Abdulloh ibn Amr ibn Oss roziyallohu anhudan rivoyat qilinadi. “Rosululloh sollallohu alayhi vasallam: “Kimni do‘zaxdan uzoqlashishi va jannatga kirishi xursand qilsa, vafot etadigan paytda Allohga va oxirat kuniga iymon keltirib vafot etsin. Hamda o‘ziga qilinishni mahbub ko‘rgan muomalani o‘ziga ham, boshqalarga ham ravo ko‘rsin”, dedilar (Imom Muslim rivoyati).

Do‘zaxdan uzoqlashishni  va jannatga kirishni istamaydigan  musulmon yo‘q bo‘lsa kerak olamda. Do‘zax haqida eshitgan inson borki, undan panoh tilaydi, o‘z nafsini undan qutqarish uchun harakat qiladi. Jannat haqida bilgan kishi esa, unga tezroq yetishish ilinjida, undagi rohat va mukofotlarga erishish niyatida jiddu-jahd qiladi.

Bu hadisi sharif esa aynan shunday kishilarga dasturulamal va orzuga erishish uchun yo‘llanmadir. Ushbu yo‘llanmani yozib bergan zot esa eng ishonchli, eng rostgo‘y inson Muhammad sollallohu alayhi vasallamdir. Yo‘llanmada esa sodda va tushunarli qilib ikki sabab ko‘rsatilgan:

1) Allohga va oxirat kuniga iymon keltirgan holda, qatiy ishonch va ushbu ishonch isboti yo‘lida qilingan solih amallar qurshovida vafot etish;

2) O‘zgalar tarafidan o‘ziga qanday muomala qilinishini yaxshi ko‘rsa, o‘zi ham o‘zgalarga shunday muomala qilish. Demak, o‘zingga nisbatan:

- Aldashlarini yoqtirmaysanmi? Sen ham aldama!

- Xiyonatni yomon ko‘rasanmi? Xiyonat qilma!

- Zulm qilinishidan qo‘rqasanmi? Zulm qilma!

- G‘iybatni yomon ko‘rasanmi? G‘iybat qilma!

- Yordam berilishini istaysanmi? Yordam ber!

- Kechirilishni yaxshi ko‘rasanmi? Sen ham kechir!

- Ayb va nuqsonlaringni berkitilishini istaysanmi? O‘zgalar aybini yop.

- Senga infoq qilinishini xush ko‘rasanmi? Sahiy bo‘l!

- Hurmat qilinishni yaxshi ko‘rasanmi? Hurmat qil!

- Xizmat qilinishni istaysanmi? Xizmat qil!

Xullas, o‘z nafsing uchun nimani yaxshi ko‘rsang, o‘zgalarga ham ravo ko‘r. Va o‘z nafsing uchun yoqtirmagan narsalaringni boshqalar uchun ham ravo ko‘rma. Shundagina iymoning komil bo‘ladi. Shundagina jahannamdan uzoqlashib, jannatga erishasan. Yagona yo‘l shudir. Boshqa yo‘l izlab halok bo‘lma.

Yorbek ISLOMOV,

Olmazor tumanidagi “Mevazor” masjidi imom noibi