Onaizor
Sut solingan kosa onaning qo‘lidan tushib ketib, sindi. O‘g‘il bor ovozi bilan onasiga baqirdi va g‘azab bilan xonani tark etdi. Ona kichik bir maktub bitdi. O‘g‘il ko‘chadan qaytganda ona odatdagidek kursida o‘tirgancha uxlar, maktub esa ko‘ksida turgan edi. O‘g‘il asta maktubni qo‘liga olib o‘qiy boshladi:
«O‘g‘lim, mehribonim, ko‘zimning quvonchi! Afsuski, men qarib qoldim. Qo‘llarim qaltirab, ovqat kiyimimga to‘kilib ketyapti. Endi oldingidek tetik, chiroyli, xushbo‘y emasman. Sendan iltimos, meni malomat qilmagin. Libos va poyabzalimni o‘zim kiya olmayapman. Iltimos, menga yordamlashgin. Oyoqlarim ham yurishga qiynalyapti. Tahorat qilish uchun hammomga borayotganimda, qo‘llarimda ushlab olgin. Sen yurishga harakat qilgan paytlaringda, yiqilib ketmasliging uchun qo‘llaringdan necha marta ushlab olganimni bir esla. Xotiram zaiflashib qolganidan va sekin gapirayotganimdan malollanma. Sen bilan gaplashganimda meni xursand qiladigan birgina narsa sening yoningda ekanimdir. Bolaligingda kulgularing bilan meni xursand qilarding. Bugun ham tabassumingni mendan darig‘ tutma. Men o‘limini kutib yashayotgan qariyaman. Seni tuqqanimda yoningda edim. Vafot etar chog‘imda sen ham yonimda bo‘lgin».
So‘zimiz oxirida Payg‘ambarimiz sollallohu alayhi vasallamdan kimga yaxshilik qilish lozimligi so‘ralganda, uch marta «Onangga!» deganlarini eslatib qo‘ymoqchimiz.
Ey Rabbim! Onalarimizni Jannatdan mahrum qilmagin! Umrlarini uzun, rizqlarini barakali, gunohlarini mag‘firat qilgin!
Nozimjon Iminjonov tayyorladi.
YUZDAN ZIYOD OILAGA KO‘MAK BЕRILDI
Sayyor yig‘ilish
Bir kishiga ko‘maklashsangiz, u qanchalik shod bo‘ladi.
Endi bir emas, o‘n emas, yuzdan ziyod oilaga ham ma’naviy, ham ma’rifiy, ham moddiy ko‘mak berilsa, qancha kishining ko‘ngli ko‘tarilishini, sizni alqashini tasavvur qilib ko‘ring-a.
Bugun Toshkent shahar bosh imom-xatibi Abduqahhor domla Yunusov boshchiliklarida poytaxtimizning Yangi hayot tumanidagi «Niyozmat ota» jome masjidida ma’naviy-ma’rifiy sayyor yig‘ilish o‘tkazildi.
Tadbirda Toshkent shahar bosh imom-xatibi o‘rinbosari Ergashali domla Rustamov, Toshkent shahar tumanlari bosh imomlari, imom-domlalar, «Haj 2026» ishtirokchilari qatnashdilar.
Tumandagi ijtimoiy-ma’naviy muhitni yanada sog‘lomlashtirish maqsadida mahallalarga tashrif buyurildi. Adashib aqidasi buzuq turli oqimlar ta’siriga tushib qolgan shaxslar, ajrim yoqasiga kelib qolgan oilalar bilan ham suhbatlar olib borildi.
Katta hayot tajribasiga ega hoji otalar, hoji onalar imom-xatiblar, otinoyilar bilan birgalikda olib borgan ma’rifiy targ‘ibotlari o‘z samarasini berdi: yuzdan ziyod xonadonga ham ma’naviy, ham moddiy yordam ko‘rsatildi.
* * *
Toshkent shahar bosh imom-xatibi Abduqahhor domla Yunusov Yangi hayot tumanidagi mahallalarga tashrif buyurib, u yerdagi bir qancha xonadonlarga kirib, xonadon egalarining qalblariga xursandchilik ulashdilar.
Quvonarlisi, yangi o‘quv yili arafasida homiylarni jalb qilgan holda 30 ta haqdor xonadon sohiblari farzandlariga sumka, o‘quv qurollari hadya etildi.
Yuzdan ziyod xonadon egalarining ko‘ngli ko‘tarilib, ular ezgu ishlarning boshida turgan barcha aziz insonlarning haqlariga xayrli duolar qilishdi.
Toshkent shahar vakilligi
Matbuot xizmati
