Boqiy dunyo sari shoshgan munisginam
She’r nega yoziladi? Qalb dardga to‘lsa. Dardsiz yozilgan she’r qanchalik mahorat bilan yozilmasin tinglovchining qalbiga yetib bormaydi. Chunki qalbdan chiqqan so‘z qalbga yetadi.
Azim poytaxtimizning Qushqo‘rg‘on mahallasida yashaydigan nihoyatda ajoyib qaynona-kelinni bundan to‘rt yillar burun ko‘rgan edim. Allohning marhamati ila uylaridan bir piyola choy ichish ham nasib etgandi o‘shanda.
Ana o‘sha qaynona – Salima opa yaqinda, muborak ramazon oyida qazo qildi. Qaynonasining vafotidan qattiq ta’sirlangan kelini unga atab marsiya yozibdi.
Mutaxassisligi muhandis bo‘lgan Latofatxon Kamolova, menimcha, yozgan bayotining qaysi janrga oid bo‘lishini o‘ylab ham ko‘rmagan, u faqat yuragiga sig‘magan dardni qog‘ozga tushirgan, xolos.
Kelinining qalbida shunchalik muhabbat uyg‘ota olgan qaynonaga, qaynonasini shu qadar yuksak ehtirom ila sevgan kelinga tasannolar aytsak kam. Umid qilamizki, nega bunday deyayotganimiz hammaga ayon...
Bu – yuksak mahorat ila she’riyatning barcha nizomu qoidalarini joyiga keltirib yozilgan pishiq-puxta marsiya degan fikrni aytishdan yiroqmiz. Bu – sof ko‘ngil ila har qanday riyodan, soxtakorlikdan holi bo‘lgan samimiy sog‘inch ifodasidir.
Damin JUMAQUL
Go‘zal xulqli, sabrligim, mushtiparim,
Yuzi nurli, chiroyligim, chaqqonginam.
Xotirada doim saqlang meni deya,
Boqiy dunyo sari shoshgan munisginam.
Farzandlarga bino qo‘ygan farishtamsiz,
Uylarimiz bezaguvchi sarishtamsiz.
Ayollarning doim oldi bo‘lib yurgan,
Boqiy dunyo sari shoshgan munisginam.
Kelin bo‘lib xizmatingiz qilolmadim,
Sizdan ko‘ra xayrixohni topolmadim.
Bolalarim sizdek xursand qilolmadim,
Boqiy dunyo sari shoshgan munisginam.
Ishdan kelsam, kutib oluvchim edingiz,
Onam kabi yaqin ko‘rgan Onamdingiz,
Endi bizdan ko‘nglingiz to‘q bo‘lib keting,
Boqiy dunyo sari shoshgan munisginam.
Baytullohda mehmon bo‘lgan hoji onam,
Hijoblarni go‘zal qilib taqqanginam.
Barchamizni ibodatga solganginam,
Boqiy dunyo sari shoshgan munisginam.
Endi diydor Mahshargohda, ko‘rishguncha,
Farzandlarim ilmlarga tushvolguncha,
Qorilardan xatmlarni kutib turing,
Boqiy dunyo sari shoshgan munisginam.
Bolalariga bosh bo‘lgan xokisorginam.
Yo‘ldoshini izlab borib topganginam!..
Latofat KAMOLOVA
Saudiya Arabistonida o‘tkazilayotgan xalqaro Qur’on tanlovida 133 davlat vakillari ishtirok etmoqda
Qirol Abdulaziz nomidagi Qur’oni karimni yod olish, o‘qish va sharhlash bo‘yicha qirq oltinchi xalqaro tanlovning saralash bosqichi 7 avgust kuni Makka shahridagi musobaqalar o‘tkaziladigan joyda 133 davlatdan 334 nafar ishtirokchi (erkak va ayollar) ishtirokida boshlandi.
IQNA "Minbar" gazetasiga tayanib xabar berishicha, Qirol Abdulaziz nomidagi Qur’oni karimni yod olish, o‘qish va sharhlash bo‘yicha qirq oltinchi xalqaro tanlovning saralash bosqichi bir kun avval Makkadagi musobaqalar o‘tkaziladigan joyda boshlangan va final bosqichini Masjidul Haromda o‘tkazish uchun zamin tayyorlagan.
Saudiya Arabistoni Islom ishlari, da’vat va hidoyat vazirligi tomonidan tashkil etilgan ushbu tadbirning saralash bosqichida hakamlar hay’atlari eng yuqori aniqlik va shaffoflik standartlariga rioya qilgan holda, Qur’on tilovati uslublari va qoidalariga ixtisoslashgan taniqli xalqaro hakamlar guruhi nazorati ostida erkak va ayol ishtirokchilarning chiqishlarini tinglab, final bosqichiga kimlar o‘tishini aniqladi.
Tanlovning joriy bosqichi 133 mamlakatdan 334 nafar ishtirokchi (erkak va ayollar) ishtirokida o‘tkazilmoqda, ular besh toifa: "Shatibiya" usuli bo‘yicha yetti xil qiroat asosida Qur’oni Karimni to‘liq yodlash (qiroat va nazariy bilimlarni, shuningdek, tajvid qoidalarini a’lo darajada bajarish va rioya qilishni o‘z ichiga oladi); a’lo darajada ijro etish, tajvidga rioya qilish va so‘zlarni sharhlash bilan Qur’oni Karimni to‘liq yodlash; a’lo darajada ijro etish va tajvidga rioya qilish bilan Qur’oni Karimni to‘liq yodlash; a’lo darajada ijro etish va tajvidga rioya qilish bilan ketma-ket o‘n beshta juzni yodlash; a’lo darajada ijro etish va tajvidga rioya qilish bilan ketma-ket beshta juzni yodlash bo‘yicha bellashmoqda.
Vazirlik ushbu global qur’oniy tadbirning muvaffaqiyatini ta’minlash uchun elektron hakamlik tizimini joriy etish, ishtirokchilarni baholashda adolat va aniqlikni ta’minlash uchun tashkiliy va keng qamrovli platformani yaratish, shuningdek, ularga turli xil xizmatlarni taqdim etish kabi barcha imkoniyatlarini ishga solishda davom etadi.
Qirol Abdulaziz nomidagi xalqaro musobaqa dunyodagi eng yirik Qur’on musobaqalaridan biri hisoblanib, uning umumiy pul mukofotlari miqdori 10 million saudiya rialidan oshadi.
Mazkur musobaqada O‘zbekiston sharafini "Mir Arab" o‘rta maxsus islom ta’lim muassasasi, "Sayyid Muhiddin maxdum" o‘rta maxsus islom ta’lim muassasasi, Imom Buxoriy nomidagi Toshkent islom instituti hamda "Xadichai Kubro" qizlar o‘rta maxsus islom bilim yurti talabalari himoya qilishi haqida avval xabar berilgan edi.
O‘zbekiston musulmonlari idorasi Matbuot xizmati
