir bo‘lishga shoshil! Mansabing ishingga aloqador, otangga emas!
- Otangning yonidagi solih kishilarga nisbatan samimiy bo‘lgin, agar otang vafot topib ketsa o‘shalar bilan muomala-munosabatlaringni uzma!
ONALAR HAQIDA
- Hadyani avval onaga, so‘ng otaga berilishi mahbubdir.
- Hayot bo‘lsalar ham, vafot topib ketgan bo‘lsalar ham ularning haqlariga doimo duoda bo‘lmoq zarur.
- Onalarning yuzlariga tushgan ajinlar, qo‘llarining qadoqlari – sen va aka-ukalaring, opa-singillaring sababli ekanligini bilgin!
- Senga bergan oq sutini mehru xursandlik bilan bergan, ammo sening unga bergan taoming ba’zida minnatli va ozorlidir. Shuning uchun bergan har-bir luqmang mehrli bo‘lishi uchun kamtarin bo‘l, kamtarin bo‘l!
- Unga sen har kuni ko‘rinish ber, chunki onangning seni ko‘rishi xum-xum tillo tuhfa qilganingdan ortiqroqdir.
- Tirikligida bor imkoniyating ila unga tavoze’li va shirin so‘zli bo‘l, shunda uni yo‘qotganingda armonda qolmaysan.
- Hayit kunlari onangni bag‘ringa bos! U seni har kuni quchib, hidlaringdan to‘yib-to‘yib zavq olganini esingdan chiqarmagin!
Internet manbalari asosida Baxmal tumani «Domla Eshonqul»
jome masjidi imom-xatibi Xushbekov Isoqul tayyorladi
Saxovatpesha yurtdoshlarimiz masjidlar kommunal to‘lovlarini qo‘llab-quvvatladi
2026 yilning iyun–iyul oylari davomida yurtdoshlarimiz tomonidan DOMO mobil ilovasi orqali masjidlarning kommunal xarajatlarini qoplashga qaratilgan xayrli tashabbus faol qo‘llab-quvvatlandi.
Ushbu davr mobaynida 650 ta masjid uchun jami 254,7 million so‘m xayriya mablag‘lari yig‘ilib, po‘latday shaffoflik bilan to‘lovlarga yo‘naltirildi.
Sarflangan mablag‘lar taqsimoti:
-
225,9 mln so‘m (88,7%) — elektr energiyasi to‘lovlariga;
-
28,8 mln so‘m (11,3%) — tabiiy gaz xarajatlarini qoplashga.
Eng ko‘p xayriya qilingan hududlar:
-
Toshkent shahri — 103,6 mln so‘m;
-
Toshkent viloyati — 29,3 mln so‘m;
-
Qoraqalpog‘iston Respublikasi — 27,4 mln so‘m;
-
Farg‘ona viloyati — 24,9 mln so‘m.
Bu kabi xayrli ehsonlar masjidlarimizning uzluksiz faoliyatini ta’minlash va namozxonlar uchun munosib sharoit yaratishga xizmat qilmoqda.
Barcha saxovatpesha hamyurtlarimizga samimiy minnatdorlik bildirib, qilinayotgan ezgu amallarga Haq taolodan baraka tilaydi.
O‘zbekiston musulmonlari idorasi
Matbuot xizmati
