Ukraina musulmonlari diniy idorasi taklifiga binoan Toshkent shahridagi “Ibrohim ota” masjidi imom-xatibi Xudoyberdi qori Saidov Ukrainaning Kiyev shahrida joylashgan “Ar-rahma” jome masjidida musulmonlarga xatmi Qur’on o‘tkazib berayotganlari haqida xabar bergan edik.
Qori domlaning bizga xabar berishlaricha, 22 kun davomida Qur’onni to‘liq xatmi qilindi. Alloh bu natijani muborak qilsin va O‘z dargohida husni qabul etsin. Qadr kechasida o‘tkazilgan marosimda vakilimiz Ukraina musulmonlari idorasining maxsus Tashakkurnomasi bilan taqdirlandilar. Bu haqda O‘MI Toshkent shahar vakilligi Matbuot xizmati xabar berdi.
Ayni paytda qorimiz yana bir nufuzli tadbirda ishtirok etmoqdalar. Ukraina musulmonlari idorasi huzuridagi “al-Mohir” Qur’on yodlash bo‘limi talabalari o‘rtasida o‘tkazilayotgan Qur’on tilovati musobaqalarida hakam sifatida, qorilarning chiqishlarini baholab bormoqdalar.
O‘MI Matbuot xizmati
#xabar #haj2025
Bugun, 12 iyun kuni erta tongda yurtimiz hojilarining ilk guruhlari yurtimizga yo‘l olishdi.
Aytib o‘tish joiz, bu yilgi haj mavsumi har qachongidan ham fayzli, shukuhli o‘tdi. Haj arkonlarini bajarish uchun yurtimiz mo‘min-musulmonlariga Madinai munavvara, Makkai mukarramada yaratilgan shart-sharoitlarga ko‘plab musulmonlarning havasi kelganiga barcha guvoh bo‘ldi.
Ayniqsa, mehmonxonalar, Mino, Arafot vodiylaridagi qulaylik va imkoniyatlar, tibbiy va transport xizmatlari barchani mamnun etdi.
Endilikda ibodatlarni huzurlanib ado etgan, yuz-ko‘zlari porlagan, peshonalaridan nur balqigan hojilarimizning dastlabki guruhi diyorimizga qaytishmoqda.
Alloh taolo hojilarimizning hajlarini qabul aylasin. Farzandu anjumandlari bag‘riga eson-omon yetib olishsin.
O‘zbekiston musulmonlari idorasi
Matbuot xizmati