Savol: Peshin namozini o‘qib bo‘l­gan kishi uning farzini imomga iqtido qilib qayta o‘qisa bo‘la­di­mi?

Javob: Ha. Shuningdek, jamoat bilan namoz o‘qiladigan masjidda farz namozni yolg‘iz o‘zi o‘qiyotgan kishi, u o‘qiyotgan farz namozi jamoat bilan o‘qila boshlaganida, agar birinchi rakatga sajdaga bormagan bo‘lsa, namozini buzib, imomga iqtido qiladi (“Muxtasarul Viqoya”).

Payg‘ambarimiz (sollallohu alayhi va sallam) bunday deganlar: «Jamoat namozining savobi yolg‘iz o‘qilgan namozdan yigirma yetti daraja ortiqdir» (Imom Buxoriy rivoyati).

To‘rt rakatli farz namozlarda bir rakatini o‘qigan bo‘lsa, ikkinchi rakatini ham o‘qib tashah­huddan keyin salom berib imomga iqtido qiladi. Agar uch rakatini o‘qib bo‘lgan bo‘lsa, namozini tugatib, keyin imomga iqtido qiladi. O‘qilgan bu to‘rt rakatli namoz nafl hisoblanadi.

Agar bomdod namozining farzini boshlab bi­rinchi rakatining sajdasini qilgan bo‘lsa, bomdod namozidan keyin nafl namoz o‘qish makruhligi sababli bir salom bilan namozini buzib, imomga iqtido qiladi.

Shunga o‘xshash shom namozida ham bir raka­ti­ni o‘qib bo‘lgan bo‘lsa ham ikkinchi rakatini o‘qimas­dan, salom berib, imomga iqtido qiladi.

O‘qilayotgan namoz asr bo‘lsa, imomga nafl niya­ti bilan iqtido qilolmaydi. Chunki asr namo­zini o‘qigandan keyin nafl o‘qish makruhdir.

Farz namozini o‘qiyotgan kishi ikki rakatini o‘qib bo‘lib, uchinchi rakatining sajdasiga hanuz bormagan bo‘lsa, jamoat namozi uchun takbir ay­tilsa, tik turib yoki o‘tirib salom berib, imomga iqtido qiladi. O‘qilgan ikki rakat nafl o‘rniga o‘tadi.

Lekin boshlagan namozi sunnat (nafl) bo‘lsa, uni tugatib, so‘ng imomga iqtido qiladi.

"So‘ragan edingiz" kitobidan olindi
O‘MI Matbuot xizmati