Transmilliy tahdidlar va ogohlikka da’vat
28.07.2018
3464
2 min.
Xalqaro Press-klubning 30 iyul – Butunjahon odam savdosiga qarshi kurash kuniga bag‘ishlangan maxsus sessiyasi mana shunday nomlandi.
Sessiyada Bosh prokuratura, Ichki ishlar vazirligi va boshqa qator vazirlik va idora vakillari, shuningdek, Birlashgan Millatlar Tashkilotining Narkotiklar va jinoyatchilik bo‘yicha boshqarmasining Markaziy Osiyodagi mintaqaviy vakolatxonasi rahbari Ashita Mittal ham ishtirok etdi.
O‘zbekiston Respublikasining 2017-2021 yillarga mo‘ljallangan harakatlar strategiyasining ustuvor yo‘nalishlaridan biriga ko‘ra diniy ekstremizm, terrorizm va uyushgan jinoyatchilikning boshqa shakllari bilan kurashish bo‘yicha tashkiliy va amaliy choralarni kuchaytirish orqali jinoyatchilikka qarshi kurash va jinoyatchilikning oldini olish tizimini takomillashtirish rejalashtirilgan.
Joriy yilning iyun oyida Birlashgan Millatlar Tashkilotining Narkotik va jinoyatchilik bo‘yicha boshqarmasi va O‘zbekiston Respublikasi Bosh prokuraturasi o‘rtasida transmilliy uyushgan jinoyatchilikka qarshi kurash sohasida hamkorlikni yanada kuchaytirish maqsadida o‘zaro anglashuv memorandumi imzolandi.
O‘zbekiston Respublikasi BMTning Transmilliy uyushgan jinoyatchilikka qarshi kurashish konvensiyasi va Odam savdosini oldini olish to‘g‘risidagi Protokolga (ayniqsa, ayollar va bolalar savdosini oldini olish) imzo qo‘ygan.
– Odam savdosi – transmilliy uyushgan jinoyatchilik hisoblanadi. Biz faqatgina global, mintaqaviy va milliy darajada hamkorlik orqali u bilan kurashishimiz mumkin. Ushbu sessiya O‘zbekiston hukumati, fuqarolik jamiyati va xalqaro hamjamiyatning mamlakatda va butun Markaziy Osiyoda odam savdosiga qarshi kurashish borasida hamkorlik qilish sa’y-harakatlarini muhokama qilish imkoniyatini berdi, – dedi Ashita Mittal.
Biroq, afsuski, butun dunyoda odam savdosi qurboniga aylanayotgan insonlar soni kundan kun ortib bormoqda.
– Yurtimizda odam savdosi qurboniga aylanib qolayotganlarning ko‘pchilik qismini ayollar va bolalar tashkil qiladi. Yurtimizda 6 oy ichida jami 60 dan ortiq odam savdosi bilan bog‘liq jinoyat holatlari aniqlangan bo‘lib, shundan 161 ta kishi jabrlangan, – dedi Ichki ishlar vazirligi Terrorizm va ekstremizmga qarshi kurashish bosh boshqarmasi Odam savdosi va noqonuniy migratsiyaga qarshi kurashish boshqarmasi bo‘lim boshlig‘i Murat Rayimov.
– Bugun respublikamiz fuqarosi bo‘lgan 263 mingga yaqin ayollar chet elga uzoq muddatga chiqib ketgan. O‘tgan 6 oy ichida ularning 139 mingga yaqini o‘z uyiga qaytarildi. Birgina Samarqand viloyatida xorijga uzoq muddatga chiqib ketgan ayollar soni 117 mingdan ortiqni tashkil etadi, – deydi O‘zbekiston Xotin-qizlar qo‘mitasi bo‘lim boshlig‘i Dilorom Qo‘ziyeva.
I.Ahatova, O‘zA
MА`LUMOTNI IJTIMOIY TАRMOQLАRDА ULАSHING
Iymon 
Namoz 
Ro'za 
Zakot 
Haj 
Qur'on 
Islom saboqlari 
Aloqa 