Olmazor namunali tuman bo‘ladi
Yurtimizdagi islohotlardan ko‘zlangan maqsad – xalqimizning talab va ehtiyojlarini qondirish va odamlarimizni rozi qilishdan iborat. Ana shu ulug‘vor niyat yo‘lida olib borilayotan ishlar ko‘lami kundan-kun ortib bormoqda. Muhtaram Prezidentimiz tashabbusi bilan “Obod qishloq”, “Namunali tuman” dasturlari asosida tuman va qishloqlar aholisining hayotida yangi sahifalar ochilmoqda. Endilikda Toshkent shahri Olmazor tumanini namunali tumanlardan biriga aylantirish maqsad qilindi.
Shu munosabat bilan bugun O‘zbekiston musulmonlari idorasi raisi, muftiy Usmonxon Alimov hazratlari va Din ishlari bo‘yicha qo‘mita raisi Jasur Akramov boshchiligidagi ishchi guruhlar aholi bilan muloqot qilish, namozxonlar bilan samimiy suhbatlar o‘tkazish niyatida Olmazor tumanida amaliy ishlar boshlab yuborildi.
Muftiy Usmonxon Alimov hazratlari tuman bosh imom-xatibi Sadriddin Abdurashidov, “Nosirxon” jome masjidi imom-xatibi Abduhakim qori Matqulov hamrohligida tumandagi jomelarga tashrif qilishdi. Tashrif tumandagi “To‘lqin Akrom o‘g‘li” jome masjidi qavmi bilan dildan suhbat qurish bilan boshlandi.
Mo‘ysafid otaxonlarni muftiy hazratlari muborak Ramazon oyining oxirgi dahasi bilan qutlab, ibodatu iltijolar ijobat bo‘ladigan damlarni g‘animat bilishga chaqirdilar. Muftiy hazrat so‘zlarida davom etib, bu kunlarning qadriga yetish, muhtaram Prezidentimiz tashkil etib berayotgan shart-sharoitlar uchun minnatdorlik bildirish, Parvardigorga hamdu sanolar aytish, duolar qilishimiz darkorligini so‘zladilar.
Muftiy hazrat Olmazor tumanini namunali tumanga aylantirish tashabbusini davlatimiz Rahbari ilgari surganlarini ma’lum qilib, mazkur tumandagi masjidlar, ziyoratgohlar va tabarruk maskanlarni obod etish, aholining diniy-ma’rifiy ehtiyojlarini ta’minlash maqsadida, diniy soha xodimlari, ulamolar va imom-xatiblar ushbu tumanga safarbar etilganini xabar qildilar.
Uchrashuvda muftiy hazratlari mo‘min-musulmonlarning tashvishlarini bartaraf etish, turli ro‘yxatlardan chiqarilgan kishilarni jamiyatga kirishib ketishlariga ko‘maklashishni davlatimiz Rahbari bosh vazifa qilib qo‘yganini izohladilar. O‘z navbatida masjidlar qavmlari a’zolari ham o‘zlarining bugungi kundagi islohotlariga doir fikr-mulohazalarini bildirishdi.
“To‘lqin Akrom o‘g‘li” jome masjidi qavmi a’zosi Mirshohid ota Alimov muhtaram Prezidentimiz olib borayotgan oqilona siyosatdan namozxonlar cheksiz minnatdor ekani, aholining kayfiyati juda ham yuqori bo‘layotgani, ayniqsa, taroveh namozlari, Qur’on xatmlaridan juda ham mamnunligini izhor qildi. Mirshohid ota so‘zining yakunida ushbu xayrli ishlarga bosh bo‘lgan muhtaram Prezidentimiz, muftiy hazratlari va barcha mutasaddilar haqqiga duolar qildi.
Masjid imom-xatibi Sahobiddin domla Sotimov masjidni obod etish, namozxonlarni ahil-inoqligini ta’minlash va ularning ilm-ma’rifatlarini oshirish borasida jonbozlik ko‘rsatayotganini masjid qavmi alohida ta’kidladilar.
Navbatdagi tashrif tumandagi “Mirza G‘olib” jome masjidiga bo‘ldi. U yerda muftiy hazratlari namozxonlar bilan birga peshin namozini ado etib, so‘ng ular bilan samimiy suhbat qurdilar.
Hazrat so‘zlarining avvalida, jumladan bunday dedilar:
– Mana shunday saodatli kunlarda Alloh taboraka va taolodan tutgan ro‘zalarimiz qabul, ibodatlarimiz maqbul va duolarimiz mustajob bo‘lishini so‘raymiz. Allohga shukrki, ushbu sharofatli oy bu yil diyorimizda juda ham fayzli, qutli-barakali bo‘ldi. Ikki mingdan ortiq masjidlarda taroveh namozlari, mingdan ziyod jomelarda Qur’on xatmlari ado etildi. Ramazon kechalarida musulmonlarimiz ushbu oyning ziynati bo‘lgan taroveh namozlarida ishtirok qildilar. Rasululloh sollallohu alayhi va sallam bu oyning kechalarini ibodat ila o‘tkazganlarga xushxabarlar borligini aytganlar. Xususan, hadisi shariflarning birida: “Kim Ramazon kechalari imon bilan, savob umidida qoim bo‘lsa, o‘tgan gunohlari kechiriladi”, deb marhamat qilingan.
Muftiy hazratlari so‘zlarini yakunlagandan keyin masjid jamoasini qiziqtirgan savollarga javob berdilar. Suhbatlar samimiy ruhda, nihoyatda fayzli bo‘ldi.
Olmazor tumaniga tashrif davom etmoqda.
O‘zbekiston musulmonlari idorasi Matbuot xizmati
"Kim o‘zini tanisa..."
Hayotda ko‘pincha to‘g‘ri yo‘nalish emas, balki tezlashish o‘rgatiladi. Tezroq yurish, tezroq yetib borish, hamma narsani tezroq bajarish... Lekin hech kim to‘xtab: “Bunchalik shoshilishdan maqsad nima?” deb so‘ramaydi. Inson tinimsiz harakatda bo‘lishni erishish, tabiiy hayot tarzi deb o‘ylab, sarflanayotgan umri evaziga aslida nimaga erishayotgani haqida o‘ylamay qo‘yadi.
Ba’zan yo‘lni yo‘qotdik, deb o‘ylaymiz. Holbuki, yo‘qoladigan narsa yo‘l emas, balki to‘g‘ri yo‘nalishdir. Bu yo‘nalish xaritadagi chiziqlar yoki telefondagi yo‘l ko‘rsatkich emas, balki Alloh taolo borlig‘imizga jo qilgan ichki yo‘naltirgich, ya’ni fitratimizdir.
Bu ichki yo‘naltirgich ba’zan to‘g‘ri tomonni ko‘rsatmayotgandek tuyuladi. Dunyo tashvishlari, nafs istaklari ko‘payib ketganida, u sarson bo‘ladi yo qotib qoladi. Shunda biz uni buzildi deb o‘ylaymiz. Lekin fitrat buzilmaydi, shunchaki biz unga ahamiyat bermay qo‘ygan bo‘lamiz. Ba’zilar bu yo‘naltirgichni boshqalarning qo‘liga berib qo‘yadi...
Yo‘nalishini yo‘qotgan odam to‘g‘ri yo‘lga qaytishi kerak. Bu qaytish shunchaki bir manzilga qaytib borishmas, balki ichki dunyomizdagi tarqoqlikni jamlash, fitratimizga qaytishdir. Shunda inson dunyoning “hammasiga erishish” vasvasasidan xalos bo‘ladi. O‘tmishdagi xato va sinovlardan ibrat oladi, ammo ularni o‘ziga og‘ir yuk qilib olmaydi. Boshqalardan va hayotdan juda ko‘p narsa kutishni to‘xtatadi...
Haqiqiy xotirjamlik – hamma narsa mukammal bo‘lishi deganimas. Inson o‘z harakat doirasi chegarasiga yetganida Allohning qazo va qadariga rozi bo‘lsa xotirjamlik topadi. Bu loqaydlik emas.
Musulmon kishi ham xursand bo‘ladi, qayg‘uradi, boshqalar kabi yashaydi. Lekin u o‘tkinchi tuyg‘ular, orzu-havaslar aro sarson bo‘lib qolmaydi. Chunki dunyodagi har bir holat vaqtinchalik sinov ekanini yaxshi anglaydi.
Inson o‘zligiga qaytganida boshqalarning yukini yelkasiga olishga urinmaydi. Yordam beradi, lekin har kim o‘z qismati va qilmishi uchun o‘zi mas’ul ekanini tushunadi. Boshqalarning aybiga qaramay, o‘z xatolarini tuzatish bilan band bo‘ladi. Muhimi, har ishida shoshqaloqlik qilmaydi. Chunki oxiratga va ma’naviy kamolotga eltuvchi yo‘lni shoshib bosib o‘tib bo‘lmasligini biladi.
Aytilganidek: “Kim o‘zini tanisa, Rabbini taniydi”. Bu martabaga erishgan qalb esa hech qachon adashmaydi.
Abdulatif ABDULLOH
