Barakotga to‘la oy
Ramazon – saodat asridan buyon mo‘min-musulmonlar alohida e’tibor va hurmat bilan kutib oladigan oydir.
Bizni musulmonlardan qilib yaratib, kalbimizga ro‘za mehrini solib, dorulomon kunlarda tinch-osoyishta mamlakatimizda ramazonning shukuhi bilan qalbimizni xursand qilib quygan Alloh taologa hamdu sanolarimiz bo‘lsin.
Ramazon ro‘zasi musulmonlarga farz qilingan amal bo‘lib, Qur’on oyatlari bilan sobitdir. Ramazon ro‘zasi qibla Makkaga o‘zgargan yili, ya’ni hijriy 2 yili, sha’bon oyining 18 kuni farz bo‘lgan. Rasululloh sollalloxu alayxi vasallam 9 yil farz ro‘zani tutganlar. Qur’oni karim ham ushbu muborak ramazon oyida nozil bo‘lgan. Bu esa ramazon oyini sharafini yanada ziyoda qilgan. Ro‘za insonni sog‘ligiga shifo bo‘lsa, Qur’oni karim insonning ruhiyatiga shifo bo‘ladi. Tinch va fayzli mamlakatimizning minglab masjidlarida, har yili ramazon oyida Xatmi Qur’onlar bo‘layotgani bejiz emaski, yurtimizga ana shu Xatmi Qur’onlarni sabab qilib Alloh taolo barakalar yog‘dirmoqda.
Musulmon kishining yil davomida ado etib yurgan ibodati, sadaqa va xayrli ishlari, yaxshi amallari, bandaligiga borib sodir etgan gunohlarini ketkazib turadi. Agarda bulardan ham ortib qolgan gunohlari bo‘lsa, u gunohlar ramazon ro‘zasini tutishi bilan ketkaziladi. Albatta, inson gunohlardan xoli emas. Gunoh ishlar musulmon kishi uchun badanga yetgan zahar kabidir, agar inson ehtiyot bo‘lmasa bu zahar insonni o‘ldirishi mumkin.
Ramazon oyi kelganda Rasululloh sollalloxu alayxi vasallamning saxovatlari yanada oshib ketardi. Biz ham shunday ulug‘ zotning ummatlari ekanmiz, u zotdan o‘rnak olib ramazon oyida oilamizga, qarindosh-urug‘larimizga, mahallamizdagi beva-bechoralarga, kam ta’minlangan qariyalarga qo‘limizdan kelganicha moddiy yordam berishimiz, bemorlardan xabar olib, ularni borib ko‘rishimiz lozim. Shuning uchun keladigan bu muborak oy, gunohlarimizdan poklanishimiz uchun g‘animatdir.
Inomjon NAMOZOV,
“Tangri berdi ” jome masjidi imom-xatibi
24–29 avgust kunlari Toshkentda “Islom sivilizatsiyasi: yangi nigoh, yangi kashfiyotlar” mavzusida xalqaro mediaforum bo‘lib o‘tadi
24–29 avgust kunlari O‘zbekiston poytaxtida “Islom sivilizatsiyasi: yangi nigoh, yangi kashfiyotlar” mavzusida xalqaro mediaforum o‘tkaziladi, deb xabar bermoqda “Dunyo” AA.
Tadbirning asosiy qismi O‘zbekistondagi Islom sivilizatsiyasi markazida o‘tkaziladi. Unda xorijiy ommaviy axborot vositalari vakillari, xalqaro ekspertlar va media sohasi mutaxassislari jam bo‘ladi.
Forum dasturidan tantanali ochilish marosimi, yalpi majlislar, mavzuga oid media-ko‘rgazmalar, matbuot anjumanlari va ikki tomonlama uchrashuvlar o‘rin olgan. Sho‘ba yig‘ilishlari doirasida hujjatli kino va tarixiy xotira, nashriyot loyihalari, zamonaviy texnologiyalar, shuningdek, media sohasidagi xalqaro loyihalarni rivojlantirish masalalari muhokama qilinadi.
Bundan tashqari, O‘zbekiston talabalari uchun jahon media sanoatining yetakchi mutaxassislari ishtirokida mahorat darslari tashkil etiladi. Ishtirokchilar zamonaviy jurnalistika, media mahsulotlar yaratish va xalqaro axborot makonida samarali faoliyat yuritish borasida tajriba almashadi.
27 avgust kuni forum qatnashchilari uchun Samarqand shahriga sayohat uyushtiriladi. Dastur doirasida mehmonlar Imom Buxoriy majmuasini ziyorat qiladi va shaharning tarixiy-madaniy merosi bilan tanishadi. Shuningdek, Toshkent shahrida xorijiy OAV vakillari uchun maxsus media-tur o‘tkazilishi rejalashtirilgan.
Forum 28 avgust kuni yakuniy yalpi majlis va tantanali yopilish marosimi bilan o‘z ishini yakunlaydi. Xorijlik mehmonlar, O‘zbekiston davlat mustaqilligining 35 yilligiga bag‘ishlangan tadbirlarda ham ishtirok etadi.
O‘zbekiston musulmonlari idorasi Matbuot xizmati
