Hayit kuni nafl ro‘za tutsa bo‘ladimi?
Savol: Qaysi kunlari nafl ro‘za tutish makruh bo‘ladi?
Javob: Ashuro kunida (Muharram oyining o‘ninchi kuni) to‘qqizinchi yo o‘n birinchi kunini qo‘shmay ikkala hayit kuni va tashriq kunlari (qurbon hayitidan keyingi uch kun), faqat juma kuni, faqat shanba kuni ro‘za tutish makruh bo‘ladi. Lekin kunora ro‘za tutishni odat qilib olgan kishilar uchun u ikki kunda nafl ro‘za tutish makruh bo‘lmaydi.
Payg‘ambarimiz (sollallohu alayhi va sallam): «Alloh taologa eng sevikli ro‘za Dovud (alayhissalom)ning ro‘zasidir. Dovud (alayhissalom) bir kun ro‘za tutar, bir kun tutmas edilar», deganlar (Imom Termiziy rivoyati).
Shuningdek, shak kuni ro‘za tutish ham makruhdir.
"So‘ragan edingiz" kitobi asosida tayyorlandi
O‘MI Matbuot xizmati
Diniy ta’lim sohasida ilk bor Respublika anjumani bo‘lib o‘tadi
Joriy yilning 19-20 avgust kunlari O‘zbekiston musulmonlari idorasi tasarrufidagi oliy va o‘rta maxsus diniy ta’lim muassasalari professor-o‘qituvchilarining «Zamonaviy diniy ta’lim: pedagogika, ilm-ma’rifat va innovatsiya» nomli I ilmiy-amaliy anjumani Islom sivilizatsiyasi markazida bo‘lib o‘tadi.
Davlatimiz Rahbari tomonidan har jabhada olib borilayotgan yangilanish va islohotlarga hamohang tarzda Diniy idora tarixida ilk bor o‘tkazilayotgan ushbu tadbirda jami 700 nafar pedagog va soha mutaxassisi, jumladan, 300 nafar ishtirokchi bevosita anjuman zalida, 400 nafar ishtirokchi esa hududlardan videoselektor orqali qatnashadi.
Anjumandan ko‘zlangan maqsad sohadagi istiqbolli rejalarni muhokama qilish, diniy ta’limda pedagogik va kasbiy mahoratni oshirish, ta’lim jarayoniga zamonaviy texnologiyalarni yanada keng tatbiq etish hamda diniy ta’limni yangi bosqichga olib chiqishdir.
Dastur doirasida soha rahbarlari ishtirokida tahliliy ma’ruzalar, taniqli professorlar tomonidan mahorat darslari, ilmiy-metodik mashg‘ulotlar bo‘lib o‘tadi. Shuningdek, ishtirokchilar O‘zbekiston musulmonlari idorasi, Islom sivilizatsiyasi markazi bilan yaqindan tanishib, Hazrati Imom majmuasidagi tarixiy qadamjo va obidalarni ziyorat qilishadi.
O‘zbekiston musulmonlari idorasi Matbuot xizmati
