Bangladesh rahbari islom tsivilizatsiyasini qayta tiklash mumkinligini ta'kidladi
Bangladesh Bosh vaziri Shayxa Hasina musulmon olamiga Islom ummatining ilmiy kashfiyotlar va yutuqlar bo'yicha katta merosi borligini eslatib, buni qayta tiklash uchun ilm-fan va texnologiyaga ko'proq mablag' ajratishga chaqirdi.
“Musulmonlar bir paytlar ilm-fan, texnika, adabiyot va madaniyatda o'zlarining ilg'or ekanligini namoyish etgan. Lekin nega musulmonlar hozir o'zlarining shonli o'tmishlaridan ancha orqada? Biz buni tahlil qilishimiz kerak”, - dedi Bangladesh rahbari. Ushbu xabarni “Islamnews” matbuoti “Anadolu” agentligiga tayanib ma'lum qilgan..
Bosh vazirning so'zlariga ko'ra, jahon miqyosida musulmonlar katta moliyaviy boylikka ega, musulmon mamlakatlarida mafkuraviy birlikning yo'qligi Islom tsivilizatsiyasining zaif tomoni hisoblanadi.
“Biz, musulmon xalqlari, ilm-fan va zamonaviy texnologiyalarni rivojlantirish uchun ushbu manbalardan foydalanish orqali yo'qolgan merosimizni qayta tiklashimiz mumkin”, dedi Shayxa Hasina.
Bangladesh hukumati rahbari Islom Texnologiya universitetida va Islom hamkorlik tashkiloti (IHT) hamkorligida tashkil etilgan tadbirda shunday fikr bildirdi.
O'MI Matbuot xizmati
O‘zbekiston musulmonlari idorasida navbatdagi “Fuqarolar qabuli” bo‘lib o‘tdi
Har haftaning chorshanba kuni O‘zbekiston musulmonlari idorasida an’anaviy tarzda tashkil etiladigan fuqarolar qabuli bu safar ham aholi vakillarining murojaatlarini o‘rganish, muammolarga yechim topishga qaratildi.
Joriy haftadagi qabulda O‘zbekiston musulmonlari idorasi raisi o‘rinbosari Muhammadolim domla Muhammadsiddiqov poytaxtimizdan hamda yurtimizning turli shahar va tumanlaridan tashrif buyurgan fuqarolarning shaxsiy va jamoaviy masalalari, taklif va mulohazalarini tingladi.
- - Aholi vakillari tomonidan turli masalalar bo‘yicha shar’iy hukmlar, ularning amaliy tatbiqlari yuzasidan savollar berildi;
- - Nikoh, oilaviy munosabatlar, farzand tarbiyasi kabi mavzulardagi murojaatlar ko‘rib chiqildi;
- - Ayrim ehtiyojmand fuqarolar tomonidan tushgan moddiy ko‘mak so‘rovlari tegishli tartibda ko‘rib chiqilishi belgilandi;
- - Sohani yanada rivojlantirish, masjidlarni obod qilish, yoshlar o‘rtasida ilmiy-ma’rifiy targ‘ibotlarni kuchaytirish kabi bir qator konstruktiv takliflar bildirildi.
Qabul yakunida mas’ullarga aniq topshiriqlar berilib, fuqarolar murojaatlarini tezkor va adolatli hal etish bo‘yicha choralar belgilandi. Shu bilan birga, fuqarolar bilan bevosita muloqot qilish, ularning fikrlarini eshitish va islohotlarga jamoatchilikni faol jalb etish borasidagi ishlar doimiy e’tiborda ekani ta’kidlandi.
O‘zbekiston musulmonlari idorasi
Matbuot xizmati
