Bugun yurtimizning barcha masjidlarida Hayit namozi ado etildi. Uning tarovati, o‘zgacha yorishgan tonggi qalblarga ajib bir his bag‘ishlaydi. Shukronalik, shodlik, muhabbat to‘la qalblarni masjid sari odimlashga, avvalgi saflarda turishga undaydi. Shunday ezgu niyatlar bilan ado etilgan ibodatlar asnosida insonlar yuzidagi ifodani kuztish mumkin. Tuyg‘ularni so‘z bilan tariflab bo‘lmaydi, ularni faqatgina tasvirlardan anglab olish mumkin.

Hayit kunlari oila ichida ham bayram kayfiyatini tiklash kerak. Uyga qilinadigan xarajatlarni odatdagidan yaxshiroq qilish darkor. Iloji bo‘lsa, ularga sovg‘a va maxsus hadyalar ulashilsa, yanada yaxshi bo‘ladi. Hayit kunlarida bemorlarning holidan xabar olish, ularning ham hayitni nishonlashlariga ko‘maklashish ayni savob ish bo‘ladi.

Hayit kunlari silai rahm qilish, qarindosh-urug‘, keksalar va bemorlarni, quda-andalarni ziyorat qilish har qachongidan ham ko‘ra ta’kidlangan bo‘lib, savobi ko‘proq bo‘ladi.

Uzoqlashib ketgan qarindoshlar bilan, ayrim arazlashgan do‘st-yaqinlar bilan hayit bahonasida aloqalarni tiklash, yarashib olish lozim. Zero, silai rahmni uzgan yoki insonlarga gina qilgan kishilarga fazilatli kunlarning yaxshiligi yetmasligi haqida rivoyatlar bor. Shu bois, bunga jiddiy qarash kerak. Bolalarga munosib hadya va sovg‘alar ulashilsa, ayni maqsadga muvofiq bo‘ladi. Farzandlarimiz yil davomida hayitni eslab yursin, uni orziqib kutsin, uning buyukligini his qila bilsin, ana shunda yaxshi bo‘ladi. Bu kabi ishlar farzandlarimiz ongida milliy-diniy qadryatlarimizga nisbatan ehtirom tuyg‘usining shakllanishiga, ularning Vatan va millatga haqiqiy sadoqatli insonlar bo‘lib tarbiya topishida muhim ahamiyat kasb etadi.

Tanish-bilish, yoru do‘st va har bir ko‘ringan musulmon kishini hayit bilan tabriklab, ularga xursandchilik va shodlik izhor qilish kerak.

O‘MI Matbuot xizmati