Onaizor
Sut solingan kosa onaning qo‘lidan tushib ketib, sindi. O‘g‘il bor ovozi bilan onasiga baqirdi va g‘azab bilan xonani tark etdi. Ona kichik bir maktub bitdi. O‘g‘il ko‘chadan qaytganda ona odatdagidek kursida o‘tirgancha uxlar, maktub esa ko‘ksida turgan edi. O‘g‘il asta maktubni qo‘liga olib o‘qiy boshladi:
«O‘g‘lim, mehribonim, ko‘zimning quvonchi! Afsuski, men qarib qoldim. Qo‘llarim qaltirab, ovqat kiyimimga to‘kilib ketyapti. Endi oldingidek tetik, chiroyli, xushbo‘y emasman. Sendan iltimos, meni malomat qilmagin. Libos va poyabzalimni o‘zim kiya olmayapman. Iltimos, menga yordamlashgin. Oyoqlarim ham yurishga qiynalyapti. Tahorat qilish uchun hammomga borayotganimda, qo‘llarimda ushlab olgin. Sen yurishga harakat qilgan paytlaringda, yiqilib ketmasliging uchun qo‘llaringdan necha marta ushlab olganimni bir esla. Xotiram zaiflashib qolganidan va sekin gapirayotganimdan malollanma. Sen bilan gaplashganimda meni xursand qiladigan birgina narsa sening yoningda ekanimdir. Bolaligingda kulgularing bilan meni xursand qilarding. Bugun ham tabassumingni mendan darig‘ tutma. Men o‘limini kutib yashayotgan qariyaman. Seni tuqqanimda yoningda edim. Vafot etar chog‘imda sen ham yonimda bo‘lgin».
So‘zimiz oxirida Payg‘ambarimiz sollallohu alayhi vasallamdan kimga yaxshilik qilish lozimligi so‘ralganda, uch marta «Onangga!» deganlarini eslatib qo‘ymoqchimiz.
Ey Rabbim! Onalarimizni Jannatdan mahrum qilmagin! Umrlarini uzun, rizqlarini barakali, gunohlarini mag‘firat qilgin!
Nozimjon Iminjonov tayyorladi.
Istig‘for – ma’firat, rahmat va baraka kaliti!
Istig‘for insonning Alloh taolodan gunohlarini kechirishini so‘rashi va uning rahmatiga yuzlanishidir. Islom ta’limotida istig‘for nafaqat gunohlarning kechirilishiga, balki inson hayotida baraka, xotirjamlik va yaxshiliklar ko‘payishiga sabab bo‘luvchi amal sifatida ta’kidlangan.
Bir kishi Tobe’inlarning buyuk olimlaridan Hasan Basriy huzurlariga kelib: Ey imom! osmondan yomg‘ir yog‘mayapti, dedi.
U zot: Allohdan mag‘firat so‘rang (istig‘for ayting), – dedilar.
Keyin boshqa bir kishi kelib: Xotinim farzand ko‘rmayapti, – dedi.
U zot: Allohdan mag‘firat so‘rang, – dedilar.
Yana bir kishi kelib: hayot qiyinchiliklaridan, qashshoqlikdan shikoyat qilaman, – dedi.
U zot: Allohdan mag‘firat so‘rang, – dedilar.
Shunda majlisdagi kishilardan biri: Ajab ekan, ey imom! Kim qanday hojat bilan kelmasin, hammasiga istig‘for aytishni buyuryapsiz, – dedi.
Hasan Basriy bunday javob berdilar: Alloh taoloning ushbu so‘zini o‘qimadingizmi?
“Bas, Parvardigoringizdan mag‘firat so‘ranglar. Albatta, U o‘ta Mag‘firatlidir. Shunda U sizlarga osmondan ketma-ket yomg‘ir yog‘diradi. Mol-dunyo va farzandlar bilan madad beradi, sizlar uchun bog‘lar va anhorlar ato etadi” (Nuh surasi, 10–12-oyatlar).
O‘zbekiston musulmonlari idorasi
Masjidlar bilan ishlash bo‘limi mutaxassisi
Humoyuddin Xusniddin o‘g‘lining tarjimasi.
