Tog‘dan pastga shitob bilan oqayotgan daryoga qarab, xayolan u bilan so‘zlashdim:
“Ey sershovqin daryo! Nega buncha shoshib-pishib oqasan, nimadan kech qolmoqdasan? Seni kimlar kutmoqdaki, va’damga vafo qilay, ahdimni buzmayin deysan?!” Xuddi daryodan qulog‘imga go‘yo sirli ovoz kelgandek bo‘ldi: “Mening yo‘limga intizor, kelishimni kutuvchilar son-sanoqsiz! Sen ularning ko‘pini bilmaysan. Meni kutayotgan ekinzorlar, dov-daraxtlar, o‘t-o‘lanlar, hayvonot va hatto siz odamlar ham borsiz. Men shoshmasam, kechiksam, dangasalik qilsam, ular qurib-qovjirab, suvsizlikdan halok bo‘ladi. Shoshishimning boisi shu!” Daryoga qarab o‘ylarkanman, yoshlarga shularni aytmoqchiman: “Ey aziz yoshlar! Siz ham daryodek shoshiling, yo‘lingizda uchraydigan har qanday to‘siq va qiyinchiliklarni mardonavor yengib o‘ting. Xonadoningizni, Vataningizni gullatib-yashnating. Aziz umringizni behuda ishlarga sarflab, so‘ldirib, so‘ngra pushaymon bo‘lmang! Zero, umrimiz ham suvdek oqmoqda. Shitob bilan o‘tayotgan umrimiz mobaynida odamlar qalbiga malham bo‘la oldikmi? Odamlar og‘irini yengil qilishga, ilm bilan o‘zimiz va yurtdoshlarimiz, insoniyatga manfaat beradigan nima ishlarni qildik? Qalbimizni imon suvi bilan sug‘ormoqdamizmi? Tashnaligimizni ilm bulog‘i bilan qondirmoq uchun nimalar qilmoqdamiz?
Toshdan-toshga urilib oqadi daryo,
Shovqin-suron solib oqadi daryo.
To‘sig‘u g‘ovlarni aylanib o‘tib,
O‘z maqsadi sari shoshadi daryo.
Dalayu dashtlarga tezroq yetay deb,
O‘tu o‘lanlarni serob etay deb.
Masrur etmoq uchun xalq, elatlarni,
To‘lqin urib qirg‘oqdan toshadi daryo.
Odamlar haqimga duo qilishsin,
Xizmatimni doim yodga olishsin,
Alloh uchun mendan rozi bo‘lishsin –
Debon shoshib-shitob oqadi daryo.
Ey inson, daryodek shijoatli bo‘l,
Odamlar qalbiga quvonch, surur sol.
Tog‘ uchrasa kemir, daryoni simir,
Elu yurting ko‘nglin aylagin daryo.
Dunyo sinoatidan g‘amlar chekmagil ,
Maqsadsiz urug‘ni aslo ekmagil.
Alisher der, elning duosin olib,
Kuyu qo‘shiqlarda oq misli daryo.
“Qasamini buzgan qiz” kitobidan
Iymon 
Namoz 
Ro'za 
Zakot 
Haj 
Qur'on 
Islom saboqlari 
Aloqa 
