Qaytar dunyo (ibratli hikoya)
Qadim zamonda donishmandligi bilan yuksak obro‘-e’tibor qozongan kishi bor edi. U barchaga mehribon, to‘g‘ri yo‘l ko‘rsatuvchi, hamdard va hamsuhbat edi.
Bir kuni donishmandning huzuriga suv sotuvchi g‘amgin holda keldi. Uning mahzunligini ko‘rgan donishmand:
– Bolam, biror musibating bormi? – deb so‘radi.
– Yo‘q, ...ammo... qanday aytishni bilmay turibman – deb javob berdi suv sotuvchi.
– Gapiraver, uyalma, dardingni ayt, – dedi donishmand kuyinib.
– Kechirasiz, deb gap boshladi sotuvchi ming xijolat ila. Sizning farzandingiz bugun oltinchi meshimni juvoldiz (bigiz) bilan teshdi. Bilasiz, faqir odamman, nima qilishni bilmay qoldim. Yangisini olishga pulim ham qolmadi.
Donishmand:
– Xafa bo‘lma, bolam, bir chorasini topaman. Hozircha mana bu pulni olib, boshqa mesh sotib ol, – dedi.
Ota “nega farzandim bunday ishga qo‘l urdi?” degan savolning javobini o‘ylab o‘yiga yeta olmadi. Shundan so‘ng, ayoliga bo‘lgan voqeani aytib:
– Qanday qilib o‘g‘limiz bu xunuk ishga qo‘l urdi. Xatoimni hech o‘ylab topa olmadim. Sen ham yaxshilab o‘ylab ko‘r, – dedi.
Oradan biroz vaqt o‘tib, ayoli:
– Esimga tushdi, – dedi hayajonlanib. O‘g‘limizga homilador bo‘lganimda mehmonga borgan edim. Dasturxondagi apelsinga ko‘zim tushib, juda ham yegim keldi. Biroq dasturxonga qo‘l uzatishga tortindim. Katta yoshdagi qariya onaxonlarning: “Homilador ayolning ko‘ngli biror narsani tusaganda undan totib ko‘rmasa, tug‘ilajak farzandiga salbiy ta’sir ko‘rsatadi”, deyishgani yodimga tushdi. Bolamizga putur yetishidan qo‘rqib, mezbondan suv so‘radim. Suv olib kelishga chiqib ketganida, yoqamdagi to‘g‘nog‘ichni olib, apelsinga tiqib yaladim.
Donishmand:
– Tez borib uy egasidan uzr so‘ra, – dedi.
– Ularga nima deyman? Shu arzimagan ish uchun ham uzr so‘rash shartmi? – dedi ayoli e’tiroz bildirib.
– Xonadan ahlidan rozilik so‘ra. Farzandimiz olti yoshga to‘ldi. O‘sha voqeadan olti yil o‘tib, to‘g‘nog‘iching o‘g‘limiz qo‘lida bigiz bo‘ldi. Sening qilgan ishing davom etmoqda. Keyin kech bo‘lmasin, – dedi donishmand.
O‘rol TUROBOV,
Baxmal tumanidagi “Labi-hovuz” jome masjidi imom-xatibi
Xalq qabulxonasi vakillari ishtirokida amaliy seminar bo‘lib o‘tdi
O‘zbekiston musulmonlari idorasida aholi bilan muloqot tizimini takomillashtirish va murojaatlar bilan ishlash samaradorligini oshirishga qaratilgan amaliy seminar-trening bo‘lib o‘tdi. Unda mazkur yo‘nalishga mas’ul bo‘lgan mutaxassislar bevosita hamda masofaviy tarzda ishtirok etdi.
Tadbirni O‘zbekiston musulmonlari idorasi raisining birinchi o‘rinbosari Homidjon domla Ishmatbekov kirish so‘zi bilan ochib, fuqarolarning murojaatlariga yuksak hurmat bilan qarash va ularning dardiga oqilona yechim topish har bir rahbar hamda xodimning nafaqat vazifasi, balki oliy insoniy burchi ekanini alohida ta’kidladi.
Seminarda O‘zbekiston Respublikasi Prezidenti Xalq qabulxonasining mas’ul vakillari – Davlat tashkilotlari tomonidan murojaatlar ko‘rib chiqilishini nazorat qilish sho‘basi bosh inspektori Saidakmal Xodjayev hamda sho‘ba yetakchi inspektori Rashid Kurganov ishtirok etib, tizimdagi holatni qonunchilik talablari asosida atroflicha tahlil qilib berdilar.
Soha mas’ul mutaxassislari tomonidan ayni yo‘nalishdagi Prezident Farmoni ijrosi doirasida murojaatlarni ko‘rib chiqishda qonuniylik va tezkorlikni ta’minlash, jarayon shaffofligini oshirish hamda murojaatlarni nazoratdan olishning mexanizmlarini to‘g‘ri qo‘llash bo‘yicha muhim tavsiyalar berildi.
Ochiq muloqot ruhida o‘tgan mazkur tadbir tizim xodimlarining murojaatlar bilan ishlash madaniyati va huquqiy savodxonligini yanada oshirishga xizmat qiladi. Amaliy tahlillarga boy bo‘lgan ushbu seminar fuqarolarning huquq va qonuniy manfaatlarini to‘laqonli himoya qilish hamda xalqimizning diniy-ma’rifiy sohaga bo‘lgan ishonchini mustahkamlash yo‘lidagi muhim va tizimli qadam bo‘ldi.
O‘zbekiston musulmonlari idorasi
Matbuot xizmati
