Har bir inson o‘zidagi bir qancha xususiyatlar bilan boshqa insonlardan ajralib turadi. Bu esa uning yer yuzida evolyutsiya yoki tasodif natijasida paydo bo‘lib qolmaganiga dalildir. Keling, insonning mo‘jizaligi haqida so‘z yuritaylik.

Sizlarga yangi ilmiy xulosalarni taqdim etgim keldi. Bu xulosalar insonning har bir a’zosi o‘sha insonning o‘ziga xos, betakror ekanini, boshqa insonning o‘shanday a’zosiga aslo o‘xshamasligini ta’kidlaydi. Insonni boshqa insonlardan ajratib turadigan narsa faqatgina barmoq izlari emas. Balki quloq chiziqlari, tildagi chiziqlar, yurishdagi o‘ziga xoslik va boshqa a’zolarning izlari, chiziqlari, shakllari yaratishning o‘ta nozikligiga va tasodif degan narsa yo‘qligiga guvohlik beradi.

Evolyutsiya nazariyasi yolg‘on va evolyutsiyachilar yolg‘onchilardir. Buning yolg‘onligiga eng katta dalillardan biri – har bir insonning o‘ziga xos yaratilgani va uning boshqalarga o‘xshamasligidir. Agar biz evolyutsiya nazariyasiga yoki narsalar tasodifan paydo bo‘lib qolgan degan gapga ishonadigan bo‘lsak, ko‘zimiz bilan ko‘rib, qo‘limiz bilan ushlab turgan haqiqatlardan ko‘z yumishimiz kerak bo‘ladi.

Kelinglar, evolyutsiya nazariyasining yoki tasodifan paydo bo‘lib qolgan degan gaplarning yolg‘onligini ko‘rsatuvchi dalillarni ko‘rib chiqaylik.

Quloq chiziqlari

Tadqiqotlar shuni ko‘rsatdiki, tashqi quloq shakli mutlaqo boshqalarnikiga o‘xshamas ekan. Insonning qulog‘i bemalol barmoq o‘rniga o‘tib, shaxslarni tanib olish belgisi bo‘la oladi. Hatto quloq chiziqlari, shakli shaxsni tanib olishning eng afzal yo‘liga aylandi.

Sautgempton universiteti xulosasiga ko‘ra, insonning tashqi quloq shaklini barmoq izlari kabi suratga olinsa, 99.6 foizga bir insonning qulog‘i boshqanikiga o‘xshamagan holda tasviri paydo bo‘lar ekan.

Ko‘zdagi o‘ziga xoslik

Bir insondagi ko‘z qorachig‘ining shakli boshqa insonnikidan farq qilar ekan. Hatto bir-biriga ikki tomchi suvdek o‘xshash bo‘lgan egizaklarda ham shunday ekan. Shuning uchun ham biz ishonch bilan aytamizki, yer yuzidagi har bir insonning ko‘z tuzilishi boshqalarnikidan farq qiladi. Ko‘zlarning betakror, o‘ziga xos ekani inson tasodifan paydo bo‘lib qolmaganiga, balki, Buyuk Yaratuvchi tomonidan aniq maqsad bilan yaratilganiga dalildir.   

Tildagi chiziqlar

Til yuzasida tarqalgan ushbu nuqtalar o‘zining shakli, hajmi bilan boshqa insonlarning tillaridagi nuqtalardan farq qiladi. 

Yurishning o‘ziga xosligi

Shaxslarning yurishlari va harakatlarini o‘rganish ularni ko‘plab odamlar orasidan tanib olishga yordam beradi. Shuning uchun ayta olamizki, har bir inson o‘ziga xos tarzda yuradi va qadam tashlashi bilan boshqalardan ajralib turadi. Bu – nafaqat har bir inson, balki, insondagi har bir a’zo, bo‘g‘imlar, suyaklar ham boshqa insonlarnikiga o‘xshamaydigan qilib yaratilgani sabablidir.

Agar insonning paydo bo‘lishi tasodifiy yoki evolyutsiya natijasida bo‘lganida edi, uning a’zolaridan birortasi boshqa insonning a’zolaridan birortasiga aynan o‘xshash bo‘lib qolardi. Ozgina bo‘lsa ham o‘xshashlik yo‘qligi – insonni Alloh taolo aniq maqsad bilan yaratganiga dalolat qiladi. 

Barmoq izlari

Barmog‘ingizdagi izlar boshqa birorta insonda uchramaydi. Ayrim g‘arblik “olimlar” barmoq izlarini tasodifan paydo bo‘lgan deyishadi. Agar tasodifan paydo bo‘lganida, hech bo‘lmaganda, bir marta barmoqlarda aynan o‘xshashlik kuzatilgan bo‘lar edi. 

Ovozlardagi o‘ziga xoslik

Ovozingiz sizni kimligingizni, mohiyatingizni belgilaydigan unsurdir. Har bir insonning ovozi o‘ziga xos bo‘lib, birovning ovoziga boshqanikiga aynan o‘xshamaydi. Shuning uchun ham ovoz orqali shaxsning kimligini aniqlash mumkin. Ovozlardagi bu turfaxillik tasodifiy tarzda bo‘lishi aslo mumkin emas. Agar tasodifiy bo‘lganda, eng kamida ikkita odamning ovozi aynan o‘xshash bo‘lib qolardi. Alloh taolo har bir insonga o‘ziga xos o‘ta nozik va hayratlanarli darajada ovoz ato etgan. 

Inson hidining o‘ziga xosligi

Har bir insonning genlariga bog‘liq bo‘lgan o‘ziga xos hidlari bor. Olimlar “Itlar 300 dan ortiq unsurdan tashkil topgan inson hidlarini bir-biridan ajrata oladi” deb o‘ylashadi. Shunday qilib har bir insonning o‘ziga tegishli muayyan hidi bor. Bu hid insonning ruhiy holati, yoshi, salomatligi va boshqa jihatlariga ko‘ra bir insonning hidi boshqasinikidan farq qiladi. Shu bilan birga erkak bilan ayol hidi o‘rtasida ham farq bor. Shunday qilib biz insonlarda milliardlab hidlar bor.

Shuningdek, har bir insonning o‘zigagina xos bo‘lgan yana ko‘plab izlari bor. Masalan, miya izi, miyadan taraladigan elektromagnit to‘lqinlari, yurakning izlari, urishi, tomirlardagi izlar (har bir insonning tomiri o‘ziga xos tarzda yaratilgan) va boshqa a’zolarda o‘ziga xos izlar bo‘lib, inson shu izlari bilan boshqa insonlardan farq qiladi.

Bu Allohning mo‘jizasidir!

Insonning har bir a’zosini, ularning izlarini, hidlarini Alloh taolo turlicha qilib yaratgan. Alloh taolo Qur’oni Karimda barmoq izlari haqida shunday degan:

 أَيَحْسَبُ الْإِنسَانُ أَلَّن نَجْمَعَ عِظَامَهُ بَلَى قَادِرِينَ عَلَى أَن نُّسَوِّيَ بَنَانَهُ

“(Kofir) Inson Bizni, uning suyaklarini jamlay olmas, deb o‘ylarmi? Ha, Biz uning barmoq uchlarini ham asl holiga keltirishga qodirmiz” (Qiyomat surasi, 3-4-oyatlar). 

Inson va boshqa narsalarning tasodifan paydo bo‘lib qolmaganiga ilmiy dalil 

Keling, bugungi kunimizdan bir misol keltiraylik. Banklar bilan aloqa qiluvchi insonlarda plastik karta bo‘ladi. Har bir plastik kartaning o‘z raqami bo‘lib, undagi raqam boshqa plastik kartada bo‘lmaydi. Bordiyu ikkita bir xil raqamli plastik karta bo‘lsa, ularga pul tushirish va undan pul yechib olishda ko‘plab muammolar kelib chiqadi. Shuning uchun banklar har bir kartaga o‘ta katta diqqat-e’tibor bilan raqam terib chiqadi. Shu orqali karta raqamlari bir xil bo‘lib qolmaslik va soxta kartalar paydo bo‘lmasligining chorasi ko‘riladi. Agar kartalarni raqamlash ishiga e’tiborsiz bo‘lib, u tasodifiy tarzda bo‘lganida edi, minglab kartalar bir xil raqamli bo‘lib qolar va buning oqibatida katta-katta muammolar yuzaga kelgan bo‘lardi.

Agar g‘arblik ba’zi “olimlar”ga “Plastik karta yoki kredit karta, ularda birorta o‘xshash raqami bo‘lmasa ham, evolyutsiya nazariyasiga binoan tasodifiy ravishda raqamlanib qolgan” deyilsa, ular bu gapni aytgan odamning ustidan kulib, uni masxara qilgan bo‘lardilar.

Subhanalloh!

Bir vaqtning o‘zida ular har bir insonda boshqalardan ajratib turuvchi, boshqa insonlarda o‘xshashi bo‘lmagan xususiyatlar borligini qabul qiladilar, shu bilan birga bu xususiyatlar tasodifiy ravishda, ko‘r evolyutsiya natijasida paydo bo‘lib qolgan deydilar. Ular o‘z aqllarini hurmat qiladilarmi o‘zi?!

Alloh taolo ularga o‘xshagan kimsalarga xitob qilib shunday degan:

أَمْ تَأْمُرُهُمْ أَحْلَامُهُم بِهَذَا أَمْ هُمْ قَوْمٌ طَاغُونَ أَمْ يَقُولُونَ تَقَوَّلَهُ بَل لَّا يُؤْمِنُونَ فَلْيَأْتُوا بِحَدِيثٍ مِّثْلِهِ إِن كَانُوا صَادِقِينَ  أَمْ خُلِقُوا مِنْ غَيْرِ شَيْءٍ أَمْ هُمُ الْخَالِقُونَ أَمْ خَلَقُوا السَّمَاوَاتِ وَالْأَرْضَ بَل لَّا يُوقِنُونَ

“Yo aqllari shunga buyurarmi yoki ular tug‘yonga ketgan qavmlarmi? Balki, u(Qur’on)ni o‘zi to‘qidi, derlar? Yo‘q, ular iymon keltirmaslar. Agar ularning gapi rost bo‘lsa, u(Qur’on)ga o‘xshash so‘zni keltirsinlar. Balki, ular hech narsadan hech narsa yo‘q o‘zlari yaralgandirlar?! Yoki ular yaratuvchilarmi? Balki, ular osmonlaru yerni yaratgandirlar?! Yo‘q, ular ishonmaslar (Tur surasi, 32-36-oyatlar).

Har bir insonni o‘ziga xos, boshqa insonlarga o‘xshamaydigan, betakror qilib yaratgan va uni maxluqotlarning gultoji, mukarrami qilib qo‘ygan Alloh taologa cheksiz hamdu sanolar bo‘lsin! 

Abduddoim Kahelning maqolasini

Nozimjon Iminjonov tarjima qildi