Ro‘za tutish yaxshiroq
Alloh taolo bizlarni ro‘za tutishga buyurgan: “Ey, imon keltirganlar! Sizlardan oldingi (ummat)larga farz qilingani kabi sizlarga ham ro‘za tutish farz qilindi, shoyad (u sababli) taqvoli bo‘lsangiz” (Baqara, 183).
Boshqa oyatda: “Agar bilsangiz, ro‘za tutishingiz (fidya berib tutmaganingizdan) yaxshiroqdir”, deb marhamat qilgan (Baqara, 184).
Har yili bizlar yilning eng yaxshi oyi ramazonga oshiqamiz, undagi ibodat lazzatini his etib, katta qiziqish bilan qarshi olamiz. Chunki ro‘zaning dunyodagi foydalarini hamda oxiratda uning sababidan olinadigan ne’matlarni anglab yetgan mo‘min, bu oyni intiq kutishi shubhasiz.
Ba’zilar esa, ro‘zada kamroq sigaret chekishlaridan yoki ozroq yeyishlaridan malollanadi. Aslida ular bu ibodatning halovatini sezishmaydi.
Mana shunday holatga tushmaslik uchun ulug‘ ne’mat bo‘lgan ro‘zaning ruhimizga, tanamizga, sog‘ligimizga foydalarini bilishimiz kerak.
Mutaxassislar hujayralarni asrovchi omil, viruslar, bakteriyalarni yo‘q qilishda ro‘zani eng foydali muolaja deb topishdi.
Ayrim davlatlarda faqat ro‘za bilan davolaydigan maxsus muolaja markazlari, ularda zamonaviy tibbiyot davolashi qiyin bo‘lgan, lekin ro‘za tutish bilan qisqa muddatda shifo topayotganlar borligi bu fikrga yaqqol dalildir.
Ro‘za va tan quvvati
Tadqiqotchilar fikricha, ro‘za tutgan insonning quvvat darajasi eng yuqori bo‘lar ekan. Ro‘zador inson jasadida o‘zi sezmagan ko‘p o‘zgarishlar sodir bo‘ladi. Shayton vasvasasi kamaygani bois insonning quvvati oshadi.
Jismda quvvatning o‘ndan bir qismidan ko‘prog‘i ovqatni chaynash, hazm qilish paytiga sarflanadi. Ro‘za holatida bunday quvvat sarfining yo‘qolishi, insonga rohat va hushyorlik bag‘ishlaydi. Tejalgan quvvat jismni zararli moddalardan, keraksiz qoldiqlardan tozalashga sarflanadi.
Zararli moddalar
Shifokorlar inson hayotiga xavfli moddalarni faqat ro‘za tutib, yeyish-ichishni cheklash orqali bartaraf etish mumkinligini aytishadi. Ichimlik suvi va havodan oksidlar, karbon, qo‘rg‘oshin va oltingugurt kabi zaharli moddalarni yutamiz. Bu esa tanaga og‘ir yuk bo‘lib insonni zaif va lanj, fikrini tarqoq qiladi. Natijada surunkali kasalliklar paydo bo‘ladi.
Ruhan tetik bo‘lamiz
Ro‘zaning kuchli ruhiy beqarorlikni masalan, aqliy toliqish kabi iztirobni davolovchi ulkan qudrati bor. Bunda ro‘za bosh miyaga hamda miya hujayralariga dam beradi va ayni shu vaqtda tana hujayralarini zararli moddalardan tozalashga kirishadi.
Ro‘za turdi musibat, qiyinchiliklarga sabr qilishda hamda tushkunliklarga qarshi turishda yordam beradi. Shuningdek, ro‘za uyquni yaxshilab, ruhiy holatni to‘g‘ri yo‘naltiradi. Qondagi zararli moddalar chiqarib tashlangach, bosh miya hujayralari tozalanadi. Natijada miya tafakkur qilishga ko‘proq kuch topadi.
Tadqiqotchilar 85 foiz kasalliklar toza bo‘lmagan yo‘g‘on ichak hamda iflos qondan kelib chiqishini ta’kidlashgan. Ro‘za esa oshqozon, yo‘g‘on ichak, ingichka ichakni zararli moddalardan tozalab, a’zolarga yordam beradi.
FAYZO
tayyorladi.
Ollohshukur Poshshozoda: O‘zbekistonni ikkinchi Vatanim deb bilaman va uning har bir yutug‘idan chin dildan quvonaman
Kavkaz musulmonlari idorasi raisi, Shayxulislom Ollohshukur Poshozoda O‘zbekiston mustaqilligining 35 yilligi bayrami munosabati bilan “Dunyo” AA orqali O‘zbekiston xalqiga samimiy tabrik va ezgu tilaklarini yo‘lladi:
– Bismillahir Rohmanir Rohiym.
Qardosh O‘zbekiston xalqini istiqlol ayyomi bilan samimiy muborakbod etib, tinchlik, taraqqiyot va yangi yutuqlar uchun Alloh taolodan xayrli duolar so‘rayman.
Mustaqillik yillarida O‘zbekiston ulug‘vor tarixiy yo‘lni bosib o‘tib, mard va olijanob o‘zbek xalqining mustahkam irodasi tufayli yuksak yutuqlarga erishdi. Bugun mustaqil O‘zbekistonning ijtimoiy-siyosiy, iqtisodiy va ma’naviy sohalarda katta taraqqiyotga erishayotganiga guvoh bo‘lib turibmiz.
O‘zbekistonni ikkinchi Vatanim deb bilib, uni hamisha qalbimda asrab kelayotgan inson sifatida qardosh o‘zbek xalqining yutuqlaridan chin dildan quvonaman. O‘zbekiston rivoji va farovonligi yo‘lida bor kuch-quvvatini ayamay kelayotgan fidokor rahbar – Prezident Shavkat Mirziyoyev Janobi Oliylarining beqiyos mehnatlarini alohida e’tirof etaman.
O‘zbekiston Prezidenti boshchiligida mamlakat so‘nggi o‘n yil davomida Uchinchi Renessans davrini boshdan kechirmoqda. O‘zbekiston bugun davlat rahbarining yuksak siyosiy tafakkuri va sa’y-harakatlari tufayli islom olamida yorqin nur sochayotgan madaniy-ma’naviy markazga aylandi.
Ushbu zahmatlarning yorqin namunasi bo‘lgan Islom sivilizatsiyasi markazini butun dunyo musulmonlariga taqdim etilgan bebaho tuhfa desak, mubolag‘a bo‘lmaydi. O‘zbek mutafakkirlarining qimmatli ilmiy-ma’naviy merosini xalqaro miqyosda keng targ‘ib etish O‘zbekiston zaminining asrlar davomida shakllanib kelgan ma’rifat va irfon markazi maqomini yana bir bor ifodalaydi.
O‘zbekiston yetakchisi bilan har bir uchrashuv va muloqot men uchun muhim ahamiyatga ega bo‘lib, ko‘rsatayotgan yuksak e’tibori uchun cheksiz minnatdorlik bildiraman. Yaqinda O‘zbekiston Prezidenti tomonidan “El-yurt hurmati” ordenining topshirilishi menda faxr-iftixor tuyg‘ularini uyg‘otdi va bundan benihoya faxrlanaman.
Mustaqil O‘zbekiston bilan barcha sohalarda aloqalarimizni yanada kengaytirish xalqlarimiz uchun ko‘plab imkoniyatlar yaratadi. Ozarbayjon Prezidenti Ilhom Aliyev hamda O‘zbekiston Prezidenti Shavkat Mirziyoyev o‘rtasida qaror topgan mustahkam qardoshlik munosabatlari, o‘zaro tashkil etilayotgan uchrashuvlar alohida qadr-qimmatga ega bo‘lib, bizga ma’naviy kuch bag‘ishlaydi.
Davlat rahbarlarimizning sa’y-harakatlari va oqilona siyosati tufayli Ozarbayjon va O‘zbekiston o‘rtasidagi aloqalar barcha sohalarda kengayib, qardoshligimiz ittifoqchilik darajasiga ko‘tarildi.
O‘zbekiston qalbimda alohida o‘rin tutadi. Bu mamlakatning har bir yutug‘idan behad quvonaman va uning doimo yuksak cho‘qqilarni zabt etishi uchun duolar qilaman.
O‘zbekistonda oliy diniy ta’lim olib, Ozarbayjon va Kavkazda Shayxulislomlik maqomiga ko‘tarilgan inson sifatida Ozarbayjon va O‘zbekistonning milliy-ma’naviy qadriyatlari hamda tarixiy merosimizga berilayotgan e’tiborni yuksak qadrlayman.
Dunyoda kechayotgan murakkab davrda qardosh xalqlarimiz o‘zlarining tarixiy-ma’naviy meroslariga suyangan holda munosib kelajak qurish yo‘lida ishonch bilan odimlamoqda. Turkiy davlatlar tashkiloti doirasida munosabatlarimizning yanada kengayishi Alloh taoloning bizga ko‘rsatayotgan lutfu karamidir.
Ozarbayjonning ishg‘oldan ozod etilgan hududlarida amalga oshirilayotgan bunyodkorlik va qayta tiklash ishlari, diniy-ma’naviy merosni qayta tiklash jarayoniga turkiy davlatlar orasida birinchi bo‘lib o‘z ezgu tuhfalarini taqdim etgan O‘zbekiston xalqi va davlat rahbariga chin qalbimizdan minnatdorlik bildiramiz.
Yana bir bor O‘zbekiston Mustaqilligining 35 yilligi munosabati bilan qardosh o‘zbek xalqini samimiy muborakbod etib, eng ezgu tilaklarimni yo‘llayman.
Alloh taolo O‘zining ulug‘ rahmati va karamidan barchamizni bahramand etsin. Ezgu orzu-niyatlar va xayrli maqsadlarimizning ro‘yobga chiqishida Alloh madadkor bo‘lsin. Omin!
O‘zbekiston musulmonlari idorasi Matbuot xizmati
